નવી દિલ્હી, 1 સપ્ટેમ્બર 2026: રશિયા-યુક્રેન યુદ્ધના પ્રકોપ વચ્ચે રશિયન સેનામાં ફસાયેલા ભારતીય નાગરિકોને લઈને ભારત સરકારે એક મોટું અને ગંભીર અપડેટ જારી કર્યું છે. કિર્ગિસ્તાનમાં યોજાયેલા શંઘાઈ સહયોગ સંગઠન (SCO) શિખર સંમેલન દરમિયાન ઉપસ્થિત રહેલા વિદેશ સચિવ વિક્રમ મિસત્રીએ જણાવ્યું હતું કે, અત્યાર સુધીમાં કુલ 227 ભારતીય નાગરિકો રશિયન સૈન્યમાં ભરતી થયા હોવાની માહિતી મળી છે. જેમાંથી 139 નાગરિકોને સેનામાંથી મુક્ત કરાવીને સ્વદેશ પરત લાવવામાં આવ્યા છે, જ્યારે દુર્ભાગ્યવશ આ સંઘર્ષમાં 51 ભારતીયોના મોત નીપજ્યાં છે. બાકીના બચેલા નાગરિકોની સુરક્ષિત મુક્તિ અને વતન વાપસી માટે ભારત સરકાર રશિયન સમકક્ષો સાથે સતત ઉચ્ચસ્તરીય વાટાઘાટો કરી રહી છે.
વિદેશ સચિવ મિસત્રીએ સ્પષ્ટતા કરી છે કે રશિયન સશસ્ત્ર બળોમાં ભારતીયોની ગેરકાયદેસર કે જોખમી ભરતીનો આ ગંભીર વિષય ભારત અને રશિયા વચ્ચે અનેક સ્તરે અનેકવાર ઉઠાવવામાં આવ્યો છે. મોસ્કો સ્થિત ભારતીય દૂતાવાસ આ પ્રત્યેક મામલાની ઝીણવટભરી દેખરેખ રાખી રહ્યું છે. ભારતનો મુખ્ય ઉદ્દેશ્ય રશિયન સેનામાં હજુ પણ હાજર તમામ ભારતીયોને વહેલી તકે સેવામુક્ત કરાવીને તેમના પરિવારજનો પાસે સુરક્ષિત પરત લાવવાનો છે. નવી દિલ્હી આ મામલે રશિયન પક્ષના સતત સંપર્કમાં છે.
આ નિવેદન પ્રધાનમંત્રી નરેન્દ્ર મોદી અને રશિયાના રાષ્ટ્રપતિ પુતિન વચ્ચે એસસીઓ સંમેલન દરમિયાન યોજાયેલી દ્વિપક્ષીય બેઠક બાદ સામે આવ્યું છે. આ બેઠક દરમિયાન પીએમ મોદીએ યુદ્ધને સમાપ્ત કરવા અને શાંતિ તથા સંવાદના માર્ગે આગળ વધવાની આવશ્યકતા પર ભાર મૂક્યો હતો.
