નવી દિલ્હી, 14 માર્ચ 2026: દેશના વિવિધ ભાગોમાં ઉત્તર-પૂર્વ ભારતના વિદ્યાર્થીઓ સાથે થતી હિંસા અને ભેદભાવની ઘટનાઓ વચ્ચે કોંગ્રેસ નેતા રાહુલ ગાંધીએ એક નવી પહેલ કરી છે. રાહુલ ગાંધી હવે નોર્થ ઈસ્ટના વિદ્યાર્થીઓને આત્મરક્ષા માટે માર્શલ આર્ટ્સની ટ્રેનિંગ આપવા જઈ રહ્યા છે. આ તાલીમ સત્રનો મુખ્ય હેતુ વિદ્યાર્થીઓને શારીરિક રીતે સક્ષમ બનાવવાની સાથે તેમનામાં એવો આત્મવિશ્વાસ જગાડવાનો છે કે તેઓ કોઈપણ વિપરીત પરિસ્થિતિમાં પોતાની સુરક્ષા જાતે કરી શકે.
ખૂબ ઓછા લોકો જાણે છે કે રાહુલ ગાંધી જાપાનીઝ માર્શલ આર્ટ્સ ‘એકિડો’ માં બ્લેક બેલ્ટ ધરાવે છે. એકિડો એ આત્મરક્ષણ અને સંતુલન પર આધારિત પરંપરાગત કળા છે, જેમાં હરીફની તાકાતનો ઉપયોગ તેની જ વિરુદ્ધ કરવાની ટેકનિક શીખવવામાં આવે છે. આ કાર્યક્રમ દરમિયાન રાહુલ ગાંધી વિદ્યાર્થીઓને માર્શલ આર્ટ્સની પાયાની જરૂરિયાતો શીખવશે અને તેમની સાથે સીધો સંવાદ પણ કરશે. આ દરમિયાન વિદ્યાર્થીઓ સાથે થતા અન્યાય અને નોર્થ ઈસ્ટના યુવાનોના પ્રશ્નો પર પણ ચર્ચા થવાની શક્યતા છે.
આ કાર્યક્રમ માત્ર શારીરિક તાલીમ પૂરતો મર્યાદિત નથી, પરંતુ તેની પાછળ એક મોટો સામાજિક સંદેશ છુપાયેલો છે. કોંગ્રેસ પાર્ટીનું માનવું છે કે દેશના કોઈપણ ખૂણેથી આવતા વિદ્યાર્થીઓને અન્ય રાજ્યોમાં સુરક્ષિત અને સન્માનજનક વાતાવરણ મળવું જોઈએ. રાહુલ ગાંધી આ પહેલ દ્વારા ઉત્તર-પૂર્વના યુવાનો સાથે એકતા પ્રદર્શિત કરવા માંગે છે.
અત્રે ઉલ્લેખનીય છે કે, ગત 27 ફેબ્રુઆરીએ પણ રાહુલ ગાંધીએ નોર્થ ઈસ્ટના 18 વિદ્યાર્થીઓના પ્રતિનિધિમંડળ સાથે મુલાકાત કરી હતી. તે બેઠકમાં વિદ્યાર્થીઓએ તેમની સાથે થતા ભેદભાવ અને હિંસાની ચિંતાઓ વ્યક્ત કરી હતી. તે સમયે રાહુલ ગાંધીએ ખાતરી આપી હતી કે તેઓ આ વિદ્યાર્થીઓની સુરક્ષા અને સન્માનનો મુદ્દો સતત ઉઠાવતા રહેશે. હવે માર્શલ આર્ટ્સ ટ્રેનિંગ દ્વારા તેઓ આ વચનને અમલમાં મૂકી રહ્યા છે.
આ પણ વાંચોઃ ઈરાનના નવા સુપ્રીમ લીડર મોજતબા ખામેનેઈ વિશે માહિતી આપનારને મળશે 1 કરોડ ડોલરનું ઈનામ