નવી દિલ્હીઃ દેશમાં આગામી દિવસોમાં 150 કિમી પ્રતિકલાકથી ઝડપથી દોડતી વંદે ભારતને પાટા ઉપર દોડાવવાની કવાયત શરૂ કરવામાં આવી છે. દરમિયાન દેશની પ્રથમ સેમી હાઈસ્પીડ વદે ભારત ટ્રેન કોટા પહોંચી હતી. કોટા રેલવે ડિવિઝનમાં આ ટ્રેનની ટ્રાયલ શરૂ થશે. કોટા-નાગદા સેક્શનમાં ટ્રેનની ટ્રાયલ 6 સપ્ટેમ્બર સુધી ચાલશે, જો સફળ થશે તો ટ્રેનની ટ્રાયલ પહેલા પણ સમાપ્ત થઈ શકે છે.
સુત્રોના જણાવ્યા અનુસાર ટ્રાયલ દરમિયાન, ટ્રેનને 115 કિમી/કલાકની ઝડપે ચલાવવામાં આવશે અને પછી ધીમે-ધીમે તેની સ્પીડને મહત્તમ 180 કિમી પ્રતિ કલાક સુધી વધારવામાં આવશે. આમ વંદે ભારત ટ્રેન હવાની રફતાર સાથે રેસ લગાવવાની દિશામાં આગળ વધી રહી છે.
સુત્રોના જણાવ્યા અનુસાર ટ્રાયલ દરમિયાન માત્ર ખાલી કોચ ચલાવવામાં આવશે. ત્યારપછી ટ્રેનમાં મુસાફરોના વજનને બરાબર રાખીને તેનું ટ્રાયલ કરવામાં આવશે. ટ્રેનની સાથે RDSOના 20 અધિકારીઓ અને કર્મચારીઓ પણ કોટા પહોંચી ગયા હતા. ટ્રાયલ પૂર્ણ થયા બાદ ભોપાલ રેલવે ડિવિઝનના મુસાફરોને આ સુવિધા મળશે.
ભોપાલ અને કોટા બંને રેલ્વે વિભાગ પશ્ચિમ મધ્ય રેલ્વે હેઠળ આવે છે. આ ટ્રેન દોડ્યા બાદ મુસાફરો ઓછા સમયમાં લાંબુ અંતર કાપી શકશે. ક્વોટા બાદ વંદે ભારત ટ્રેનને ભોપાલ રેલવે ડિવિઝનમાં પણ ટ્રાયલ કરવામાં આવશે, જેની તૈયારીઓ શરૂ કરી દેવામાં આવી છે. ભોપાલ સેલ ડિવિઝનને બે વંદે ભારત રેક મળવાના છે, જોકે રેક મેળવવામાં એક વર્ષ લાગી શકે છે.
રેલવે મંત્રી અશ્વિની વૈષ્ણવે એપ્રિલ 2022માં તેમના ખજુરાહો પ્રવાસ દરમિયાન વંદે ભારત ટ્રેન ચલાવવાની વાત કરી હતી. રાજસ્થાન, ભોપાલ ઉપરાંત રાણી કમલાપતિ સ્ટેશન અને દિલ્હી વચ્ચે વંદે ભારત ટ્રેન ચલાવવા પર પણ વિચાર કરવામાં આવી રહ્યો છે. આ ઉપરાંત અમદાવાદ-દિલ્હી રૂટ પર વંદે ભારત ટ્રેન પણ શરૂ કરી શકાશે. આમ દેશમાં 75 વંદે ભારત ટ્રેન ચલાવવાનું લક્ષ્ય છે.