ન્યૂયોર્ક, 11 મે 2026: ઈરાને અમેરિકા સાથે વાતચીત કરવા માટે એક ડ્રાફ્ટ પ્રસ્તાવ મોકલી દીધો છે. ઈરાનના ડ્રાફ્ટ પ્રસ્તાવ પર અમેરિકાના રાષ્ટ્રપતિ ડોનાલ્ડ ટ્રમ્પની પ્રતિક્રિયા પણ સામે આવી છે. અમેરિકી રાષ્ટ્રપતિએ ઈરાનના પ્રસ્તાવને એમ કહીને ફગાવી દીધો છે કે આ બિલકુલ પણ મંજૂર નથી. રાષ્ટ્રપતિ ટ્રમ્પે ‘ટ્રુથ સોશિયલ’ પર એક પોસ્ટમાં કહ્યું, “મેં હમણાં જ ઈરાનના કહેવાતા ‘પ્રતિનિધિઓ’નો જવાબ વાંચ્યો છે. મને આ પસંદ નથી આવ્યું, બિલકુલ મંજૂર નથી. આ બાબતે ધ્યાન આપવા બદલ આભાર!”
ઈરાને અમેરિકાને પાકિસ્તાનની મધ્યસ્થતા દ્વારા પોતાનો પ્રસ્તાવ મોકલ્યો હતો, જેના થોડા કલાકો બાદ જ અમેરિકી રાષ્ટ્રપતિનું આ નિવેદન સામે આવ્યું. પાકિસ્તાનના પ્રધાનમંત્રી શાહબાઝ શરીફે પુષ્ટિ કરી છે કે તેહરાને જવાબ આપી દીધો છે. જોકે, જવાબ સાથે સંબંધિત વિગતવાર માહિતી શેર કરી નથી.
ઈરાનના સરકારી મીડિયાએ જણાવ્યું કે તેહરાનનો જવાબ ખાસ કરીને આ ક્ષેત્રમાં દુશ્મનાવટ ખતમ કરવા પર કેન્દ્રિત હતો. તો વળી, અન્ય ઈરાની મીડિયા રિપોર્ટ્સમાં કહેવામાં આવ્યું છે કે તેહરાને લડાઈને સત્તાવાર રીતે ખતમ કરવા, હોરમુઝ સ્ટ્રેટને ફરીથી ખોલવા, અમેરિકી નૌકાદળના તે જહાજોને હટાવવા જે નાકાબંધી લાગુ કરી રહ્યા છે, પ્રતિબંધો હટાવવા અને વાતચીત માટે 30 દિવસનો વધારાનો સમય આપવાની માંગ કરી છે.
ઈરાને કથિત રીતે એવો પણ પ્રસ્તાવ આપ્યો છે કે ભવિષ્યની વાતચીતમાં તેના ન્યુક્લિયર પ્રોગ્રામ પર અલગથી ચર્ચા કરવામાં આવે. બાદમાં અમેરિકી રાષ્ટ્રપતિએ ઈરાન પર અમેરિકા સાથે ગેમ રમવાનો આરોપ લગાવ્યો અને ચેતવણી આપી કે હવે ઈરાન વધુ ખુશ નહીં રહી શકે. આ દરમિયાન, અમેરિકાના વિદેશ સચિવ માર્કો રુબિયોએ કહ્યું છે કે ઈરાને એ સ્પષ્ટ કરી દેવું જોઈએ કે તેઓ ન્યુક્લિયર હથિયાર નથી ઈચ્છતા, જેને વોશિંગ્ટન શાંતિ સમજૂતી માટે જરૂરી માને છે.
આ પણ વાંચોઃ પ્રિ-મોન્સુન કામગીરીઃ શાહીબાગમાં કેચપીટમાં ફૂડ વેસ્ટ નાંખનાર દુકાન AMC દ્વારા સીલ