આજની ભાગદોડભરી જિંદગીમાં આપણે આપણા ચહેરાને ચમકાવવા પાછળ હજારો રૂપિયા ખર્ચીએ છીએ, પરંતુ શરીરનો આખો ભાર ઉંચકતા પગની કાળજી લેવાનું સાવ ભૂલી જઈએ છીએ. નિષ્ણાતોના મતે, પગની અવગણના માત્ર સુંદરતા જ નહીં પણ શારીરિક સ્વાસ્થ્ય પર પણ ગંભીર અસર કરે છે. જો તમે બ્યુટી પાર્લરના મોંઘા પેડિક્યોરથી બચવા માંગતા હોવ, તો રાત્રે સૂતા પહેલા માત્ર 15 મિનિટનો આ ઘરેલુ ઉપાય તમારા માટે જાદુઈ સાબિત થઈ શકે છે. પગની યોગ્ય સંભાળ રાખવાથી માત્ર થાક જ દૂર નથી થતો, પરંતુ રાત્રે ઊંઘની ગુણવત્તામાં પણ મોટો સુધારો જોવા મળે છે. સારી ઊંઘ ગંભીર રોગો સામે લડવામાં મદદરૂપ થાય છે. ચાલો જાણીએ બ્યુટી પાર્લર ગયા વગર ઘરે જ પગને સુંદર અને મુલાયમ બનાવવાની રીત:
- હોટ વોટર થેરાપી અને સિંધવ મીઠું
રાત્રે એક ટબમાં હૂંફાળું ગરમ પાણી ભરો અને તેમાં તમારા પગને 10-15 મિનિટ સુધી પલાળી રાખો. આ પાણીમાં થોડું સિંધવ મીઠું ઉમેરો. તે સ્નાયુઓને રિલેક્સ કરે છે, શરીરમાં રક્ત પરિભ્રમણ વધારે છે અને સાંધાના દુખાવામાં તાત્કાલિક રાહત આપે છે.
- એક્સ્ટ્રા વર્જિન ઓલિવ ઓઈલથી માલિશ
પગ પલાળ્યા પછી તેને નરમ ટુવાલથી કોરા કરી લો. હવે થોડું ઓલિવ ઓઈલ લો અને હથેળીમાં ઘસીને ગરમ કરો. આંગળીઓથી ઉપરથી નીચે તરફ હળવા હાથે મસાજ કરો. અંગૂઠાની વચ્ચે આંગળીઓ ફેરવો અને એડીને ગોળ-ગોળ ફેરવીને હળવું દબાણ આપો. તેલ ત્વચાને ઊંડાણપૂર્વક પોષણ આપે છે, જેનાથી ફાટેલી એડીઓ મટે છે અને ત્વચા બાળકની જેમ મુલાયમ બને છે.
- એક્યુપ્રેશરનો લાભ
પગના તળિયાના મધ્ય ભાગને થોડીવાર માટે દબાવો. આ એક્યુપ્રેશર પોઈન્ટ દબાવવાથી માનસિક તણાવ ઓછો થાય છે અને આખા શરીરના જ્ઞાનતંતુઓને આરામ મળે છે.
આ સરળ અને સસ્તો ઉપાય અજમાવીને તમે પાર્લર જેવી મોંઘી ટ્રીટમેન્ટ ઘરે જ મેળવી શકશો. તમારા સમય મુજબ આ કાળજી લેવાથી તમારા પગ સુંદર તો દેખાશે જ, સાથે તમે દિવસભર તાજગીનો અનુભવ પણ કરશો.