જાન્યુઆરી મહિનામાં ભારતના ઘણા રાજ્યોમાં વિવિધ પ્રકારના ઉત્સવોનું આયોજન કરવામાં આવે છે. જેમાં દુનિયાભરમાંથી પ્રવાસીઓ આવે છે અને આ વખતે જાન્યુઆરીમાં બે લોંગ વીકેન્ડ પણ ઉપલબ્ધ છે. તેનો અર્થ, આ મહિનો પ્રવાસ કરનારાઓ માટે સુવર્ણ તક સમાન છે. જો તમે આ મહિનામાં ક્યાં જવાનું પ્લાનિંગ કરી રહ્યા છો, અને સ્થળપસંદ કરવામાં મૂંઝવણ અનુભવો છો, તો તમે ભારતમાં આ તહેવારોની મુલાકાત લેવાનું આયોજન કરી શકો છો. જ્યાં તમે ફરવાની મજા માણી શકો છો.
- રણ ઉત્સવ, ગુજરાત
રણ ઉત્સવ એક અદ્ભુત મહોત્સવ છે જે ત્રણ મહિના સુધી ચાલે છે. આ ફરવા અને આનંદ માણવા માટે એક ઉત્તમ સ્થળ છે. આ ઉત્સવમાં ભાગ લઈને તમે ગુજરાતની પ્રાચીન સંસ્કૃતિને નજીકથી જોઈ શકશો. ઉત્સવમાં રજુ થયેલ ગુજરાતી લોકનૃત્ય અને સંગીત ખૂબ જ વિશિષ્ટ છે. જો તમે ખાવાના શોખીન છો, તો અહીં આવીને તમે ગુજરાતના સ્વાદિષ્ટ વ્યંજનોના આનંદ લઈ શકો છો. પૂર્ણ ચંદ્ર દરમિયાન અહીં મુલાકાત લેવાનું આયોજન શ્રેષ્ઠ રહેશે. જ્યારે સફેદ રણ પર ચાંદનીની રોશની પડે છે ત્યારે તે જોવાનું અદ્ભુત નજારો હોય છે. અહીં આવવાની અને તંબુમાં રહેવાની તક ગુમાવશો નહીં. અહીં સુંદર હસ્તકલાની પણ ખરીદી કરી શકો છો.
- ઈન્ટરનેશનલ કાઈટ ફ્લાઈંગ ફેસ્ટિવલ, ગુજરાત
આકાશમાં અનેક રંગબેરંગી પતંગો જોવાનો પણ ઘણો આનંદ છે. મકર સંક્રાંતિ નિમિત્તે ગુજરાતમાં આંતરરાષ્ટ્રીય પતંગ મહોત્સવનું આયોજન કરવામાં આવ્યું છે. જેમાં વિશ્વભરમાંથી પતંગબાજો આવીને પોતાની કળાનું પ્રદર્શન કરે છે. આ તહેવાર સવારે સૂર્યોદયથી શરૂ થાય છે અને સૂર્યાસ્ત સુધી ચાલુ રહે છે. પતંગ ઉડાડવા ઉપરાંત, આ ફેસ્ટિવલમાં એરિયલ એક્રોબેટ્સ, કાઈટ મેકિંગ, કાઈટ પેઈન્ટીંગ અને બીજી ઘણી બધી મનોરંજક સ્પર્ધાઓનું આયોજન થાય છે.
- જયપુર લિટરેચર ફેસ્ટિવલ, રાજસ્થાન
દર વર્ષે જાન્યુઆરી મહિનામાં જયપુરમાં સાહિત્ય ઉત્સવનું આયોજન કરવામાં આવે છે, જેમાં જાણીતા લેખકો અને વક્તાઓ ભાગ લે છે. જો તમને સાહિત્યમાં રસ હોય તો તમારે આ ફેસ્ટિવલમાં અવશ્ય હાજરી આપવી કારણ કે અહીં તમને ઘણા લેખકોની સિદ્ધિઓ વિશે જાણવાનો મોકો મળશે.
- બિકાનેર કેમલ ફેસ્ટિવલ, રાજસ્થાન
તમે જાન્યુઆરીમાં બિકાનેર કેમલ ફેસ્ટિવલની મુલાકાત લઈને પણ મજા માણી શકો છો. જ્યાં ઊંટોને અલગ-અલગ રીતે શણગારવામાં આવે છે. તેમની રેસ થાય છે અને તેમને ડાન્સ કરતા પણ જોઈ શકાય છે. જે ખૂબ જ ખાસ છે. આ સાથે, તમે લોકોને આગ સાથે કરતબ કરતા અને રાજસ્થાની લોક કલાકારોનું પ્રદર્શન પણ જોઈ શકો છો.
- મદ્રાસ મ્યુઝિક ફેસ્ટિવલ, તમિલનાડુ
મદ્રાસ મ્યુઝિક ફેસ્ટિવલ એ ભારતનો સૌથી મોટો સંગીત ઉત્સવ છે. જ્યાં સંગીતની સાથે સાથે શાસ્ત્રીય નૃત્ય અને અન્ય કલાઓ પણ જોવાનો મોકો મળે છે. ભારતના દરેક ખૂણેથી કલાકારો આ ઉત્સવમાં ભાગ લેવા આવે છે, જેમનું પ્રદર્શન આશ્ચર્યજનક છે.
- પોંગલ, તમિલનાડુ
પોંગલ એ કૃષિ સંબંધિત તહેવાર છે જેના દ્વારા પ્રકૃતિનો આભાર માનવામાં આવે છે. આ પ્રસંગે, લોકો તેમના ઘરોને રંગોળીથી શણગારે છે, વિવિધ પ્રકારની વાનગીઓ તૈયાર કરે છે અને નૃત્ય અને ગીતો સાથે પોંગલની ઉજવણી કરે છે. તમે જાન્યુઆરીમાં અહીં આવવાનો પ્લાન પણ બનાવી શકો છો.
- અરાકુ બલૂન ફેસ્ટિવલ, આંધ્ર પ્રદેશ
આ ફેસ્ટિવલનું આયોજન આંધ્રપ્રદેશ ટુરીઝમ દ્વારા કરવામાં આવ્યું છે. જેમાં હોટ એર બલૂન રાઈડ ખાસ છે. તમે હોટ એર બલૂન રાઈડ દ્વારા અહીં સુંદર નજારો જોઈ શકો છો. તમે રાત્રે કેમ્પિંગ કરી શકો છો અને કોફી પ્લાન્ટેશન ટૂર પણ કરી શકો છો.