રાજસ્થાન રોયલ્સના યુવા બેટ્સમેન વૈભવ સૂર્યવંશીએ IPL 2025 માં પોતાના પ્રદર્શનથી બધાને પ્રભાવિત કર્યા છે. વૈભવ IPL રમનાર સૌથી યુવા બેટ્સમેન છે અને તેણે પોતાની પહેલી જ સિઝનમાં ધમાલ મચાવી હતી. વૈભવની ટીમ ભલે આ સિઝનમાં પ્લેઓફ માટે ક્વોલિફાય ન થઈ હોય, પરંતુ આ સિઝન વૈભવ માટે યાદગાર રહી છે. ઓસ્ટ્રેલિયન અનુભવી ક્રિકેટર સ્ટીવ વો પણ વૈભવના ચાહક બની ગયા છે, પરંતુ તેમણે આ યુવા બેટ્સમેનને નિયંત્રણ પર ધ્યાન કેન્દ્રિત કરવા સલાહ આપી છે.
રાજસ્થાન રોયલ્સ તરફથી રમતા વૈભવે ગુજરાત ટાઇટન્સ સામે 35 બોલમાં સદી ફટકારી, જે ટુર્નામેન્ટમાં ભારતીય બેટ્સમેન દ્વારા સૌથી ઝડપી સદી છે. વૈભવને ભારતની અંડર-19 ટીમમાં પણ પસંદ કરવામાં આવ્યો છે. રાજસ્થાનના કેપ્ટન સંજુ સેમસનની ગેરહાજરીમાં વૈભવને તક મળી અને તે તેનો લાભ લેવામાં સફળ રહ્યો હતો. સ્ટીવ વો નિયમિતપણે IPL જોતો નથી પરંતુ તેણે સૂર્યવંશીને એક મહાન ખેલાડી ગણાવ્યો અને કહ્યું કે તેણે પોતાના પગ જમીન પર રાખવા પડશે. સ્ટીવ વોએ વૈભવની પ્રશંસા કરી હતી.
તેમણે કહ્યું, 14 વર્ષની ઉંમરે, તેના પર કોઈ દબાણ નથી. તે સંપૂર્ણ સ્વતંત્રતા સાથે રમી રહ્યો છે, જે જોવામાં સારું છે. મને લાગે છે કે તેની સામે પડકાર નિયંત્રણ જાળવી રાખવાનો રહેશે. શું તે સમાન ઉત્સાહ સાથે રમી શકશે, સમાન સ્વતંત્રતા સાથે બેટિંગ કરી શકશે? આ એક પડકાર હશે. વૈભવ પાસે કૌશલ્ય છે અને તે માનસિક રીતે મજબૂત છે. તમે ઇચ્છો છો કે તેના જેવો બેટ્સમેન સફળ થાય. આ ક્રિકેટ માટે એક મહાન વાર્તા છે. હું IPL વધારે જોતો નથી, પરંતુ જ્યારે આવો ખેલાડી આવે છે, ત્યારે તેને જોવાનું મન થાય છે.
ભારતમાં દરેક નવા બેટિંગ સ્ટારની તુલના સચિન તેંડુલકર સાથે કરવામાં આવે છે, પરંતુ વોએ કહ્યું કે વૈભવ કે અન્ય કોઈની તેની સાથે ન કરવી જોઈએ કારણ કે તેંડુલકર જેવી પ્રતિભા વારંવાર આવતી નથી. વોએ કહ્યું, મને નથી લાગતું કે કોઈની સચિન તેંડુલકર સાથે તુલના કરી શકાય. ઓસ્ટ્રેલિયા આવીને પર્થમાં સદી ફટકારી, જે વિશ્વની સૌથી મુશ્કેલ પીચોમાંની એક છે અને જ્યાં મોટાભાગના ખેલાડીઓ સંઘર્ષ કરે છે, તે આશ્ચર્યજનક હતું.
