નવી દિલ્હીઃ નવા સંસદભવનના ઉદ્ઘાટન કાર્યક્રમના બહિષ્કારની વિપક્ષે જાહેરાત કરી છે. તેમજ રાષ્ટ્રપતિ મારફતે ઉદ્ઘાટન કરવાની માંગણી કરવામાં આવી રહી છે. દરમિયાન તા. 28મી મેના રોજ નવા સંસદભવનના ઉદ્ઘાટન પ્રસંગ્રે સત્તાના પરિવર્તનનું પ્રતિક ગણાતા સેંગોલનું સંસદભવનમાં સ્થાપન કરવામાં આવશે. હવે કોંગ્રેસે સેંગોલ મુદ્દે વિરોધ શરૂ કર્યો છે. તેમજ દાવો કર્યો છે કે, સેંલોગને સત્તાના હસ્તાંતરણનું પ્રતિક તરીકે વર્ણવવા માટે કોઈ ચોક્કસ દસ્તાવેજી પુરાવો નથી. આ મુદ્દે ફરીથી વિવાદ ઉભો થયો છે. તેમજ ભાજપાએ કોંગ્રેસ ઉપર આકરા પ્રહાર કર્યાં હતા.
કોંગ્રેસે શુક્રવારે દાવો કર્યો હતો કે લોર્ડ માઉન્ટબેટન, સી રાજગોપાલાચારી અને પંડિત જવાહરલાલ નેહરુએ અંગ્રેજો દ્વારા ભારતમાં સત્તાના હસ્તાંતરણના પ્રતીક તરીકે ‘સેપ્ટર’ (સેંગોલ) નો ઉલ્લેખ કર્યો છે તે સાબિત કરવા માટે કોઈ દસ્તાવેજી પુરાવા નથી. પાર્ટીના જનરલ સેક્રેટરી જયરામ રમેશે એવો પણ દાવો કર્યો હતો કે વડાપ્રધાન નરેન્દ્ર મોદી અને ભાજપના નેતાઓ તમિલનાડુમાં રાજકીય હેતુ માટે આ ઔપચારિક ‘રાજદંડ’નો ઉપયોગ કરી રહ્યા છે. ભારતીય જનતા પાર્ટીએ ગુરુવારે આક્ષેપ કર્યો હતો કે કોંગ્રેસે પૂર્વ વડાપ્રધાન જવાહરલાલ નેહરુને ભેટમાં આપેલા પવિત્ર ‘રાજદંડ’ને ‘સોનેરી સળિયા’ તરીકે રાખ્યો હતો અને હિંદુ પરંપરાઓને અવગણીને તેને સંગ્રહાલયમાં રાખ્યો હતો.
કોંગ્રેસના નેતા રમેશે ટ્વીટ કર્યું, “શું નવા સંસદ ભવનને વોટ્સએપ યુનિવર્સિટીની નકલી ચર્ચાઓથી શણગારવામાં આવી રહ્યું છે તે આશ્ચર્યજનક છે? બીજેપી/આરએસએસના ‘મહત્તમ દાવાઓ, ન્યૂનતમ પુરાવા’ ઇતિહાસને વિકૃત કરવાનું વલણ ફરી એકવાર ખુલ્લું પડી ગયું છે.”
તેમણે કહ્યું, “રાજદંડની કલ્પના તત્કાલીન મદ્રાસમાં એક ધાર્મિક સંસ્થા દ્વારા કરવામાં આવી હતી અને તેનું નિર્માણ મદ્રાસ શહેરમાં કરવામાં આવ્યું હતું. તે ઓગસ્ટ 1945માં જવાહરલાલ નેહરુને રજૂ કરવામાં આવ્યું હતું. “તેમણે દાવો કર્યો હતો કે આના કોઈ દસ્તાવેજી પુરાવા નથી. લોર્ડ માઉન્ટબેટન, સી રાજગોપાલાચારી અને પંડિત જવાહરલાલ નેહરુએ ‘રાજદંડ’ને બ્રિટિશ સરકાર દ્વારા ભારતમાં સત્તાના હસ્તાંતરણના પ્રતીક તરીકે વર્ણવ્યું હતું.