નવી દિલ્હી, 2 જુલાઈ 2026: દેશમાં ચાલુ વર્ષે ઓછો વરસાદ પડવાની આશંકાને પગલે કેન્દ્ર સરકાર સંપૂર્ણપણે એલર્ટ મોડ પર આવી ગઈ છે. વડાપ્રધાન નરેન્દ્ર મોદીએ કેન્દ્રીય કેબિનેટની બેઠક દરમિયાન પરિસ્થિતિની ગંભીર સમીક્ષા કરી હતી. તેમણે તમામ સંબંધિત મંત્રાલયો અને વિભાગોને પરસ્પર તાલમેલ સાથે કામ કરવા અને સમય રહેતા મજબૂત તૈયારીઓ પૂર્ણ કરી લેવા કડક સૂચના આપી છે.
સૂત્રોના જણાવ્યા અનુસાર, બેઠકમાં વડાપ્રધાને ભારપૂર્વક જણાવ્યું હતું કે કૃષિ, પાણીની ઉપલબ્ધતા અને વીજ પુરવઠા જેવા આવશ્યક ક્ષેત્રો પર ઓછા વરસાદની પ્રતિકૂળ અસર ન પડે તે માટે અત્યારથી જ ઇમરજન્સી પ્લાન (આપાતકાલીન યોજના) તૈયાર રાખવામાં આવે. સરકારના 10 મુખ્ય મંત્રાલયો આ સમગ્ર સ્થિતિ પર ચોવીસેય કલાક નજર રાખશે. આમાં મુખ્યત્વે કૃષિ અને ખેડૂત કલ્યાણ મંત્રાલય, જલ શક્તિ મંત્રાલય અને ઊર્જા મંત્રાલયનો સમાવેશ થાય છે. આ તમામ મંત્રાલયો મળીને એક સંયુક્ત વ્યૂહરચના બનાવશે અને ગ્રાઉન્ડ લેવલ પર સતત ડેટા શેરિંગ કરીને જરૂર પડ્યે તાત્કાલિક પગલાં ભરશે. ઉલ્લેખનીય છે કે, હવામાન વિભાગે જુલાઈ મહિનામાં દેશમાં સરેરાશ વરસાદ સામાન્ય કરતાં ઓછો રહેવાની આશંકા વ્યક્ત કરી છે.
કેન્દ્રીય કેબિનેટે દેશના 80 કરોડથી વધુ ગરીબ અને જરૂરિયાતમંદ લોકોને રેશનિંગની દુકાનો દ્વારા વિતરણ કરવામાં આવતા ચોખાની ગુણવત્તા સુધારવાનો મોટો નિર્ણય લીધો છે. સરકારે કુલ પુરવઠામાં ‘ટુકડા ચોખા’ (બ્રોકન રાઇસ)ની માત્રા ઘટાડવાનો નિર્ણય કર્યો છે, જેથી નાગરિકોને આખા અને સારા ચોખા મળી શકે.
-
૩૦ વર્ષ પછી પ્રથમ વખત નિયમોમાં ફેરફાર
કેન્દ્રીય ખાદ્ય અને ગ્રાહક બાબતોના મંત્રી પ્રહલાદ જોશીએ સોશિયલ મીડિયા પ્લેટફોર્મ ‘એક્સ’ પર આ અંગે માહિતી આપતા જણાવ્યું હતું કે, વડાપ્રધાન નરેન્દ્ર મોદીના નેતૃત્વમાં કેબિનેટે અન્ન સુરક્ષા વ્યવસ્થાને વધુ મજબૂત કરવા માટે આ ઐતિહાસિક નિર્ણય લીધો છે. અંદાજે 30 વર્ષ પછી પહેલીવાર ‘પ્રધાનમંત્રી ગરીબ કલ્યાણ અન્ન યોજના’ હેઠળ વિતરણ કરવામાં આવતા ચોખાના ગુણવત્તાના ધોરણોમાં સુધારો કરવામાં આવ્યો છે.
-
નવા માપદંડો નીચે મુજબ છે
કાચા ચોખા (રો રાઇસ): આમાં ટુકડા ચોખાની મર્યાદા 25 ટકાથી ઘટાડીને 10 ટકા કરી દેવામાં આવી છે.
બાફેલા ચોખા (પારબોઇલ્ડ રાઇસ): આમાં ટુકડાની મર્યાદા 16 ટકાથી ઘટાડીને માત્ર 5 ટકા કરવામાં આવી છે.
ખાદ્ય મંત્રીએ સ્પષ્ટ કર્યું હતું કે પીએમજીકેએવાય હેઠળ દરેક પાત્ર પરિવારને પહેલાની જેમ જ નક્કી કરેલી માત્રામાં અનાજ મળતું રહેશે, પરંતુ હવે તેની ગુણવત્તા પહેલા કરતાં ઘણી શ્રેષ્ઠ અને સન્માનજનક હશે.