ઇસ્લામાબાદ, 23 જુલાઈ 2026: મિડલ ઇસ્ટમાં અમેરિકા અને ઈરાન વચ્ચે વધી રહેલા તણાવની સીધી અસર હવે પાકિસ્તાન પર પણ જોવા મળી રહી છે. યમનના હૂતી વિદ્રોહીઓ દ્વારા સાઉદી અરેબિયા પર કરવામાં આવેલા મિસાઇલ હુમલા બાદ પાકિસ્તાનની રાજકીય અને સૈન્ય છાવણીઓમાં ચિંતાનું મોજું ફરી વળ્યું છે. ઇસ્લામાબાદને ડર સતાવી રહ્યો છે કે ક્યાંક આ ભૌગોલિક રાજકીય સંઘર્ષમાં તેને પણ અનિચ્છાએ સામેલ થવું ન પડે.
આ કટોકટી પાછળનું મુખ્ય કારણ પાકિસ્તાન અને સાઉદી અરેબિયા વચ્ચે અગાઉ થયેલો ‘મ્યુચ્યુઅલ ડિફેન્સ પેક્ટ’ છે. આ કરાર અંતર્ગત હજારો પાકિસ્તાની સૈનિકો અને લડાકુ વિમાનો પહેલેથી જ સાઉદી અરેબિયાની સુરક્ષામાં તૈનાત છે. એક તરફ પાકિસ્તાન અમેરિકા અને ઈરાન વચ્ચે મધ્યસ્થીની ભૂમિકા ભજવીને શાંતિ સ્થાપવાનો પ્રયાસ કરી રહ્યું છે, તો બીજી તરફ સાઉદી અરેબિયાની સુરક્ષા પ્રત્યે તેની કટિબદ્ધતા તેને મુશ્કેલીમાં મૂકી રહી છે. પાકિસ્તાને ઈરાનને સ્પષ્ટ સંદેશ આપી દીધો છે કે સાઉદી અરેબિયા પર થતા હુમલા તેના માટે ‘રેડ લાઇન’ સમાન છે.
સૂત્રોના જણાવ્યા અનુસાર, જો અમેરિકા ઈરાનના પાવર નેટવર્ક પર હુમલો કરે છે, તો ઈરાન સમર્થિત હૂતી સંગઠન વૈશ્વિક વેપાર માટે અત્યંત મહત્વપૂર્ણ એવા ‘બાબ-અલ-મંદેબ’ જળડમરૂમધ્યને બંધ કરી શકે છે, જેનાથી વૈશ્વિક તેલ પુરવઠા અને આર્થિક બજાર પર ગંભીર અસરો પડી શકે છે.