ભારતીય મીઠાઈઓમાં બનારસી સ્વાદનું એક અલગ જ મહત્વ છે. બનારસની ગલીઓમાં પ્રખ્યાત એવી મીઠાઈઓમાં ‘કાજુ મખદમ’નું નામ અગ્રેસર છે. કાજુમાંથી તૈયાર થતી આ મીઠાઈ તેના રિચ, ક્રીમી સ્વાદ અને આકર્ષક દેખાવ માટે જાણીતી છે. લગ્નપ્રસંગો અને ખાસ તહેવારોમાં પીરસવામાં આવતી આ મીઠાઈ બાળકોથી લઈને વૃદ્ધો સુધી સૌની મનપસંદ છે. સારી વાત એ છે કે, તેને બહુ ઓછી સામગ્રી સાથે તમે તમારા રસોડામાં પણ આસાનીથી તૈયાર કરી શકો છો.
- સમગ્રી
કાજુ : 1 કપ (ઝીણો દળેલો પાવડર)
ખાંડ: અડધો કપ
પાણી: 1/4 કપ
ઈલાયચી પાવડર: 1/2 નાની ચમચી
ઘી: 1 ચમચી
કેસર: થોડી કળીઓ (વૈકલ્પિક)
ચાંદીનું વરખ: સજાવટ માટે
- બનાવવાની રીત
સૌ પ્રથમ કાજુને મિક્સરમાં નાખીને બારીક પીસી લો. ખાસ ધ્યાન રાખો કે મિક્સરને સતત ન ચલાવતા અટકાવી-અટકાવીને ચલાવવું, નહીંતર કાજુમાંથી તેલ છૂટું પડી શકે છે. પાવડરને ચાળણીથી ચાળી લેવો જેથી કોઈ કણી ના રહે. એક કડાઈમાં ખાંડ અને પાણી મિક્સ કરી મધ્યમ તાપ પર ગરમ કરવા મૂકો. આ મિશ્રણને ત્યાં સુધી પકાવો જ્યાં સુધી એક તારની ચાસણી તૈયાર ન થઈ જાય. જ્યારે ચાસણી તૈયાર થઈ જાય, ત્યારે તેમાં તૈયાર કરેલો કાજુ પાવડર ધીમે-ધીમે ઉમેરો. આ સમયે સતત હલાવતા રહેવું જેથી મિશ્રણમાં ગાંઠો ન પડે અને તે એકરસ થઈ જાય. હવે તેમાં ઈલાયચી પાવડર અને કેસરની કળીઓ ઉમેરો. જ્યારે મિશ્રણ ઘટ્ટ થવા લાગે અને કડાઈની સપાટી છોડવા માંડે, ત્યારે તેમાં એક ચમચી ઘી ઉમેરી બરાબર મિક્સ કરી લો. એક થાળી અથવા ટ્રેમાં ઘી લગાવીને આ મિશ્રણને એકસરખું ફેલાવી દો. થોડું ઠંડુ થાય એટલે તેના પર ચાંદીનું વરખ લગાવો. હવે તેને બનારસી સ્ટાઈલ મુજબ નાના ગોળ અથવા ડાયમંડ શેપમાં કાપી લો.
તમારા મહેમાનોને પીરસવા માટે તૈયાર છે સ્વાદિષ્ટ ‘કાજુ મખદમ’. આ મીઠાઈ તમે એરટાઈટ ડબ્બામાં ભરીને ઘણા દિવસો સુધી તાજી રાખી શકો છો. આ ઉનાળામાં કે આગામી તહેવારોમાં આ શાહી મીઠાઈ ચોક્કસ ટ્રાય કરજો!