આવતીકાલે છ રાજ્યો અને બે કેન્દ્રશાસિત પ્રદેશોની 49 બેઠકો પર મતદાન યોજાવાનું છે. જેમાં હાઈ પ્રોફાઈલ રાયબરેલી તેમજ અમેઠી બેઠક પર પણ મતદાન યોજાશે. જ્યાં કોંગ્રેસનાં પૂર્વ અધ્યક્ષ રાહુલ ગાંધી અને કેન્દ્રીય મંત્રી સ્મૃતિ ઈરાની પણ મેદાનમાં છે. રાહુલ ગાંધી આ વખતે બે બેઠક પરથી ચૂંટણી લડી રહ્યા છે. કેરળનાં વાયનાડથી અને નહેરૂ ગાંધી પરિવારના ગઢ રાયબરેલીથી.. આ સીટનું પ્રતિનિધિત્વ 2004 થી તેમની માતા સોનિયા ગાંધી કરી રહ્યા હતા. ભાજપ દ્વારા યુપીનાં મંત્રી દિનેશ પ્રતાપસિંહને મેદાનમાં ઉતારવામાં આવ્યા છે.
- પાંચમા તબક્કામાં સૌથી ઓછી સીટો પર મતદાન યોજાશે
કોંગ્રેસ અને અન્ય ઇન્ડિયા ગઠબંધને ભાજપ પર હિન્દુ-મુસ્લિમ રાજકારણ કરવાનો મતદારોનું ધ્રુવીકરણ કરવાનો અને બેરોજગારી અને મોંઘવારી જેવા મુદ્દાઓ પર ધ્યાન કેન્દ્રિત ન કરવાનો આરોપ લગાવ્યો. તેઓ અનામત અને બંધારણના રક્ષણના મુદ્દાઓ પર પણ આક્રમક હતા. સોમવારે, 20 મેના રોજ, મહારાષ્ટ્રની 13, ઉત્તર પ્રદેશની 14, પશ્ચિમ બંગાળની સાત, બિહારની પાંચ, ઝારખંડની ત્રણ, ઓડિશાની પાંચ અને જમ્મુ-કાશ્મીર અને લદ્દાખની એક-એક બેઠક પર મતદાન થશે. પાંચમા તબક્કામાં સૌથી ઓછી બેઠકો (49) પર મતદાન થવાનું છે.
પાંચમા તબક્કામાં જે 49 બેઠકો માટે ચૂંટણી યોજાવાની છે તેમાંથી 40થી વધુ એનડીએ પાસે છે. આ તબક્કામાં સીટો માટે પ્રચાર કરતી વખતે, વડા પ્રધાન નરેન્દ્ર મોદી અને અન્ય બીજેપી નેતાઓએ તુષ્ટિકરણ, વંશવાદી રાજકારણ, રામ મંદિર, નાગરિકતાના મુદ્દાઓ પર ભાર મૂકીને ઇન્ડિયા બ્લોક પાર્ટીઓ દ્વારા ઉભા કરવામાં આવેલા પડકારને રોકવાનો પ્રયાસ કર્યો. વડાપ્રધાન મોદીએ દાવો કર્યો કે, “જો સપા અને કોંગ્રેસ સત્તામાં આવશે તો તેઓ રામ લલ્લાને તંબુમાં પાછા મોકલી દેશે અને મંદિર પર બુલડોઝ ફેરવી દેશે.” તેમણે એવો પણ આરોપ લગાવ્યો કે વિપક્ષ કલમ 370 પાછી લાવવા માંગે છે.