દિલ્હીમાં અમિત શાહના નિવાસે ભાજપની અઢી કલાક લાંબી હાઈપ્રોફાઈલ બેઠક: સંગઠનમાં મોટા ફેરફારના સંકેત

નવી દિલ્હી, 3 જુલાઈ 2026: કેન્દ્રીય ગૃહમંત્રી અમિત શાહના નિવાસસ્થાને ગુરુવારે (2 જુલાઈ) ભારતીય જનતા પાર્ટીની એક અત્યંત મહત્ત્વની અને હાઈપ્રોફાઈલ બેઠક યોજાઈ હતી. આ બેઠકમાં ભાજપના રાષ્ટ્રીય અધ્યક્ષ નિતિન નવીન સહિત પક્ષના અનેક વરિષ્ઠ નેતાઓ ઉપસ્થિત રહ્યા હતા. આશરે અઢી કલાક સુધી ચાલેલી આ દીર્ઘ બેઠકમાં પક્ષના નવા સંગઠન માળખા અને આગામી રણનીતિ અંગે વિસ્તૃત ચર્ચા થઈ હોવાનું જાણવા મળ્યું છે. આ ઉપરાંત, રાષ્ટ્રીય અધ્યક્ષ નિતિન નવીનની નવી ટીમની રચનાને લઈને પણ ગંભીર મંથન કરવામાં આવ્યું હતું.

ગૃહમંત્રી અમિત શાહના આવાસ પર યોજાયેલી આ બેઠકમાં ભાજપના રાષ્ટ્રીય સંગઠન મહામંત્રી બી. એલ. સંતોષ પણ ખાસ ઉપસ્થિત રહ્યા હતા. રાજકીય વર્તુળોમાંથી પ્રાપ્ત વિગતો અનુસાર, આ બેઠકને નિતિન નવીનની નવી ટીમની જાહેરાત અને આગામી 4-5 જુલાઈના રોજ યોજાનારા ઉત્તર પ્રદેશના મહત્વના પ્રવાસ સાથે જોડીને જોવામાં આવી રહી છે. જોકે, આ બેઠકમાં અન્ય કયા સંવેદનશીલ મુદ્દાઓ પર ચર્ચા થઈ છે તે અંગે પક્ષ દ્વારા સત્તાવાર રીતે હજુ કોઈ ખુલાસો કરવામાં આવ્યો નથી.

ભાજપે ગયા મહિને જ દિલ્હી, હરિયાણા, પંજાબ અને ત્રિપુરામાં નવા પ્રદેશ પ્રમુખોના નામોની જાહેરાત કરી હતી. જેમાં સૌથી નોંધપાત્ર બાબત એ હતી કે, દિલ્હીમાં કેન્દ્રીય મંત્રી હર્ષ મલ્હોત્રાને પ્રદેશ અધ્યક્ષની કમાન સોંપવામાં આવી હતી. આ અગાઉ ભાજપે કેન્દ્રીય મંત્રી પંકજ ચૌધરીને ઉત્તર પ્રદેશ ભાજપના પ્રમુખ બનાવ્યા હતા. આ શ્રેણીમાં હવે રાષ્ટ્રીય સ્તરે સંગઠનને મજબૂત કરવા માટે અધ્યક્ષ નિતિન નવીનની નવી ટીમની જાહેરાતની અટકળો તેજ થઈ છે. સૂત્રોના જણાવ્યા અનુસાર, નવી ટીમની યાદી લગભગ આખરી થઈ ચૂકી છે અને ટૂંક સમયમાં જ તેના પર આખરી મહોર મારીને સત્તાવાર જાહેરાત કરવામાં આવી શકે છે.

• અનુભવી નેતા તરીકે નિતિન નવીનની સફર

પક્ષના આંતરિક સૂત્રોના જણાવ્યા મુજબ, ભાજપે આ વર્ષે જાન્યુઆરી મહિનામાં નિતિન નવીનને રાષ્ટ્રીય અધ્યક્ષ પદની મોટી જવાબદારી સોંપી હતી. તેઓ બિહારની બાંકીપુર બેઠક પરથી સતત પાંચ વખત ધારાસભ્ય તરીકે ચૂંટાવાનો રેકોર્ડ ધરાવે છે. તેમની પાસે ભારતીય જનતા યુવા મોરચા (BJYM) સહિત પક્ષના સંગઠનમાં કામ કરવાનો બહોળો અનુભવ છે.

તેઓ વર્ષ 2006માં પટના પશ્ચિમ વિધાનસભા મતવિસ્તારમાંથી પ્રથમ વખત બિહાર વિધાનસભામાં ચૂંટાયા હતા. ત્યારબાદ, વર્ષ 2010થી તેઓ સતત બાંકીપુર બેઠક પરથી ચૂંટણી લડી રહ્યા છે અને વર્ષ 2010, 2015, 2020 અને છેલ્લે 2025ની વિધાનસભા ચૂંટણીમાં સતત જીત મેળવીને પાંચમી વખત ધારાસભ્ય બન્યા છે. હવે તેમની આ સંગઠન ક્ષમતાનો ઉપયોગ આગામી રાજ્યોની ચૂંટણીઓ અને કેન્દ્રીય સંગઠનને ધારદાર બનાવવા માટે કરવામાં આવશે.