રિવોઈ ન્યૂઝ, 8 ઓગસ્ટ, 2026 – ઈલોન મસ્કના સોશિયલ મીડિયા પ્લેટફોર્મ X એ તાજેતરમાં છેલ્લા કેટલાક વર્ષોનો સૌથી મોટો ફેરફાર કર્યો છે. પ્લેટફોર્મ તેનો ‘ક્રિએટર રેવેન્યુ શેર પ્રોગ્રામ’ બંધ કરી રહ્યું છે અને તમામ પાત્ર યુઝર્સને છેલ્લું પેમેન્ટ 7 સપ્ટેમ્બરના રોજ કરવામાં આવશે. X દ્વારા પ્લેટફોર્મ પર એક પોસ્ટ મારફત આ પ્રોગ્રામ બંધ કરવાની જાહેરાત કરવામાં આવી હતી. 7 ઓગસ્ટથી જ આ પ્રોગ્રામ માટે નવા સાઈન-અપ પણ બંધ કરી દેવાયા હતા. રેવેન્યુ શેરિંગ પ્રોગ્રામ હેઠળ, X પર યુઝર્સને એંગેજમેન્ટના આધારે પોસ્ટ કરીને પૈસા કમાવવાની તક આપવામાં આવતી હતી. જોકે, આ સુવિધા માત્ર પ્રીમિયમ X એકાઉન્ટ યુઝર્સ માટે જ ઉપલબ્ધ હતી.
આ પગલું X ના પ્રોડક્ટ હેડ નિકિતા બિયરના રાજીનામાની જાહેરાતના થોડા જ દિવસો બાદ લેવામાં આવ્યું છે. જોકે, તેઓ હજુ પણ પ્લેટફોર્મ માટે એડવાઈઝર તરીકે કાર્યરત છે.
શા માટે બંધ કરવામાં આવી રહ્યો છે X નો રેવેન્યુ પ્રોગ્રામ?
X ના ક્રિએટર્સ હેડ એલેગ્રા જેકિયાએ આ પ્રોગ્રામ બંધ કરવાનું કારણ આપતાં જણાવ્યું હતું કે આના ઈન્સેન્ટિવ યોગ્ય ન હતા. ક્રિએટર્સ પ્લેટફોર્મ પર નવું કન્ટેન્ટ લાવવાને બદલે, ઘણા લોકો પેમેન્ટ મેળવવા માટે બીજાના કન્ટેન્ટનો ફરીથી ઉપયોગ (રી-યુઝ) કરી રહ્યા હતા. આ સમસ્યા સામે નિપટવા માટે X એક નવો ‘ઓરિજિનલ કન્ટેન્ટ રિવોર્ડ પ્રોગ્રામ’ શરૂ કરી રહ્યું છે. જેકિયાએ સ્પષ્ટતા કરી હતી કે, “અમે વધુ નિયમો અને અપવાદો ઉમેરવાનું ચાલુ રાખી શક્યા હોત, પરંતુ આખરે વધુ સારો નિર્ણય એ જ હતો કે નવા સિરેથી શરૂઆત કરવામાં આવે અને એવો પ્રોગ્રામ બનાવાય જે શરૂઆતથી જ ઓરિજિનાલિટીને રિવોર્ડ આપવા માટે ડિઝાઇન કરાયો હોય.”
પરંતુ નવા પ્રોગ્રામમાં શું-શું છે તે જોતાં પહેલાં ધ્યાનમાં રાખો કે X એ રેવેન્યુ શેરિંગ માટે 3 પેમેન્ટનો પ્લાન બનાવ્યો છે, જેના પછી તેને બંધ કરી દેવાશે. હાલના યુઝર્સને સ્ટેન્ડર્ડ પેમેન્ટ શેડ્યૂલ હેઠળ 14 ઓગસ્ટ અને 28 ઓગસ્ટના રોજ છેલ્લા પેમેન્ટ મળશે, અને 7 સપ્ટેમ્બર સુધી થયેલી કમાણી માટે છેલ્લું પેમેન્ટ 11 સપ્ટેમ્બર અથવા તેની આસપાસ મળવાની અપેક્ષા છે.
Today, we’re launching Original Content Rewards.
The reality is that Revenue Sharing had reached a point where its incentives were misaligned. Creators should be focused on bringing net new content to the platform instead of maximizing payouts. We could have kept adding more… pic.twitter.com/VJIxqlPrjm
— Allegra Jacchia (@allegrajacchia) August 7, 2026
ક્રિએટર્સ માટે X નો નવો પ્રોગ્રામ શું છે?
