અમદાવાદ, 17 જૂન, 2026- GCCI દ્વારા તાજેતરમાં મેગા રક્તદાન કેમ્પનું આયોજન કરવામાં આવ્યું હતું જે દરમિયાન 1700 બ્લડ યુનિટ એકત્ર થયું હતું. વિશ્વ રક્તદાતા દિવસની ઉજવણી નિમિત્તે ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝ (GCCI) દ્વારા મહાજન સંકલન ટાસ્કફોર્સના માધ્યમથી સંલગ્ન એસોસિયેશનો, ઉદ્યોગો, ક્લબો અને કોર્પોરેટ સંસ્થાઓના સહયોગથી 1 જૂનથી 14 જૂન, 2026 દરમિયાન સફળતાપૂર્વક મેગા રક્તદાન અભિયાનનું આયોજન કરવામાં આવ્યું હતું.
અમદાવાદ શહેર તથા આસપાસના ઔદ્યોગિક વિસ્તારોમાં વિવિધ સ્થળોએ રક્તદાન કેમ્પો યોજવામાં આવ્યા હતા, જેમાં અંદાજે 1,700 યુનિટ બ્લડ યુનિટ એકત્રિત કરવામાં આવ્યું હતું. અમદાવાદમાં રક્તની વધતી જતી અછત, ખાસ કરીને થેલેસેમિયા પીડિત દર્દીઓને પડતી મુશ્કેલીઓને ધ્યાનમાં રાખીને તેમજ જરૂરિયાતમંદ દર્દીઓ માટે રક્તનો સતત અને પૂરતો જથ્થો ઉપલબ્ધ રહે તે હેતુથી આ અભિયાનનું આયોજન કરવામાં આવ્યું હતું. આ અભિયાનને રક્તદાતાઓ અને સહભાગી સંસ્થાઓ તરફથી ઉત્સાહભર્યો પ્રતિસાદ મળ્યો હતો. આ અભિયાનને ઇન્ડિયન રેડ ક્રોસ સોસાયટી તથા વિશાખા ગ્રુપનો સહયોગ પ્રાપ્ત થયો હતો. વિશાખા ગ્રુપે આ અભિયાનમાં ગિફ્ટિંગ પાર્ટનર તરીકે સહભાગિતા નોંધાવી હતી.
GCCIના પ્રમુખ શ્રી સંદીપ એન્જિનિયરે 1 જૂન, 2026ના રોજ અમદાવાદ ટિમ્બર મર્ચન્ટ એસોસિયેશન, ગીતા મંદિર ખાતે આ અભિયાનનું ઉદ્ઘાટન કર્યું હતું. તેમણે આ વાર્ષિક પહેલને સફળ બનાવવા માટે સહભાગી એસોસિયેશનો, ઉદ્યોગો અને રક્તદાતાઓનો આભાર વ્યક્ત કર્યો હતો. તેમણે જણાવ્યું હતું કે રક્તદાન એ સમાજસેવાનું એક શ્રેષ્ઠ સ્વરૂપ છે અને આ અભિયાનને સફળ બનાવવા માટે સૌએ આપેલા સહકારની તેમણે પ્રશંસા કરી હતી.
GCCIના સિનિયર વાઇસ પ્રેસિડેન્ટ શ્રી રાજેશ ગાંધી, વાઇસ પ્રેસિડેન્ટ શ્રી અપુર્વ શાહ તથા માનદ ખજાનચી શ્રી ગૌરાંગ ભગત વિવિધ સ્થળોએ યોજાયેલા રક્તદાન કેમ્પોમાં ઉપસ્થિત રહ્યા હતા. તેમણે રક્તદાતાઓના ઉત્સાહભર્યા પ્રતિસાદની પ્રશંસા કરી હતી તથા આવી પહેલો સામાજિક જવાબદારી અને સામૂહિક કલ્યાણને વધુ મજબૂત બનાવે છે તેવું જણાવ્યું હતું.
ઇન્ડિયન રેડ ક્રોસ સોસાયટીના પ્રતિનિધિઓએ સ્વૈચ્છિક રક્તદાનને પ્રોત્સાહન આપવા માટે GCCIના પ્રયાસોની પ્રશંસા કરી હતી તથા તાત્કાલિક આરોગ્યસેવા અને થેલેસેમિયા પીડિત દર્દીઓ માટે પૂરતા પ્રમાણમાં રક્તનો જથ્થો જાળવી રાખવાના મહત્વ પર ભાર મૂક્યો હતો.
સહભાગી એસોસિયેશનો અને સંસ્થાઓએ GCCI દ્વારા આયોજિત ભવિષ્યના રક્તદાન અભિયાનોમાં પણ સહયોગ આપવાની પ્રતિબદ્ધતા વ્યક્ત કરી હતી.
નીચે દર્શાવેલા એસોસિયેશનો અને સંસ્થાઓના સહયોગથી મેગા રક્તદાન અભિયાનનું આયોજન કરવામાં આવ્યું હતું:
- અમદાવાદ ટિમ્બર મર્ચન્ટ એસોસિયેશન – ગીતામંદિર અને ગોતા
- શ્રી પાંચકૂવા કાપડ મહાજન
- નરોડા ઇન્ડસ્ટ્રીઝ એસોસિયેશન
- અખિલ ગુજરાત હાર્ડવેર એસોસિયેશન
- ISHRAE અમદાવાદ ચેપ્ટર અને RATA અમદાવાદ
- સ્પોર્ટ્સ ક્લબ
- અમદાવાદ ઓપ્ટિકલ એસોસિયેશન
- અમદાવાદ વેપારી મહાજન
- એસ્ટ્રલ લિમિટેડ – હેડ ઓફિસ, ધોળકા યુનિટ અને સાંતેજ યુનિટ
- સાણંદ ઇન્ડસ્ટ્રીઝ એસોસિયેશન
- વાડીલાલ ઇન્ડસ્ટ્રીઝ લિમિટેડ – હેડ ઓફિસ, પુન્ધરા યુનિટ
- અમદાવાદ ફર્નિચર એસોસિયેશન
- શ્રી માણેકચોક સોના-ચાંદી દાગીના એસોસિયેશન
- કર્ણાવતી ક્લબ લિમિટેડ
- શ્રી યોગ સાધના આશ્રમ
- ચાંદખેડા વેપારી સંગઠન