નવી દિલ્હી, 14 માર્ચ 2026: પ્રધાનમંત્રી નરેન્દ્ર મોદીએ આજે આસામના સિલચરથી 23,550 કરોડ રૂપિયાના વિવિધ વિકાસ પ્રોજેક્ટ્સનો શુભારંભ કરાવ્યો. મોદીએ સિલચરના અંબિકાપુરમાં ત્રણ પ્રોજેક્ટ્સનો શિલાન્યાસ કર્યો. આ પ્રોજેક્ટ્સમાં સિલચર હાઇ-સ્પીડ કોરિડોર, જેનો અંદાજિત ખર્ચ 22,864 કરોડ, સિલચર ટાઉન ફ્લાયઓવર, જેનો અંદાજિત ખર્ચ 565 કરોડ અને પથરકાંડી એગ્રીકલ્ચરલ કોલેજ, જેનો અંદાજિત ખર્ચ 122 કરોડ છે, તેનો સમાવેશ થાય છે.
આ પ્રસંગે બોલતા મોદીએ કહ્યું કે આસામની બરાક ખીણ ભારતને દક્ષિણપૂર્વ એશિયા સાથે જોડતા એક મહત્વપૂર્ણ પુલ તરીકે ઉભરી રહી છે. તેમણે કોંગ્રેસ સરકાર પર આઝાદી પછી દાયકાઓ સુધી આ પ્રદેશની અવગણના કરવાનો આરોપ મૂક્યો. તેમણે કહ્યું કે ઉત્તરપૂર્વ હવે ભારતની એક્ટ ઇસ્ટ નીતિનું નેતૃત્વ કરી રહ્યું છે.
સિલચરમાં એક જાહેર રેલીને સંબોધતા પ્રધાનમંત્રીએ કહ્યું કે બરાક ખીણ એક સમયે એક મહત્વપૂર્ણ વેપાર કેન્દ્ર હતું, પરંતુ કોંગ્રેસના શાસન દરમિયાન લેવામાં આવેલા નિર્ણયોને કારણે તેનું વ્યૂહાત્મક મહત્વ ગુમાવી દીધું. તેમણે આરોપ લગાવ્યો કે દાયકાઓ સુધી દેશ અને રાજ્ય પર શાસન કરવા છતાં, કોંગ્રેસ બરાક ખીણના વિકાસ પર ધ્યાન કેન્દ્રિત કરવામાં નિષ્ફળ ગઈ.
ઇન્ફ્રાસ્ટ્રક્ચર વિકાસ પર ભાર મૂકતા, પ્રધાનમંત્રી મોદીએ કહ્યું કે સિલચર-શિલોંગ હાઇ-સ્પીડ કોરિડોર માટે શિલાન્યાસ સાથે એક ઐતિહાસિક પગલું ભરવામાં આવ્યું છે. આ પ્રોજેક્ટ ઉત્તરપૂર્વમાં પ્રથમ એક્સેસ-કંટ્રોલ્ડ હાઇ-સ્પીડ એક્સપ્રેસવે હશે. તેમણે કહ્યું કે આશરે 22,860 કરોડના રોકાણથી બનેલ આ 166 કિલોમીટર લાંબો કોરિડોર મેઘાલય અને આસામ વચ્ચે જોડાણમાં સુધારો કરશે.
ધાનમંત્રીએ કહ્યું કે આ પ્રોજેક્ટ ગુવાહાટી અને સિલચર વચ્ચેનું અંતર ઘટાડશે, જેનાથી મુસાફરી પાંચ કલાકની થઈ જશે. આનાથી આ ક્ષેત્રમાં આર્થિક વિકાસ અને સરહદ પાર વેપારને વેગ મળશે.
મોદીએ જણાવ્યું હતું કે રાષ્ટ્રીય ધોરીમાર્ગ 306 પર કેપિટલ પોઈન્ટ નજીક ટ્રંક રોડથી સિલચરમાં રંગીરખારી પોઈન્ટ સુધીના એલિવેટેડ કોરિડોરનો પ્રથમ તબક્કો સિલચરના સૌથી વ્યસ્ત માર્ગ પર ટ્રાફિકની ભીડ ઘટાડશે. આ કોરિડોર મિઝોરમ, ત્રિપુરા અને મણિપુર જેવા પડોશી રાજ્યો સાથે વધુ સારી કનેક્ટિવિટી પ્રદાન કરશે અને બરાક ખીણના આર્થિક વિકાસમાં ફાળો આપશે.
પ્રધાનમંત્રીએ કરીમગંજ જિલ્લાના પથરકાન્ડી ખાતે એક નવી કૃષિ કોલેજનો શિલાન્યાસ પણ કર્યો. આ સંસ્થા આસામમાં કૃષિ શિક્ષણ અને સંશોધન ઇકોસિસ્ટમને મજબૂત બનાવશે અને બરાક ખીણ અને આસપાસના વિસ્તારોમાં ઉચ્ચ ગુણવત્તાનું કૃષિ શિક્ષણ પ્રદાન કરશે.
વિશ્વભરમાં યુદ્ધની વર્તમાન પરિસ્થિતિ અંગે પ્રધાનમંત્રીએ જણાવ્યું હતું કે ભાજપ સરકાર દેશના નાગરિકોને ઓછામાં ઓછી મુશ્કેલીઓનો સામનો કરવો પડે તે સુનિશ્ચિત કરવા માટે તમામ પ્રયાસો કરી રહી છે. તેમણે જણાવ્યું હતું કે સરકારનો ઉદ્દેશ્ય દેશના નાગરિકો પર આ યુદ્ધની અસર ઓછામાં ઓછી કરવાનો છે.
વધુ વાંચો: શિવાલિક પછી નંદા દેવી…ભારતનું બીજું LPG ભરેલું જહાજ હોર્મુઝથી સુરક્ષિત પસાર થયું