ઓસાકા/અમદાવાદ, 22 એપ્રિલ, 2026 – ગુજરાત યુનિવર્સિટી અને જાપાનની ઓતેમોન ગાકુઈન યુનિવર્સિટી વચ્ચે સહયોગ માટેના પાંચ દાયકા જૂના MoU રિન્યુ કરવામાં આવ્યા છે. અમદાવાદસ્થિત ગુજરાત યુનિવર્સિટીએ 22 એપ્રિલ, 2026ના રોજ જાપાનના ઓસાકાની ઓતેમોન ગાકુઈન યુનિવર્સિટી સાથેના તેના 56 વર્ષ જૂના મેમોરેન્ડમ ઓફ અન્ડરસ્ટેન્ડિંગ (MoU) રિન્યુ કર્યા છે એટલું જ નહીં પરંતુ સમય અનુસાર તેમાં અપગ્રેડેશન કરીને આંતરરાષ્ટ્રીય સહયોગમાં એક મહત્વપૂર્ણ સીમાચિહ્નરૂપ સિદ્ધિ હાંસલ કરી છે.
સુધારેલા MoU દ્વારા આ ભાગીદારી હવે પ્રાથમિક રીતે માત્ર સાંસ્કૃતિક આદાનપ્રદાનના માળખામાંથી બદલાઈને વ્યાપક ‘એકેડેમિક એક્સચેન્જ સ્ટુડન્ટ્સ પ્રોગ્રામ’ માં પરિવર્તિત થઈ છે. જેનાથી વિદ્યાર્થીઓની ગતિશીલતા, શૈક્ષણિક સહયોગ, સંયુક્ત સંશોધન અને આંતર-સાંસ્કૃતિક શિક્ષણ માટે નવા માર્ગો ખુલશે.
રાજ્યની ગુજરાત યુનિવર્સિટીના માનનીય કુલપતિ ડૉ. નીરજા એ. ગુપ્તાની જાપાન મુલાકાત દરમિયાન આ કરાર પર ઔપચારિક રીતે હસ્તાક્ષર કરવામાં આવ્યા હતા. આ નવેસરનો સહયોગ વૈશ્વિક શૈક્ષણિક ઉત્કૃષ્ટતાને પ્રોત્સાહન આપવા અને સમકાલીન શૈક્ષણિક જરૂરિયાતોને અનુરૂપ વિદ્યાર્થીઓને આંતરરાષ્ટ્રીય એક્સપોઝર પૂરો પાડવા માટે બંને સંસ્થાઓના સમાન વિઝનને પ્રતિબિંબિત કરે છે.
આ પણ વાંચોઃ ઉત્તર પ્રદેશમાં શેખા તળાવ પક્ષી અભયારણ્યને રામસર સ્થળનો દરજ્જો આપવામાં આવ્યો
આ પ્રસંગે ડૉ. નીરજા એ. ગુપ્તાએ પોતાનો આનંદ વ્યક્ત કરતા જણાવ્યું હતું કે, MoU નું શૈક્ષણિક વિનિમય કાર્યક્રમમાં રૂપાંતર એ ભારત-જાપાન શૈક્ષણિક સહયોગના એક નવા અને ગતિશીલ તબક્કાની શરૂઆત છે. તેમણે ભારપૂર્વક જણાવ્યું હતું કે આવી પહેલ વિદ્યાર્થીઓને વૈશ્વિક ક્ષમતાઓ સાથે સશક્ત બનાવશે, સંશોધનની તકો વધારશે અને સંસ્થાકીય સંબંધોને મજબૂત કરશે.
નવીન ભાગીદારીને પગલે વિનિમય કાર્યક્રમો, સહયોગી પ્રોજેક્ટ્સ અને સમૃદ્ધ શૈક્ષણિક અનુભવો દ્વારા બંને યુનિવર્સિટીઓના વિદ્યાર્થીઓ અને ફેકલ્ટીઓને ફાયદો થવાની અપેક્ષા છે.
આ એમઓયુ અંતર્ગત ગુજરાત યુનિવર્સિટી ઓતેમોન ગાકુઈન યુનિવર્સિટી સાથે આગામી સમયમાં એક જીવંત અને પરસ્પર લાભદાયક પરિણામની અપેક્ષા રાખે છે, જે આંતરરાષ્ટ્રીયકરણ અને શૈક્ષણિક ઉત્કૃષ્ટતા પ્રત્યેની તેની પ્રતિબદ્ધતાને વધુ મજબૂત બનાવશે.