ખાનગી સ્કુલો નફાખોરી ન કરી શકે પણ વિદ્યાર્થીઓને અપાતી સુવિધા મુજબ ફી વસુલી શકશેઃ હાઈકોર્ટ
અમદાવાદઃ રાજ્યમાં ખાનગી શાળાઓના સંચાલકો દ્વારા વધુ ફીના મામલે વિવાદ ચાલી રહ્યો છે, ત્યારે ગુજરાત હાઈકોર્ટે ખાનગી સ્કૂલોમાં ફીના મુદ્દે મહત્વનો ચૂકાદો આપ્યો છે. હવે ખાનગી સ્કૂલો ફીમાં વધારો કરી શકશે. ખાનગી સ્કૂલો વિદ્યાર્થીઓને આપતી સુવિધાઓ બાબતે ફી વસૂલી શકશે પણ નફાખોરી નહીં કરી શકે. ખાનગી સ્કૂલો એડમિશન, સત્ર અને ટ્યુશન ફી વસૂલી શકશે, જો કે, હાઈકોર્ટના ચૂકાદામાં એવું પણ કહેવામાં આવ્યું છે કે, ખાનગી સ્કૂલો અતિશય વધારે ફી વસૂલી શકશે નહીં. સાથે જ ફી રેગ્યુલેટરી કમિટી શિક્ષકોના પગારની પણ તપાસ કરશે. FRC પૂરતા વેરિફિકેશન વગર ખાનગી સ્કૂલોના ક્લેમ નકારી શકશે નહીં.
ગુજરાતમાં ખાનગી સ્કૂલો દ્વારા વાલીઓ પાસેથી વસૂલવામાં આવતી ફીનો મુદ્દો છેલ્લાં કેટલાંક સમયથી ચર્ચામાં રહ્યો છે. ત્યારે ખાનગી સ્કૂલો દ્વારા લેવામાં આવતી શિક્ષણ ફી મુદ્દે ગુજરાત હાઈકોર્ટે મહત્વનો ચૂકાદો આપ્યો છે. ગુજરાત હાઈકોર્ટે અવલોકન કરતા જણાવ્યું કે, ખાનગી સ્કૂલો ફીમાં વધારો કરી શકશે. ખાનગી સ્કૂલો મર્યાદામાં રહીને વિદ્યાર્થીઓની ફી વધારી શકે છે. જો કે, ખાનગી સ્કૂલો નફાખોરી નહીં કરી શકે, એવી ટકોર પણ કરી હતી. વિદ્યાર્થીઓને અપાતી સુવિધા મામલે ખાનગી સ્કૂલો ફી વસૂલી શકે છે.
ગુજરાત હાઈકોર્ટે કહ્યું કે, ખાનગી સ્કૂલો પ્રવેશ, સત્ર અને ટ્યુશન ફી વસૂલી શકે છે. સાથે જ ભવિષ્યના ડેવલપમેન્ટ માટેની કોસ્ટ માટે સ્કૂલો ફી વસૂલી શકે છે. FRC ખાનગી સ્કૂલોનું લીઝ અને રેન્ટનો ખર્ચ નકારી શકે નહીં. FRC રેન્ટ બાબતે તપાસ કરી શકે છે, પરંતુ ગેરવ્યાજબી રીતે ખર્ચને નકારી શકે નહીં. સાથે જ FRC ખાનગી સ્કૂલોની લીઝ કે રેન્ટની રકમ ઓછી નક્કી કરી શકે નહીં. ખાનગી સ્કૂલો વિદ્યાર્થીઓને આપતી સુવિધાઓ બાબતે ફી વસૂલી શકશે.
ફી રેગ્યુલેટરી કમિટી ખાનગી સ્કૂલો કેટલાં શિક્ષકો રાખે છે અને શિક્ષકોને કેટલો પગાર આપે છે એની તપાસ પણ કરી શકે છે. જો કે, શિક્ષકોના પગાર ધોરણ અને તેમના ઈન્ક્રીમેન્ટ મુદ્દે FRC નકારાત્મક નિર્ણય તપાસ વગર લઈ શકે નહીં. ખાનગી સ્કૂલો દ્વારા બેંકમાંથી લેવામાં આવેલી લોન પરનું વ્યાજ FRCએ ધ્યાનમાં લેવું પડે અને આ મુદ્દે ખાનગી સ્કૂલો ફી વધારો માગી શકે છે. ખાનગી સ્કૂલો મિલકત પરના ધસારાને લઈને અલગ અલગ ક્લેમ કરી શકશે નહીં. મહત્વનું છે કે, ફીના મુદ્દે વાલીઓ અનેકવાર રજૂઆતો કરી ચૂક્યા છે. એટલે કે ખાનગી સ્કૂલો નફાખોરી નહીં કરી શકે. પણ ખાનગી સ્કૂલો દ્વારા જે સુવિધાઓ આપવામાં આવે છે એ મામલે ફી વસૂલી શકશે.
