નવી દિલ્હી, 15 જુલાઈ 2026: ભારત-યુકે વ્યાપક આર્થિક અને વેપાર સમજૂતી (CETA), બંને દેશોની ભાગીદારીમાં એક મહત્વપૂર્ણ ક્ષણ છે. આનાથી આપણા આર્થિક સંબંધો વધુ મજબૂત થશે. આ નિવેદન બુધવારે પ્રધાનમંત્રી નરેન્દ્ર મોદીએ આપ્યું હતું. પ્રધાનમંત્રી મોદીએ કેન્દ્રીય વાણિજ્ય અને ઉદ્યોગ મંત્રી પીયૂષ ગોયલની ભારત-યુકે CETA લાગુ થવા અંગેની પોસ્ટને સોશિયલ મીડિયા પ્લેટફોર્મ ‘X’ પર કોટ કરતા લખ્યું, “આ ભારત-યુનાઇટેડ કિંગડમ ભાગીદારીમાં એક મહત્વપૂર્ણ ક્ષણ છે. CETA અને ‘સોશિયલ સિક્યોરિટી એગ્રીમેન્ટ’ (સામાજિક સુરક્ષા કરાર) લાગુ થવાથી આપણા આર્થિક સંબંધો વધુ મજબૂત થશે. આ કરારો મળીને આપણી સહિયારી આકાંક્ષાઓને આપણા લોકો માટે નક્કર તકોમાં બદલશે.
CETAથી આપણા ખેડૂતો, ઉદ્યોગસાહસિકો અને MSMEને નવી ગતિ મળશે. ઘણા મહત્વપૂર્ણ ક્ષેત્રોને યુકેના બજાર સુધી બહેતર પહોંચ મળશે. આનાથી ટેકનોલોજી, પ્રોફેશનલ સેવાઓ અને ઇનોવેશન (નવીનતા)ના ક્ષેત્રમાં સહયોગ પણ વધશે, સાથે જ કુશળ ભારતીય પ્રતિભાઓની અવરજવરને પણ પ્રોત્સાહન મળશે.” પીએમએ આગળ જણાવ્યું કે સોશિયલ સિક્યોરિટી એગ્રીમેન્ટથી યુકેમાં થોડા સમય માટે કામ કરી રહેલા ભારતીય વ્યાવસાયિકો (પ્રોફેશનલ્સ)ને ઘણી મદદ મળશે અને ભારતીય કંપનીઓની સ્પર્ધાત્મક ક્ષમતા વધશે. આ ક્ષણ આપણા લોકશાહી દેશો વચ્ચેના ભરોસા અને વેપાર, ટેકનોલોજી, રોકાણ તથા ઇનોવેશન પર આધારિત ભવિષ્ય-કેન્દ્રિત ભાગીદારી બનાવવાના આપણા સંકલ્પને દર્શાવે છે. ભારત અને યુકે મળીને સહિયારી સમૃદ્ધિ માટે કામ કરતા રહેશે.
બીજી તરફ, કેન્દ્રીય મંત્રી પિયુશ ગોયલે જણાવ્યું કે પીએમ નરેન્દ્ર મોદીના નેતૃત્વમાં થયેલી આ સમજૂતી, બંને દેશોના દ્વિપક્ષીય સંબંધોમાં એક સીમાચિહ્નરૂપ છે. આનાથી દેશના આશરે 99 ટકા નિકાસને યુકેમાં ઝીરો-ડ્યુટી એક્સેસ (કર-મુક્ત પ્રવેશ) મળશે, જે ભારતની 100 ટકા ટ્રેડ વેલ્યુ (વેપાર મૂલ્ય)ને આવરી લે છે. કેન્દ્રીય મંત્રીના જણાવ્યા અનુસાર, આ વેપાર કરારથી કાપડ, ચામડું, રત્ન અને આભૂષણો, એન્જિનિયરિંગ સામાન, દરિયાઈ ઉત્પાદનો, કેમિકલ્સ, પ્રોસેસ્ડ ફૂડ જેવા ક્ષેત્રોની સાથે-સાથે MSME, ખેડૂતો અને ઉત્પાદકોને નિકાસની મોટી તકો મળશે.