દિવસભરની ઓફિસની દોડધામ, ઘરકામ કે બિઝનેસના થાક પછી જો સાંજે એક કપ ગરમાગરમ કડક ચા અને સાથે કશુંક ચટાકેદાર ખાવા મળી જાય, તો આખા દિવસનો થાક મિનિટોમાં ગાયબ થઈ જાય છે. ચાની પહેલી ચુસ્કી અને સ્નેક્સનો પહેલો બાઈટ આપણને રિફ્રેશ કરી દે છે. જો કે, ઘણીવાર થાક એટલો વધારે હોય છે કે કિચનમાં જઈને લાંબી રસોઈ બનાવવાની એનર્જી હોતી નથી. આવા સમયે આપણે મન મારીને બજારના પેકેટમાંથી વેફર્સ કે બિસ્કિટ કાઢીને ચા સાથે ચલાવી લઈએ છીએ. જો તમારી વાર્તા પણ આવી જ હોય અને તમે રોજ એકનો એક નાસ્તો કરીને કંટાળ્યા હો, તો આજે અમે તમારા માટે લઈને આવ્યા છીએ માત્ર 10 મિનિટમાં તૈયાર થઈ જતા સુપર ટેસ્ટી અને હેલ્ધી સ્નેક્સની રેસિપી, જે તમારી સાંજની ચાનો સ્વાદ ડબલ કરી દેશે.
-
સાંજની ભૂખ માટે હેલ્ધી ચોઈસ: ઈન્સ્ટન્ટ રવા ઈડલી
જો તમારે સાંજે કંઈક લાઈટ અને પૌષ્ટિક ખાવું હોય, તો સોફ્ટ રવા ઈડલી બેસ્ટ ઓપ્શન છે. આ માટે ખીરાને કલાકો સુધી આથો (ફર્મેન્ટેશન) આપવાની કોઈ ઝંઝટ નથી.
કેવી રીતે બનાવશો: એક વાટકી સૂજીમાં અડધી વાટકી દહીં, સ્વાદ અનુસાર મીઠું અને જરૂર મુજબ પાણી ઉમેરી ઘટ્ટ ખીરું તૈયાર કરો. હવે તેમાં એક નાની ચમચી ઈનો ઉમેરી મિક્સ કરો અને ઈડલી સ્ટેન્ડમાં મૂકી 5 થી 7 મિનિટ સ્ટીમ કરી લો. તમારી એકદમ સ્પંજી ઈડલી તૈયાર છે, જેને ગરમાગરમ લીલી ચટણી કે કોપરાની ચટણી સાથે સર્વ કરો.
-
બાળકોથી લઈને મોટાઓનો ઓલટાઇમ ફેવરિટ: ક્રિસ્પી બ્રેડ પિઝા
પિઝા ખાવા માટે હવે ઓવનની કે બહાર જવાની જરૂર નથી. માત્ર તવા પર જ આ ક્રિસ્પી બ્રેડ પિઝા 5 મિનિટમાં બની જાય છે.
કેવી રીતે બનાવશો: બ્રેડની સ્લાઈસ પર પિઝા સોસ અથવા ટોમેટો કેચઅપ લગાવો. તેના પર તમારી પસંદગીના ઝીણા સમારેલા શાકભાજી જેવા કે ડુંગળી, કેપ્સિકમ, ટામેટા અને સ્વીટ કોર્ન પાથરો. ઉપરથી પુષ્કળ મોઝરેલા ચીઝ, ઓરેગાનો અને ચીલી ફ્લેક્સ ભભરાવો. હવે તવા પર સહેજ બટર લગાવી, બ્રેડ મૂકીને ચીઝ ઓગળે ત્યાં સુધી ઢાંકીને ધીમા તાપે શેકી લો.
-
ગેસ સળગાવ્યા વગર મિનિટોમાં તૈયાર: ચટપટી ભેલપૂરી
સાંજે જોરદાર ભૂખ લાગી હોય પણ ગેસ ચાલુ કરવાનો બિલકુલ મૂડ ન હોય, ત્યારે મુંબઈ સ્ટાઈલ ભેલપૂરી તારણહાર બને છે.
કેવી રીતે બનાવશો: એક મોટા વાસણમાં મમરા લો. તેમાં ઝીણી સમારેલી ડુંગળી, ટામેટા, બાફેલા બટાકાના ટુકડા અને લીલા મરચા ઉમેરો. સ્વાદ વધારવા માટે થોડું મિક્સ ચવાણું, શેકેલી સીંગ અને પાપડીનો ભૂકો ઉમેરો. હવે તેના પર લીલી ચટણી, આંબલીની ખાટી-મીઠી ચટણી, લીંબુનો રસ, ચાટ મસાલો અને મીઠું નાખી બરાબર મિક્સ કરો. છેલ્લે ઝીણી સેવ અને કોથમીરથી ગાર્નિશ કરી મજા લો.
-
હોટેલ જેવો સ્વાદ ઘરે જ માણો: કેફે સ્ટાઈલ ચીઝ ગાર્લિક ટોસ્ટ
ચાની સાથે ગાર્લિક અને ચીઝનું કોમ્બિનેશન અદભુત લાગે છે. તેને ઘરે બનાવવું ડાબા હાથનો ખેલ છે.
કેવી રીતે બનાવશો: એક નાની વાટકીમાં બે ચમચી સોફ્ટ બટર લો. તેમાં છીણેલું લસણ, ઝીણી સમારેલી કોથમીર અને ચીલી ફ્લેક્સ ઉમેરી સ્મૂધ પેસ્ટ બનાવો. આ ગાર્લિક બટરને બ્રેડ પર લગાવો અને ઉપરથી ચીઝ છીણી લો. ગરમ તવા પર આ બ્રેડ મૂકી, ઢાંકણ ઢાંકીને ૨ મિનિટ ધીમા તાપે ક્રિસ્પી થાય ત્યાં સુધી શેકી લો.
-
અચાનક આવેલા મહેમાનો માટે બેસ્ટ: ક્રિસ્પી આલુ-પોહા કટ્સ
જો સાંજના સમયે ઘરે અચાનક મહેમાન આવી જાય, તો આ કટ્સ તમને વાહવાહ અપાવશે.
કેવી રીતે બનાવશો: અડધા કપ પોહાને પાણીથી ધોઈ ૨ મિનિટ રહેવા દો જેથી તે સોફ્ટ થઈ જાય. હવે આ પોહામાં એક બાફેલો અને મેશ કરેલો બટાકો, ઝીણી સમારેલી ડુંગળી, લીલા મરચા, કોથમીર, અડધી ચમચી ચાટ મસાલો, લાલ મરચું પાવડર અને મીઠું નાખી લોટની જેમ ગૂંદી લો. આ મિશ્રણમાંથી નાની-નાની ટીક્કી (કટ્સ) બનાવી તવા પર અલ્પ તેલમાં (શેલો ફ્રાય) બંને બાજુ ગોલ્ડન બ્રાઉન થાય ત્યાં સુધી શેકી લો.