નવી દિલ્હીઃ સુપ્રીમ કોર્ટે જમ્મુ અને કાશ્મીરમાં વિધાનસભા સીટોના સીમાંકનને સમર્થન આપ્યું છે. આ પ્રક્રિયાને પડકારતી અરજી કોર્ટે ફગાવી દીધી છે. કોર્ટે એમ પણ કહ્યું કે, કલમ 370ને નિષ્ક્રિય કર્યા પછી જમ્મુ-કાશ્મીર અને લદ્દાખના પુનર્ગઠનનો મુદ્દો તેની સાથે પેન્ડિંગ છે. તેમણે આ સુનાવણીમાં આ પાસાને ધ્યાનમાં લીધો નથી.
શ્રીનગરના રહેવાસી હાજી અબ્દુલ ગની ખાન અને મોહમ્મદ અયુબ મટ્ટુની અરજીમાં કહેવામાં આવ્યું હતું કે, સીમાંકનમાં યોગ્ય પ્રક્રિયાનું પાલન કરવામાં આવ્યું નથી. કેન્દ્ર સરકાર, જમ્મુ-કાશ્મીર પ્રશાસન અને ચૂંટણી પંચે આ દલીલને ખોટી ગણાવી હતી. 13 મે 2022ના રોજ સુપ્રીમ કોર્ટે આ મામલે નોટિસ પાઠવી હતી. કોર્ટે સ્પષ્ટ કર્યું હતું કે, સુનાવણી સીમાંકન પર જ થશે. જમ્મુ-કાશ્મીરમાંથી કલમ 370 હટાવવા સંબંધિત મુદ્દા પર વિચાર કરવામાં આવશે નહીં.
ગયા વર્ષે 1 ડિસેમ્બરે જસ્ટિસ સંજય કિશન કૌલ અને અભય એસ ઓકાની બેન્ચે ચુકાદો અનામત રાખ્યો હતો. સુનાવણી દરમિયાન, અરજદાર પક્ષે દલીલ કરી હતી કે, જમ્મુ અને કાશ્મીરમાં વિધાનસભા સીટોના સીમાંકન માટે સુપ્રીમ કોર્ટના ભૂતપૂર્વ ન્યાયાધીશ જસ્ટિસ રંજના દેસાઈના નેતૃત્વ હેઠળના પંચની રચના બંધારણીય જોગવાઈઓ અનુસાર યોગ્ય નથી.
અરજદારોએ એવી પણ દલીલ કરી હતી કે, સીમાંકનમાં વિધાનસભા ક્ષેત્રોની સીમાઓ બદલવામાં આવી છે. તેમાં નવા વિસ્તારોનો સમાવેશ કરવામાં આવ્યો છે. સીટોની સંખ્યા 107 થી વધારીને 114 કરવામાં આવી છે, જેમાં પાકિસ્તાન અધિકૃત કાશ્મીરની 24 સીટોનો સમાવેશ થાય છે. આ જમ્મુ અને કાશ્મીર પુનર્ગઠન અધિનિયમની કલમ 63 અનુસાર નથી.
કેન્દ્ર સરકાર વતી સોલિસિટર જનરલ તુષાર મહેતાએ કહ્યું હતું કે, બંધારણના અનુચ્છેદ 2, 3 અને 4 હેઠળ સંસદને દેશમાં નવા રાજ્ય અથવા વહીવટી એકમની રચના અને વ્યવસ્થા સાથે સંબંધિત કાયદા બનાવવાની સત્તા આપવામાં આવી છે. આ અંતર્ગત અગાઉ પણ સીમાંકન પંચની રચના કરવામાં આવી છે. આ સિવાય અરજદારનું એ કહેવું પણ ખોટું છે કે, સીમાંકન માત્ર જમ્મુ-કાશ્મીરમાં જ લાગુ કરવામાં આવ્યું છે. આસામ, અરુણાચલ પ્રદેશ, મણિપુર અને નાગાલેન્ડ માટે પણ તેની શરૂઆત કરવામાં આવી છે.