એક્સનું કહેવું છે કે ઓરિજિનલ કન્ટેન્ટ રિવોર્ડ પ્રોગ્રામનો હેતુ એવા ક્રિએટર્સને ઈનામ આપવાનો છે જેઓ પ્લેટફોર્મ પર ઓરિજિનલ આઈડિયા, માહિતી, રિપોર્ટિંગ, ક્રિએટિવિટી અને કોમેન્ટ્રી લાવે છે. એટલે કે, આ પ્રોગ્રામ એવા ક્રિએટર્સ પર ફોકસ કરે છે જેઓ ખરેખર કંઈક નવું અને ક્રિએટિવ લાવે છે, નહીં કે માત્ર બીજાનું કન્ટેન્ટ રી-શેર કરે છે કે ઓછી મહેનતવાળું કન્ટેન્ટ પોસ્ટ કરે છે.
કંપનીએ સ્પષ્ટ કર્યું કે ઓરિજિનલ કન્ટેન્ટથી તેનો અર્થ શું છે. કંપનીના જણાવ્યા મુજબ, આ પ્રોગ્રામનો હેતુ એવા ક્રિએટર્સને રિવોર્ડ આપવાનો છે જેઓ પ્લેટફોર્મ પર વાતચીતમાં ઓરિજિનલ વેલ્યુ ઉમેરે છે. X એ ઓરિજિનલ કન્ટેન્ટને એવી સામગ્રી તરીકે વ્યાખ્યાયિત કર્યું છે જે યુઝરે જાતે બનાવી હોય અને જેમાં તેમનો પોતાનો અવાજ, દ્રષ્ટિકોણ, માહિતી કે ક્રિએટિવિટી ઝળકતી હોય.
તેમાં થ્રેડ્સ, વિડિયો, મીમ્સ, ઓરિજિનલ રિપોર્ટિંગ, એનાલિસિસ, કોમેન્ટ્રી, રિએક્શન, ફોટોગ્રાફ્સ, ગ્રાફિક્સ, ઈલસ્ટ્રેશન અને અન્ય ક્રિએટિવ કામોનો સમાવેશ થઈ શકે છે. જો કોઈ કન્ટેન્ટ ઓરિજિનલ સંદર્ભ, એનાલિસિસ, નેરેશન, હ્યુમર કે ક્રિએટિવ એડિટિંગ દ્વારા અગાઉથી ઉપલબ્ધ કન્ટેન્ટને નોંધપાત્ર અને સાર્થક રીતે બદલી નાખે છે, તો તે પણ આ માટે પાત્ર બની શકે છે.
X ના ઓરિજિનલ કન્ટેન્ટ રિવોર્ડ પ્રોગ્રામમાં જોડાવાની શરતો
આ સોશિયલ મીડિયા પ્લેટફોર્મના નવા પ્રોગ્રામ માટે અપ્લાય કરવા માટે, તમારી ઉંમર ઓછામાં ઓછી 18 વર્ષ હોવી જોઈએ અને તમે એવા દેશમાં રહેતા હોવા જોઈએ જ્યાં આ પ્રોગ્રામ ઉપલબ્ધ હોય. તમારી પાસે પર્સનલ અથવા બિઝનેસ એકાઉન્ટ હોવું જોઈએ અને તમે X ના પ્રીમિયમ પ્લાનનું સબ્સ્ક્રિપ્શન લીધેલું હોવું જોઈએ. તમારા એકાઉન્ટ પર ઓછામાં ઓછા 500 વેરિફાઈડ ફોલોઅર્સ હોવા જોઈએ અને છેલ્લા 90 દિવસમાં વેરિફાઈડ યુઝર્સ તરફથી ઓછામાં ઓછા 500,000 હોમ ટાઈમલાઈન ઈમ્પ્રેશન્સ મળેલા હોવા જોઈએ. અહીં ઈમ્પ્રેશન્સમાં રિપ્લાય (જવાબો) પર મળતા ઈમ્પ્રેશન્સનો સમાવેશ થતો નથી. તમારે નિયમિતપણે ઓરિજિનલ કન્ટેન્ટ પણ પોસ્ટ કરવું પડશે.
X નું કહેવું છે કે ક્રિએટર સ્ટુડિયો દ્વારા અપ્લાય કરી શકાય છે અને પરિણામોની જાણ 3 વર્કિંગ ડેઝ (કામકાજના દિવસો) માં કરવામાં આવશે. જે યુઝર્સની અરજી રિજેક્ટ થઈ જાય છે, તેઓ અપીલ કરી શકે છે, અને જો તે અપીલ સફળ ન થાય, તો તેઓ 90 દિવસ પછી ફરીથી અપ્લાય કરી શકે છે, શરતે કે તેઓ હજુ પણ બધી જરૂરી શરતો પૂરી કરતા હોય.
નવા પ્રોગ્રામ માટેનું પહેલું પેમેન્ટ 28 ઓગસ્ટના રોજ જાહેર કરવામાં આવશે, જ્યારે હાલના રેવેન્યુ શેરિંગ ક્રિએટર્સ જે 8 સપ્ટેમ્બર કે ત્યારબાદ પાત્ર થઈને એનરોલ કરશે, તેમને તેમનું પહેલું પેમેન્ટ 25 સપ્ટેમ્બરના રોજ મળશે.