નવી દિલ્હી, 17 જાન્યુઆરી, 2026: Terror attack alert in Delhi-UP પ્રજાસત્તાક દિન (૨૬ જાન્યુઆરી) પૂર્વે દેશની રાજધાની દિલ્હી અને પડોશી રાજ્ય ઉત્તર પ્રદેશમાં સુરક્ષા એજન્સીઓએ હાઈ એલર્ટ જાહેર કર્યું છે. ગુપ્તચર એજન્સીઓના અહેવાલ મુજબ, કેનેડા સ્થિત ખાલિસ્તાની આતંકવાદી અર્શ ડાલા અને બાંગ્લાદેશી કટ્ટરપંથી સંગઠનો ભારતમાં મોટા પાયે આતંકી હુમલા કરવાનું કાવતરું ઘડી રહ્યા છે. આ આશંકાને પગલે દિલ્હી પોલીસ અને સુરક્ષા દળોએ ‘ઓપરેશન ગેંગ-બસ્ટ’ શરૂ કરીને અત્યાર સુધીમાં ૮૫૦થી વધુ શંકાસ્પદ લોકોની ધરપકડ કરી છે.
ઇન્ટેલિજન્સ બ્યુરો (IB) ના ઇનપુટ્સ અનુસાર, ખાલિસ્તાની આતંકવાદીઓ પંજાબના સ્થાનિક ગેંગસ્ટરો સાથે મળીને ભીડભાડવાળી જગ્યાઓ, ઐતિહાસિક સ્મારકો અને મેટ્રો સ્ટેશનોને નિશાન બનાવી શકે છે. દિલ્હીના અનેક વિસ્તારોમાં ખાલિસ્તાની આતંકવાદી અર્શ ડાલા અને રણજીત સિંહ નીતાના પોસ્ટરો પણ લગાવવામાં આવ્યા છે, જેથી સામાન્ય નાગરિકો તેમને ઓળખી શકે અને પોલીસને જાણ કરી શકે. બીજી તરફ, બાંગ્લાદેશી જૂથો દ્વારા સરહદ પારથી ઘૂસણખોરી કરીને હિંસક ઘટનાઓને અંજામ આપવાનું આયોજન હોવાની ચોંકાવનારી વિગતો પણ સામે આવી છે.
સુરક્ષા વ્યવસ્થાને ચુસ્ત બનાવવા માટે દિલ્હી, હરિયાણા અને ઉત્તર પ્રદેશમાં આશરે ૪,૦૦૦થી વધુ ઠેકાણાઓ પર દરોડા પાડવામાં આવ્યા છે. દિલ્હી પોલીસે લાલ કિલ્લો, સરોજિની નગર અને ચાંદની ચોક જેવા મુખ્ય બજારોમાં સુરક્ષામાં ધરખમ વધારો કર્યો છે. આ ઉપરાંત, દિલ્હીમાં ડ્રોન, પેરાગ્લાઈડર અને માઈક્રો-લાઈટ એરક્રાફ્ટ ઉડાડવા પર કડક પ્રતિબંધ લાદવામાં આવ્યો છે. પડોશી રાજ્ય ઉત્તર પ્રદેશમાં પણ પોલીસને ખાસ સૂચનાઓ આપવામાં આવી છે કે દિલ્હી સાથે જોડાયેલી સરહદો પર દરેક વાહનનું સઘન ચેકિંગ કરવામાં આવે.
આગામી રાષ્ટ્રીય પર્વની ઉજવણીમાં કોઈ ખલેલ ન પહોંચે તે માટે એન્ટિ-ટેરર સ્ક્વોડ (ATS) અને સ્પેશિયલ સેલની ટીમો ૨૪ કલાક સતર્ક છે. સુરક્ષા એજન્સીઓ માટે આ સમયગાળો દેશની શાંતિ અને અખંડિતતા જાળવવા માટે અત્યંત મહત્ત્વનો સાબિત થઈ રહ્યો છે. જનતાને પણ અપીલ કરવામાં આવી છે કે કોઈ પણ બિનવારસી વસ્તુ કે શંકાસ્પદ વ્યક્તિ દેખાય તો તુરંત પોલીસનો સંપર્ક કરે.