ચંદીગઢ, 6 મે, 2026 – પંજાબમાં એક જ રાતમાં બે સ્થળે બોંબ વિસ્ફોટ થયા હોવાના અહેવાલ મળી રહ્યા છે. આ વિસ્ફોટો પાછળ કોઈ આતંકી કાવતરું છે કે કેમ તેની તપાસ સલામતી એજન્સીઓ દ્વારા શરૂ કરવામાં આવી છે.
પંજાબમાં જલંધર અને અમૃતસરમાં બોર્ડર સિક્યોરિટી ફોર્સ (BSF)ના ઠેકાણાઓ પાસે એક પછી એક બે ધડાકા થયા. એક ધડાકો BSF મુખ્યાલયની બિલકુલ નજીક થયો. અત્યાર સુધી કોઈના ઘાયલ થવાના સમાચાર નથી. પોલીસ અને કેન્દ્રીય એજન્સીઓએ વિગતવાર તપાસ શરૂ કરી દીધી છે, અને સમગ્ર રાજ્યમાં સુરક્ષા વધારી દેવામાં આવી છે.
જલંધરમાં પહેલો ધડાકો
પહેલો ધડાકો જલંધરમાં BSF ચોક પાસે થયો. એક ભીડભાડવાળા વિસ્તારમાં ઊભેલા એક સ્કૂટરમાં ધડાકો થયો. આસપાસ હાજર લોકોએ જણાવ્યું કે ધડાકાના તરત જ બાદ સ્કૂટરમાં આગ લાગી ગઈ, જેનાથી ત્યાં અફરાતફરી મચી ગઈ. ઘણા લોકો પોતાનો જીવ બચાવવા માટે ત્યાંથી ભાગવા લાગ્યા.
અમૃતસરમાં બીજો ધડાકો
મંગળવારે મોડી રાત્રે થોડા કલાકો બાદ અમૃતસરના ખાસા વિસ્તારમાં વધુ એક ધડાકો થયો. આ ધડાકો BSF ઠેકાણાઓ પાસે આવેલા એક આર્મી કેમ્પની બહાર થયો. શરૂઆતના અહેવાલો મુજબ એવું માનવામાં આવી રહ્યું છે કે મોટરસાઈકલ પર સવાર કોઈ વ્યક્તિએ ગ્રેનેડ ફેંક્યો હશે. આ સ્થળ અટારી સરહદથી અંદાજે 15 કિલોમીટર દૂર છે.
જુઓ વીડિયો…
અમૃતસર ગ્રામીણ પોલીસના SP આદિત્ય વોરિયરે જણાવ્યું કે આ ધડાકો રાત્રે 10:30 થી 11 વાગ્યાની વચ્ચે થયો હતો. પોલીસ અને સેનાની ટીમો તરત જ ઘટનાસ્થળે પહોંચી ગઈ હતી. તેમણે કહ્યું, ‘અમે ઘટનાની સચોટ વિગતોની પુષ્ટિ કરી રહ્યા છીએ. ફોરેન્સિક ટીમો પણ ઘટનાસ્થળે હાજર છે અને તમામ પાસાઓની તપાસ કરવામાં આવી રહી છે.’
સર્ચ ઓપરેશન શરૂ
ધડાકાને કારણે કમ્પાઉન્ડ વોલ પર સેનાના વિસ્તારને કવર કરવા માટે લગાવવામાં આવેલી ટીન શેડ ધરાશાયી થઈ ગઈ. ગેટ નંબર 6 અને 7 વચ્ચેની દીવાલને પણ થોડું નુકસાન થયું છે. ધડાકાનો અવાજ સાંભળતા જ સૈન્ય અધિકારીઓ અને પોલીસ અધિકારીઓ ઘટનાસ્થળે પહોંચી ગયા અને તપાસ શરૂ કરી દીધી. શંકા છે કે ગ્રેનેડથી હુમલો કરવામાં આવ્યો છે. આસપાસના વિસ્તારોમાં સર્ચ ઓપરેશન પણ શરૂ કરી દેવામાં આવ્યું છે.
અમૃતસરમાં જ્યાં ધડાકો થયો છે, ત્યાં જ આર્મી કેમ્પ એરિયાથી થોડે દૂર BSF ખાસા કેમ્પ પણ છે. સૂત્રોના જણાવ્યા મુજબ, અત્યાર સુધીની તપાસમાં જલંધર અને અમૃતસર બંને જગ્યાએ થયેલા ધડાકાઓમાં IEDના ઉપયોગની વાત સામે આવી રહી છે.