આધુનિક ખાનપાનની દુનિયામાં ‘ઓરિગેનો’ એક જાણીતું નામ બની ગયું છે. એક સમય હતો જ્યારે ભારતમાં માત્ર પિઝા સાથે જ ઓરિગેનો ખાવામાં આવતું હતું, પરંતુ હવે ગાર્લિક બ્રેડ, પાસ્તા અને અન્ય ઇટાલિયન વાનગીઓમાં તેનો છૂટથી ઉપયોગ થાય છે. મોટાભાગના લોકો બજારમાંથી તૈયાર ઓરિગેનો ખરીદતા હોય છે, પરંતુ શું તમે જાણો છો કે ઘરે બનાવેલું શુદ્ધ ઓરિગેનો સ્વાસ્થ્ય માટે કેટલું ગુણકારી છે? આયુર્વેદિક દૃષ્ટિકોણથી જોઈએ તો ઓરિગેનો એ માત્ર સ્વાદ વધારનાર મસાલો નથી, પરંતુ અનેક જડીબુટ્ટીઓનું મિશ્રણ છે જે શરીરને અનેક રીતે ફાયદો પહોંચાડે છે.
-
કેવી રીતે બને છે ઓરિગેનો?
ઓરિગેનોનો મુખ્ય ઘટક અજમાના પાન છે. તેને ઘરે બનાવવા માટે અજમાના સૂકા પાન, તુલસીના સૂકા પાન, લસણનો પાવડર, ચીલી ફ્લેક્સ, રોઝમેરી અને મરીનો પાવડર મિક્સ કરવામાં આવે છે. કેટલીક જગ્યાએ ફુદીનાના સૂકા પાન પણ ઉમેરવામાં આવે છે. અજમાના પાન અને અન્ય હર્બ્સને તવા પર થોડી વાર શેકી લો. ત્યારબાદ તેને હળવા હાથે મસળીને પાવડર જેવું બનાવી લો. સ્વાદ માટે તેમાં સંચળ (કાળું મીઠું) પણ ઉમેરી શકાય છે. તમારું હોમમેડ ઓરિગેનો તૈયાર છે!
- ઓરિગેનોથી થતા સ્વાસ્થ્ય લાભો
એન્ટી-ઓક્સિડન્ટ્સથી ભરપૂર: ઓરિગેનોમાં કાર્વાક્રોલ અને થાઈમોલ જેવા શક્તિશાળી એન્ટી-ઓક્સિડન્ટ્સ હોય છે. તે શરીરમાં ફ્રી રેડિકલ્સથી થતા કોષોના નુકસાનને અટકાવે છે. જો તમે ફળો અને શાકભાજી સાથે ઓરિગેનોનું સેવન કરો છો, તો તેના ફાયદા બમણા થઈ જાય છે.
બેક્ટેરિયા સામે લડવામાં સક્ષમ: ઓરિગેનોમાં એન્ટી-બેક્ટેરિયલ ગુણો હોય છે. વૈજ્ઞાનિક અભ્યાસ મુજબ, ઓરિગેનોમાં વપરાતા ઘટકો હાનિકારક બેક્ટેરિયા સામે રક્ષણ આપે છે અને ચેપ ફેલાતો અટકાવે છે.
વાયરલ ઇન્ફેક્શનથી બચાવ: ઓરિગેનોમાં રહેલા કાર્વાક્રોલ અને થાઈમોલ એન્ટી-વાયરલ ગુણો પણ ધરાવે છે. તે શરદી, ઉધરસ, ઝાડા, ઉબકા અને પેટના દુખાવામાં કુદરતી રાહત આપે છે.
સોજા ઘટાડવામાં મદદરૂપ: શરીરમાં આંતરિક સોજાને કારણે હૃદય રોગ, ડાયાબિટીસ અને અન્ય ગંભીર બીમારીઓ થઈ શકે છે. ઓરિગેનોમાં રહેલા તત્વો ફ્રી રેડિકલ્સને ન્યુટ્રલાઈઝ કરે છે, જેનાથી સોજાની સમસ્યામાં ઘટાડો થાય છે.
વિટામિન-કે નો સ્ત્રોત: માત્ર એક નાની ચમચી સૂકા ઓરિગેનોમાંથી શરીરને જરૂરી એવા વિટામિન-કે ના દૈનિક મૂલ્યના 5 થી 7 ટકા હિસ્સો મળી રહે છે, જે હાડકાના સ્વાસ્થ્ય માટે મહત્વપૂર્ણ છે.
બજારમાં મળતા પેકેટ્સમાં પ્રિઝર્વેટિવ્સ હોઈ શકે છે, તેથી ઘરે શુદ્ધ રીતે બનાવેલું ઓરિગેનો વાપરવું એ વધુ સારો વિકલ્પ છે. તે તમારી વાનગીનો સ્વાદ તો વધારશે જ, સાથે સાથે તમારી રોગપ્રતિકારક શક્તિને પણ મજબૂત બનાવશે.