આજના વ્યસ્ત જીવનમાં સવારના સમયે પૌષ્ટિક અને ઝડપી નાસ્તો બનાવવો એક પડકાર હોય છે. ખાસ કરીને ગૃહિણીઓ અને વર્કિંગ પ્રોફેશનલ્સ માટે ‘બ્રેડ ઉપમા’ એક ઉત્તમ વિકલ્પ સાબિત થઈ શકે છે. આ વાનગી માત્ર ઓછા સમયમાં તૈયાર થઈ જાય છે એટલું જ નહીં, પણ ઘરમાં વધેલી બ્રેડનો સદુપયોગ કરવાની પણ આ એક સ્વાદિષ્ટ રીત છે. ડુંગળી, ટામેટા અને મસાલાના મિશ્રણથી બનતી આ ડિશ બાળકોથી લઈને વડીલો સુધી સૌને પસંદ પડે તેવી છે.
- સામગ્રી
બ્રેડ સ્લાઈસ: 6-7 (નાના ટુકડા કરેલા)
ડુંગળી: 1 નંગ (ઝીણી સમારેલી)
ટામેટા: 1 નંગ (સમારેલું)
લીલા મરચાં: 1-2 નંગ
મીઠો લીમડો: 8-10 પાન
રાઈ: અડધી ચમચી
હળદર: પા ચમચી
મીઠું: સ્વાદ મુજબ
તેલ: 2 ચમચી
લીલા ધાણા: સજાવટ માટે
લીંબુનો રસ: 1 ચમચી
- બ્રેડ ઉપમા બનાવવાની રીત
સૌથી પહેલા બ્રેડની સ્લાઈસને નાના-નાના ચોરસ ટુકડામાં કાપી લો. એક કઢાઈમાં તેલ ગરમ કરવા મૂકો અને તેમાં રાઈ નાખો. જ્યારે રાઈ તતડવા લાગે ત્યારે તેમાં મીઠો લીમડો અને ઝીણા સમારેલા લીલા મરચાં ઉમેરો. હવે તેમાં ઝીણી સમારેલી ડુંગળી નાખીને આછી ગુલાબી કે સોનેરી થાય ત્યાં સુધી સાંતળો. ત્યારબાદ સમારેલા ટામેટા ઉમેરો અને તે નરમ થાય ત્યાં સુધી ચઢવા દો. હવે તેમાં હળદર અને સ્વાદ મુજબ મીઠું નાખીને બરાબર મિક્સ કરો. આ મસાલામાં તૈયાર કરેલા બ્રેડના ટુકડા ઉમેરો અને હળવા હાથે બધું મિક્સ કરો. 2-3 મિનિટ સુધી ધીમી આંચ પર થવા દો જેથી મસાલાનો સ્વાદ બ્રેડમાં બરાબર ઉતરી જાય. અંતમાં ગેસ બંધ કરી ઉપરથી લીંબુનો રસ અને તાજા લીલા ધાણા ભભરાવીને ગરમાગરમ સર્વ કરો.
જો તમે આ નાસ્તાને વધુ પૌષ્ટિક બનાવવા માંગતા હોવ, તો તેમાં તમારી પસંદગીના શાકભાજી જેવા કે ગાજર, વટાણા કે કેપ્સિકમ પણ ઉમેરી શકો છો. બ્રેડ ઉપમા એ ઓછા તેલમાં બનતો એક હેલ્ધી અને લાઈટ નાસ્તો છે.