- ગોવા, દિલ્હી, કર્ણાટક, હરિયાણા અને તેલંગાણા જેવા રાજ્યો પણ ટોપ પર
- રાજ્યો વચ્ચે આર્થિક વિકાસ અને જનજીવનના સ્તરમાં હજુ પણ ઘણું મોટું અંતર
નવી દિલ્હી, 10 જુલાઈ 2026: દેશની અર્થવ્યવસ્થા ભલે વૈશ્વિક સ્તરે સતત મજબૂત થઈ રહી હોય, પરંતુ ભારતના જુદા જુદા રાજ્યોના નાગરિકોની સરેરાશ આવકમાં આજે પણ આકાશ-પાતાળનો તફાવત જોવા મળી રહ્યો છે. તાજેતરમાં જાહેર થયેલા એક આર્થિક અહેવાલ અનુસાર, પ્રતિ વ્યક્તિ આવક (પર કેપિટા ઇન્કમ) ના મામલામાં નાનકડું પૂર્વોત્તર રાજ્ય સિક્કિમ દેશનું સૌથી અમીર રાજ્ય બની ગયું છે, જ્યારે દેશની મોટી વસ્તી ધરાવતું બિહાર આ યાદીમાં સૌથી નીચલા ક્રમે એટલે કે સૌથી ગરીબ રાજ્ય સાબિત થયું છે.
અહેવાલમાં સ્પષ્ટ કરવામાં આવ્યું છે કે રાજ્યો વચ્ચે આર્થિક વિકાસ અને જનજીવનના સ્તરમાં હજુ પણ ઘણું મોટું અંતર પ્રવર્તી રહ્યું છે. આર્થિક નિષ્ણાતોના મતે સિક્કિમ પ્રથમ ક્રમે આવવા પાછળનું મુખ્ય કારણ ત્યાંની ઓછી વસ્તી, પ્રવાસન ઉદ્યોગનો અભૂતપૂર્વ વિકાસ, જળવિદ્યુત પરિયોજનાઓ અને મજબૂત ટેક્સ કલેક્શન છે. સિક્કિમ ઉપરાંત ગોવા, દિલ્હી, કર્ણાટક, હરિયાણા અને તેલંગાણા જેવા રાજ્યો પણ પ્રતિ વ્યક્તિ આવકના મામલે દેશમાં મોખરાનું સ્થાન ધરાવે છે, કારણ કે આ રાજ્યોમાં આઈટી, ઇન્ડસ્ટ્રીઝ અને સર્વિસ સેક્ટર ખૂબ મજબૂત છે. બીજી તરફ, બિહાર ઝડપથી વધતી વસ્તી, ઔદ્યોગિક પછાતપણું અને રોજગારીની ઓછી તકોના કારણે આ યાદીમાં સૌથી પાછળ રહી ગયું છે. જોકે છેલ્લા કેટલાક વર્ષોમાં બિહારના અર્થતંત્રમાં આંશિક સુધારો નોંધાયો છે, પરંતુ અન્ય રાજ્યોની સરખામણીએ તે ઘણો ધીમો છે.
નિષ્ણાતોના મતે કોઈપણ રાજ્યની સાચી આર્થિક સ્થિતિ જાણવા માટે માત્ર આવક જ નહીં, પરંતુ મોંઘવારી, શિક્ષણ, આરોગ્ય અને જીવનનિર્વાહના ખર્ચ જેવા પાસાઓ પણ એટલા જ મહત્વના છે.