નવી દિલ્હી, 17 મે 2026: Semiconductor manufacturing ટાટા ઇલેક્ટ્રોનિક્સ અને નેધરલેન્ડ સ્થિત સેમિકન્ડક્ટર ઉપકરણ નિર્માતા ASML એ ભારતમાં ચિપ ઉત્પાદનને વેગ આપવા માટે ભાગીદારી કરી છે. આ કરારની જાહેરાત વડા પ્રધાન નરેન્દ્ર મોદીની નેધરલેન્ડ મુલાકાત દરમિયાન કરવામાં આવી હતી.
ASML એ અદ્યતન અને નાના કદના સેમિકન્ડક્ટરના ઉત્પાદન માટે ઉપયોગમાં લેવાતા વિશિષ્ટ લિથોગ્રાફી સાધનોનું અગ્રણી ઉત્પાદક છે. આ ભાગીદારી હેઠળ, ASML ગુજરાતના ધોલેરામાં ટાટા ઇલેક્ટ્રોનિક્સના આગામી 300-મિલિમીટર સેમિકન્ડક્ટર ફેબ પ્રોજેક્ટની સ્થાપના અને સંચાલનને સમર્થન આપશે, એમ સંયુક્ત નિવેદનમાં જણાવાયું છે.
નિવેદનમાં કહેવામાં આવ્યું છે કે આ સહયોગ સેમિકન્ડક્ટર જેવી મહત્વપૂર્ણ ટેકનોલોજીના ક્ષેત્રમાં ભારત અને નેધરલેન્ડ્સ વચ્ચે વ્યૂહાત્મક ભાગીદારીને વધુ મજબૂત બનાવશે. ASML ના પ્રમુખ અને CEO ક્રિસ્ટોફ ફુક્સે જણાવ્યું હતું કે ભારતનું ઝડપથી વિકસતું સેમિકન્ડક્ટર ક્ષેત્ર ઘણી નવી તકો પ્રદાન કરે છે અને કંપની આ ક્ષેત્રમાં લાંબા ગાળાની ભાગીદારી માટે પ્રતિબદ્ધ છે.