નવી દિલ્હી, 7 મે 2026: ભારત આજે(7 મે) ‘ઓપરેશન સિંદૂર’ની પ્રથમ વર્ષગાંઠ ઉજવી રહ્યું છે. આ એક એવી નિર્ણાયક સૈન્ય કાર્યવાહી હતી, જે ભારતીય સેનાએ ગત વર્ષે આજના દિવસે પાકિસ્તાન અધિકૃત કાશ્મીર (PoK) અને પાકિસ્તાનમાં સક્રિય આતંકવાદીઓ અને તેમના સુરક્ષિત ઠેકાણાઓ વિરુદ્ધ હાથ ધરી હતી. આ સૈન્ય અભિયાન 22 એપ્રિલના રોજ થયેલા ભયાનક પહેલગામ આતંકવાદી હુમલાના જવાબમાં કરવામાં આવ્યું હતું. તે હુમલામાં પાકિસ્તાન સમર્થિત આતંકવાદીઓએ 26 નિર્દોષ લોકોની હત્યા કરી હતી. પાકિસ્તાન સ્થિત લશ્કર-એ-તૈયબા (LeT) સાથે જોડાયેલા સંગઠન ‘ધ રેઝિસ્ટન્સ ફ્રન્ટ’ (TRF) એ આ હુમલાની જવાબદારી સ્વીકારી હતી.
આ અવસરે ભારતીય સેનાએ સોશિયલ મીડિયા પ્લેટફોર્મ ‘X’ પર પોસ્ટ કરીને લખ્યું કે, “ભારતનો પ્રતિભાવ દ્રઢ, માપસરનો અને સચોટ હતો. અમે અમારી સાર્વભૌમત્વ અને અમારા લોકોની રક્ષા માટે કટિબદ્ધ છીએ. ન્યાય મળ્યો છે. જય હિંદ.” સેનાએ એક ખાસ વીડિયો પણ શેર કર્યો છે, જેમાં પહેલગામ હુમલાથી લઈને ‘ઓપરેશન સિંદૂર’ સુધીની તમામ ઘટનાઓ દર્શાવવામાં આવી છે. આ વીડિયોમાં પ્રધાનમંત્રી નરેન્દ્ર મોદીની તે કડક ચેતવણી પણ સામેલ છે, જે તેમણે દેશને સંબોધતા આપી હતી કે, “ભારત દરેક આતંકવાદી અને તેના મદદગારોને ઓળખી કાઢશે, શોધી કાઢશે અને તેમને સજા આપશે.” પ્રધાનમંત્રી પાકિસ્તાનને સ્પષ્ટ સંદેશ આપતા કહ્યું હતું કે, “આતંક અને વાતચીત, આતંક અને વેપાર તેમજ પાણી અને લોહી એકસાથે વહી શકે નહીં.”
22 એપ્રિલ 2025ના રોજ થયેલા આ હુમલામાં આતંકવાદીઓએ અત્યંત ક્રૂરતા દાખવી હતી. મૃતકોમાં 25 પ્રવાસીઓ અને એક સ્થાનિક ઘોડાવાળાનો સમાવેશ થતો હતો, જેણે પ્રવાસીઓને બચાવતા પોતાનો જીવ ગુમાવ્યો હતો. આ નરસંહારના જવાબમાં ભારતીય સેનાએ 6 અને 7 મેના રોજ ‘ઓપરેશન સિંદૂર’ શરૂ કર્યું હતું. આ ઓપરેશનમાં અત્યાધુનિક સૈન્ય અને વ્યૂહાત્મક ક્ષમતાઓનો ઉપયોગ કરીને પાકિસ્તાનની અંદર છુપાયેલા અનેક આતંકવાદીઓને ઠાર કરવામાં આવ્યા હતા. ભારતીય સંરક્ષણ સ્ટાફના મુખ્યાલયે આ ઓપરેશનને ‘રાષ્ટ્રીય સંકલ્પનું પ્રતીક’ ગણાવ્યું છે.