ટ્રમ્પની 14 દિવસની યુદ્ધવિરામની જાહેરાત બાદ સ્ટ્રેટ ઓફ હોર્મુઝ ખોલવા પર ઈરાનની સહમતિ
તહેરાન, 8 એપ્રિલ 2028: અમેરિકા અને ઈરાન વચ્ચે વધતા તણાવ વચ્ચે એક મહત્વપૂર્ણ રાજદ્વારી વળાંક સામે આવ્યો છે. ઈરાને બુધવારે સંકેત આપ્યો હતો કે તે તેની સૈન્ય કાર્યવાહી રોકવા તૈયાર છે, શરત એટલી કે તેની વિરુદ્ધ થતા હુમલાઓ બંધ કરવામાં આવે. આ સાથે ઈરાને વ્યૂહાત્મક રીતે મહત્વપૂર્ણ એવા સ્ટ્રેટ ઓફ હોર્મુઝને બે અઠવાડિયા માટે અસ્થાયી રૂપે ખોલવાની પણ જાહેરાત કરી છે.
ઈરાનના વિદેશ મંત્રી સઈદ અબ્બાસ અરાઘચીએ એક નિવેદનમાં જણાવ્યું હતું કે, આ નિર્ણય એવા સમયે લેવામાં આવ્યો છે જ્યારે યુદ્ધવિરામ અંગે વાતચીત ચાલી રહી છે અને પરિસ્થિતિમાં નરમાશના સંકેતો મળી રહ્યા છે. તેમણે જણાવ્યું કે બે અઠવાડિયાના આ સમયગાળા દરમિયાન જહાજોને સુરક્ષિત રીતે સ્ટ્રેટ ઓફ હોર્મુઝમાંથી પસાર થવાની મંજૂરી આપવામાં આવશે, પરંતુ આ માટે ઈરાનના અધિકારીઓ સાથે સંકલન અને નક્કી કરેલી શરતોનું પાલન કરવું અનિવાર્ય રહેશે.
અરાઘચીએ આ નિર્ણય પાછળનું કારણ જણાવતા કહ્યું કે, અમેરિકા તરફથી 15 મુદ્દાના પ્રસ્તાવ પર વાતચીતની માંગ અને અમેરિકી રાષ્ટ્રપતિ દ્વારા ઈરાનના 10 મુદ્દાના પ્રસ્તાવને વાતચીતના આધાર તરીકે સ્વીકારવાની જાહેરાત બાદ આ પગલું લેવામાં આવ્યું છે. તેમણે સ્પષ્ટ કર્યું કે ઈરાનનું વલણ સંપૂર્ણપણે શરતો પર આધારિત છે અને તે બીજા પક્ષની કાર્યવાહી પર નિર્ભર રહેશે.
તેમણે કહ્યું, “જો ઈરાન પર હુમલા બંધ થશે, તો અમારી સશસ્ત્ર સેનાઓ પણ તેમની રક્ષણાત્મક કાર્યવાહી રોકી દેશે. બે અઠવાડિયા સુધી સ્ટ્રેટ ઓફ હોર્મુઝ દ્વારા સુરક્ષિત અવરજવર શક્ય બનશે, પરંતુ આ માટે અમારી સેનાઓ સાથે સંકલન અને ટેકનિકલ મર્યાદાઓનું ધ્યાન રાખવું પડશે.”
બીજી તરફ, ડોનાલ્ડ ટ્રમ્પે પણ મોટી જાહેરાત કરતા કહ્યું કે તેઓ ઈરાન પર પ્રસ્તાવિત સૈન્ય હુમલાઓને બે અઠવાડિયા માટે ટાળવા માટે સંમત થયા છે. તેમણે કહ્યું, “જો ઈરાન સ્ટ્રેટ ઓફ હોર્મુઝને સંપૂર્ણ રીતે, તાત્કાલિક અને સુરક્ષિત રીતે ખોલવા માટે સંમત થાય છે, તો અમે પણ બે અઠવાડિયા સુધી હુમલા રોકીશું.” ટ્રમ્પે તેને ‘દ્વિપક્ષીય યુદ્ધવિરામ’ ગણાવ્યો હતો.
ટ્રમ્પે એવો પણ દાવો કર્યો હતો કે અમેરિકી સેનાએ તેના લક્ષ્યો હાંસલ કરી લીધા છે અને હવે લાંબા ગાળાના શાંતિ કરારની દિશામાં ઝડપથી કામ થઈ રહ્યું છે. તેમણે કહ્યું કે ઈરાનનો 10 મુદ્દાનો પ્રસ્તાવ વાતચીત માટે એક મજબૂત આધાર છે અને મોટાભાગના વિવાદિત મુદ્દાઓ પર સહમતિ બની ગઈ છે.
તેમણે વિશ્વાસ વ્યક્ત કર્યો કે બે અઠવાડિયામાં આ કરાર અંતિમ સ્વરૂપ લઈ શકે છે. ટ્રમ્પે તેને મધ્ય પૂર્વમાં સ્થિરતાની દિશામાં એક મોટું પગલું ગણાવ્યું અને કહ્યું કે આ લાંબા સમયથી ચાલી રહેલી સમસ્યાના ઉકેલની નજીક પહોંચવાની એક તક છે.
