કોસ્ટ ગાર્ડ નોર્થવેસ્ટ કમાન્ડની બે દિવસની કોન્ફરન્સનું ગાંધીનગરમાં સમાપન

ગાંધીનગર, 18 એપ્રિલ, 2026 – કોસ્ટ ગાર્ડ નોર્થવેસ્ટ કમાન્ડની બે દિવસની કોન્ફરન્સનું ગાંધીનગરમાં સમાપન થયું છે. ગાંધીનગરસ્થિત કોસ્ટ ગાર્ડ રિજનલ હેડક્વાર્ટર (નોર્થ વેસ્ટ) ખાતે Inspector General ટેકુર શશિ કુમાર, TM, કમાન્ડર કોસ્ટ ગાર્ડ રિજન (નોર્થ વેસ્ટ) ના અધ્યક્ષપદ હેઠળ 17-18 એપ્રિલ 26 દરમિયાન XIXમી ડિસ્ટ્રિક્ટ એન્ડ સ્ટેશન કમાન્ડર્સ અને XVIમી રિજનલ વર્ક્સ કોન્ફરન્સ 2026 યોજાઈ હતી.

બે દિવસીય આ કોન્ફરન્સમાં રિજનના ડિસ્ટ્રિક્ટ અને સ્ટેશન કમાન્ડર્સ, સુપરિન્ટેન્ડન્ટ્સ અને ઓફિસર-ઇન-ચાર્જ એકત્રિત થયા હતા. આ બેઠકનો મુખ્ય હેતુ રિજનના જવાબદારી હેઠળના વિસ્તાર (AoR) માં ઓપરેશનલ સજ્જતા, માનવ સંસાધન વ્યવસ્થાપન, ઈન્ફ્રાસ્ટ્રક્ચર વિકાસ અને તકનીકી ક્ષમતાઓની સમીક્ષા અને તેને મજબૂત કરવાનો હતો.

આ પણ વાંચોઃ ચૂંટણી પંચનો સપાટો: તમિલનાડુ અને પશ્ચિમ બંગાળમાં રૂ.865 કરોડથી વધુની મિલકત જપ્ત

પ્રાદેશિક કમાન્ડરે તેમના સંબોધનમાં ભારતના દરિયાઈ સીમાઓની સુરક્ષામાં આ વ્યૂહાત્મક રિજનના તમામ જવાનો દ્વારા દર્શાવવામાં આવેલા વ્યાવસાયિક અભિગમ, સમર્પણ અને ઉત્કૃષ્ટ કાર્યશૈલીની પ્રશંસા કરી હતી. તેમણે રિજનની ઓપરેશનલ તૈયારીઓ, ટેકનિકલ મેનેજમેન્ટ અને ઈન્ફ્રાસ્ટ્રક્ચર વિકાસની પહેલોની સમીક્ષા કરી હતી. પ્રાદેશિક હેડક્વાર્ટર પોતાની ક્ષમતાઓ, તકનીકી ધાર અને ઓપરેશનલ પહોંચને વધુ મજબૂત કરવા માટે પ્રતિબદ્ધ હોવાનું તેમણે પુનરોચ્ચાર કર્યો હતો.

કોન્ફરન્સમાં નવા વિચારો, ઉભરતા વ્યાવસાયિક પડકારો અને અનુભવોનું આદાન-પ્રદાન કરવામાં આવ્યું હતું, જેનો સામૂહિક હેતુ ઇન્ડિયન કોસ્ટ ગાર્ડના ચાર્ટરના અસરકારક અમલીકરણ અને પ્રાદેશિક ઈન્ફ્રાસ્ટ્રક્ચરના વિકાસ માટે મજબૂત રોડમેપ તૈયાર કરવાનો હતો. ફ્લેગ ઓફિસર દ્વારા તમામ રેન્કના જવાનોમાં સતત તાલીમ, શારીરિક તંદુરસ્તી અને માનસિક સુખાકારી પર ભાર મૂકવામાં આવ્યો હતો. સાથે જ, માનવબળ અને સામગ્રીની સુરક્ષાને સર્વોપરી રાખીને ફરજો પ્રત્યે નવીન અભિગમ કેળવવા પર ખાસ ભાર મૂક્યો હતો.

આ કોન્ફરન્સ સુરક્ષિત અને સ્થિર દરિયાઈ ક્ષેત્રના રાષ્ટ્રીય વિઝનને અનુરૂપ, દરિયાઈ સુરક્ષા અને પર્યાવરણના રક્ષણને સુનિશ્ચિત કરવામાં CGRHQ (NW)ની મહત્ત્વની ભૂમિકા દર્શાવે છે. પ્રાદેશિક સુરક્ષાના માળખામાં તમામ અધિકારીઓ મજબૂતીથી ઊભા રહીને દેશની રક્ષા માટે નવી ઊર્જા સાથે કાર્યરત રહે તેવો સંકલ્પ વ્યક્ત કરવામાં આવ્યો હતો. કોઈપણ ગેરકાયદે ઘૂસણખોરી કે ગુનાઈત પ્રવૃત્તિને ડામવા માટે કોસ્ટ ગાર્ડ સજ્જ છે.