મેલબોર્ન, 10 જુલાઈ, 2026 – મેલબોર્ન ક્રિકેટ મેદાન પર વડાપ્રધાન નરેન્દ્ર મોદીએ એક મહિલા ખેલાડીના બેટ ઉપર સહી કરી રહ્યા હોવાની તસવીરો વાયરલ થયા પછી અનેક લોકો એ જાણવા ઉત્સુક છે કે એ મહિલા ખેલાડી કોણ છે?
વાસ્તવમાં, ઑસ્ટ્રેલિયા પ્રવાસના પોતાના ત્રીજા દિવસે વડાપ્રધાન નરેન્દ્ર મોદી મેલબોર્ન ક્રિકેટ ગ્રાઉન્ડ પહોંચ્યા હતા, જ્યાં તેમણે ઘણા ખેલાડીઓ સાથે મુલાકાત કરી હતી. પીએમ મોદી જે મુખ્ય ખેલાડીઓને મળ્યા તેમાં ઑસ્ટ્રેલિયાના પૂર્વ કેપ્ટન સ્ટીવ વો અને ઑસ્ટ્રેલિયાની પૂર્વ મહિલા ટીમની કેપ્ટન લિસા સ્થાલેકર પણ સામેલ હતા.
લિસા સ્થાલેકર ભારતીય મૂળના પ્રથમ ખેલાડી છે, જેમણે ઑસ્ટ્રેલિયા માટે આંતરરાષ્ટ્રીય મેચ રમી છે. આ દરમિયાન લિસાએ પીએમ મોદી પાસેથી એક બેટ પર ઓટોગ્રાફ પણ લીધો હતો. મેલબોર્નમાં બંને વડાપ્રધાનોએ મળીને ભારત-ઑસ્ટ્રેલિયા સ્પોર્ટ્સ કોલેબોરેશન રોડમેપ જાહેર કર્યો હતો, જે સ્પોર્ટ્સ ટ્રેનિંગ અને કેપેસિટી બિલ્ડિંગ, સ્પોર્ટ્સ સાયન્સ અને ટેકનોલોજી, તેમજ સ્પોર્ટ્સ ઈન્ડસ્ટ્રી અને ઈન્વેસ્ટમેન્ટના ક્ષેત્રમાં સહયોગને પ્રોત્સાહન આપશે.
પુણેમાં જન્મથી લઈને ઑસ્ટ્રેલિયાના કેપ્ટન બનવા સુધીની સફર
લિસાનો જન્મ પુણેમાં થયો હતો. પરંતુ એક નવજાત શિશુ તરીકે તેમને હોસ્પિટલમાં જ છોડી દેવામાં આવ્યા હતા. બાદમાં તેમને નજીકના એક અનાથાશ્રમમાં રાખવામાં આવ્યા હતા, જ્યાંથી હરેન અને તેમના પત્ની સૂએ લિસાને દત્તક લીધા હતા. અનાથાશ્રમના સંચાલકોએ લિસાનું નામ લેલા રાખ્યું હતું. એક નવા નામ અને નવા પરિવાર સાથે લિસા પહેલા કેન્યા અને પછી ઑસ્ટ્રેલિયા ગયા હતા. લિસાને ક્રિકેટનો પરિચય તેમના પિતાએ કરાવ્યો હતો.
Melbourne Cricket Ground pic.twitter.com/ai2e0TmiwM
— Social Tamasha (@SocialTamasha) July 10, 2026
લિસાની ક્રિકેટ કારકિર્દી 1997માં ન્યૂ સાઉથ વેલ્સ સાથે શરૂ થઈ હતી. તેના ચાર વર્ષ બાદ તેમણે ઑસ્ટ્રેલિયા માટે પ્રથમ આંતરરાષ્ટ્રીય મેચ રમીને ઈતિહાસ રચી દીધો હતો. 2001માં તેમણે ઈંગ્લેન્ડ સામે પોતાનું વનડે ડેબ્યુ કર્યું હતું. લિસા 2013 સુધી ઑસ્ટ્રેલિયાની મહિલા ટીમની સભ્ય રહ્યા હતા. 2013ના વર્લ્ડ કપ પછી તેમણે ક્રિકેટને અલવિદા કહી દીધું હતું.
લિસાએ પોતાની કારકિર્દી દરમિયાન ઑસ્ટ્રેલિયા માટે 8 ટેસ્ટ મેચ રમી હતી જેમાં તેમણે 416 રન બનાવ્યા હતા અને 23 વિકેટ ઝડપી હતી. જ્યારે 125 વનડે મેચોમાં તેમણે 2728 રન બનાવ્યા હતા અને 146 વિકેટ લીધી હતી. 54 ટી20 આંતરરાષ્ટ્રીય મેચોમાં તેમના નામે 769 રન અને 60 વિકેટ છે. લિસા 2005 અને 2013ના વનડે વર્લ્ડ કપ તેમજ 2010 અને 2012ના ટી20 વર્લ્ડ કપ જીતનારી ઑસ્ટ્રેલિયાની ટીમનો હિસ્સો રહ્યા હતા. તેઓ બે વખત બેલિન્ડા ક્લાર્ક એવોર્ડ જીતી ચૂક્યા છે, જે વર્ષની સર્વશ્રેષ્ઠ ઑસ્ટ્રેલિયન મહિલા ક્રિકેટરને મળે છે.
ક્રિકેટ બંને દેશો વચ્ચેની વાતચીતનું કેન્દ્ર
ભારત-ઑસ્ટ્રેલિયા વચ્ચેના સ્પોર્ટ્સ રોડમેપ પર લિસાએ ડીડી ન્યૂઝ સાથે વાત કરતા કહ્યું કે, “મને લાગે છે કે આ ખૂબ જ સરસ અને રોમાંચક બાબત છે કે બંને દેશો સાથે આવ્યા છે અને આ રોડમેપ બનાવ્યો છે. ક્રિકેટ કદાચ અમારા બંને દેશો વચ્ચે વાતચીત કરવા અને સારો સુમેળ રાખવાના મુખ્ય કેન્દ્રમાં છે. પરંતુ તે સિવાય પણ અન્ય ઘણી તકો રહેલી છે.”
“સ્વાભાવિક છે કે, કોમનવેલ્થ ગેમ્સ અને ભારત માટે ઓલિમ્પિક્સ આવી રહ્યા છે અને ઓલિમ્પિક્સમાં ઑસ્ટ્રેલિયાના ઇતિહાસને જોતાં તેમજ અહીં મેલબોર્નમાં તેનું આયોજન થયું હોવાથી, આશા છે કે તે માહિતી શૅર કરી શકાશે. મને એ વાત ગમી છે કે આ બંને સરકારો છે જે આપણે એકબીજા સાથે માહિતી શૅર કરી શકીએ છીએ જેથી એકબીજાના દેશને મજબૂત કરી શકાય.”