જ્યારે વજન ઘટાડવાની વાત આવે છે, ત્યારે સૌથી મોટો પડકાર જીમ જવું નહીં, પરંતુ પોતાની ભૂખ પર નિયંત્રણ રાખવું છે. અવારનવાર એવું જોવા મળે છે કે લોકો સવારનો બ્રેકફાસ્ટ અને બપોરનું લંચ તો હેલ્ધી રીતે મેનેજ કરી લે છે, પરંતુ સાંજ પડતાં જ ભૂખ લાગતા કચોરી, સમોસા, વેફર્સ કે બિસ્કિટ ખાવા તરફ વળે છે. સાંજની આ ક્રેવિંગ્સ (તીવ્ર ઈચ્છા) અવારનવાર આખા ડાયેટ પ્લાનને બગાડી નાખે છે.
જો તમે પણ દર સાંજે લાગતી આ ભૂખથી પરેશાન છો, પરંતુ વજન વધવા દેવા નથી માંગતા, તો તમારે ભૂખ્યા રહેવાની બિલકુલ જરૂર નથી. તમારે માત્ર તમારા અનહેલ્ધી સ્નેક્સને કેટલાક ટેસ્ટી અને લો-કેલરી ઓપ્શન્સ સાથે રિપ્લેસ કરવા પડશે. ચાલો જાણીએ એવા કેટલાક બેસ્ટ ઇવનિંગ સ્નેક્સ વિશે, જે સ્વાદિષ્ટ હોવાની સાથે વજન ઘટાડવાની જર્નીને પણ પાટા પર રાખશે.
-
શેકેલા મખાના: ટેસ્ટ અને હેલ્થનું પરફેક્ટ કોમ્બિનેશન
જ્યારે સાંજે કંઈક ક્રંચી કે ક્રિસ્પી ખાવાનું મન થાય ત્યારે મખાના સૌથી બેસ્ટ ઓપ્શન છે. મખાનામાં કેલરી ખૂબ ઓછી હોય છે અને ફાઈબર ભરપૂર માત્રામાં હોય છે, જેનાથી પેટ લાંબા સમય સુધી ભરેલું રહે છે. તેને તૈયાર કરવા માટે એક કડાઈમાં સહેજ ઘી લઈને (અથવા ઘી વગર પણ) મખાનાને શેકી લો. ત્યારબાદ તેમાં થોડું સિંધવ મીઠું (રોક સોલ્ટ), હળદર અને મરી પાવડર મિક્સ કરો. સાંજની ચા સાથે આ એક અદભુત અને હલકો નાસ્તો બનશે.
- સ્પ્રાઉટ્સ ચાટ: પ્રોટીનનો પાવરહાઉસ
જો તમને સાંજના સમયે કંઈક ચટાકેદાર અને તીખું ખાવાની આદત હોય, તો મણકાવેલા કઠોળ (સ્પ્રાઉટ્સ) ની ચાટ તમારા માટે બેસ્ટ છે. ફણગાવેલા મગ અને ચણામાં ઝીણી સમારેલી ડુંગળી, ટામેટા, કાકડી અને લીલા મરચા ઉમેરો. ઉપરથી થોડો લીંબુનો રસ અને ચાટ મસાલો ભભરાવો. આ સ્નેક માત્ર લો-કેલરી જ નથી, પરંતુ તેમાં પ્રોટીનનું પ્રમાણ ખૂબ વધારે હોય છે, જે મસલ્સને મજબૂત રાખવામાં અને વજન ઘટાડવામાં મદદ કરે છે.
-
શેકેલા ચણા: આપશે ઇન્સ્ટન્ટ એનર્જી
ઓફિસમાં કામ કરતી વખતે કે મુસાફરી દરમિયાન શેકેલા ચણા ખાવા એ સૌથી સરળ અને હેલ્ધી ઉપાય છે. ચણામાં ફાઈબર અને પ્રોટીન બંને ભરપૂર માત્રામાં હોય છે, જે બ્લડ શુગર લેવલને અચાનક વધવા દેતા નથી. તેને ખાવાથી ઇન્સ્ટન્ટ એનર્જી મળે છે અને ગળ્યું કે તળેલું ખાવાની ઈચ્છા શાંત થઈ જાય છે. ધ્યાનમાં રાખો કે ફોતરાં વગરના ચણાને બદલે ફોતરાં સાથેના શેકેલા ચણા ખાવા વધુ ફાયદાકારક છે, કારણ કે ફોતરામાં ફાઈબર વધુ હોય છે.
- કાકડી અને ગાજરની સ્ટિક્સ: રિફ્રેશિંગ અને લાઈટ
ખાસ કરીને ઉનાળાની ઋતુમાં અથવા જ્યારે ખૂબ જ હળવી ભૂખ લાગી હોય, ત્યારે કાકડી, ગાજર કે બીટને પાતળી સ્ટિક્સ (ટુકડા) ના રૂપમાં કાપી લો. તમે ઇચ્છો તો તેને ફુદીના અને દહીંથી ઘરે બનાવેલી ચટણી સાથે ખાઈ શકો છો. આ શાકભાજીઓમાં પાણીનું પ્રમાણ ખૂબ વધારે હોવાથી શરીર હાઇડ્રેટેડ રહે છે અને ઝીરો કેલરી હોવાથી વજન વધવાનો કોઈ ડર રહેતો નથી.
- પોપકોર્ન: ગિલ્ટ વગર પેટ ભરો
ઘણા લોકોને લાગે છે કે પોપકોર્ન ખાવાથી વજન વધે છે, પરંતુ એવું ત્યારે જ થાય છે જ્યારે તેમાં ચીઝ કે બટર (માખણ) ઉમેરવામાં આવે. જો તમે ઘરે માખણ વગર કે ખૂબ ઓછા તેલમાં પ્લેન પોપકોર્ન બનાવો છો, તો તે એક ઉત્તમ લો-કેલરી સ્નેક છે. ત્રણ કપ પોપકોર્નમાં પણ ખૂબ જ ઓછી કેલરી હોય છે અને તે ફાઈબરથી ભરપૂર હોવાથી પેટ આસાનીથી ભરાઈ જાય છે.