AAP સાંસદ રાઘવ ચઢ્ઢાનું સભ્યપદ પુનઃસ્થાપિત,રાજ્યસભા વિશેષાધિકાર સમિતિએ સસ્પેન્શન રદ કર્યું
દિલ્હી – આમ આદમી પાર્ટીના સાંસદ રાઘવ ચઢ્ઢાને સસ્પેન્ડ કરવાના મુદ્દે આજે સંસદમાં રાજ્યસભાની વિશેષાધિકાર સમિતિની બેઠક મળી હતી. આ દરમિયાન અધ્યક્ષ જગદીપ ધનખરે ચઢ્ઢાને ગૃહમાં પાછા આવવાની મંજૂરી આપી હતી.
સભ્ય પદ પરત મળવાની બાબતને લઈને AAP સાંસદ રાઘવ ચઢ્ઢાએ કહ્યું કે, મને 11 ઓગસ્ટે રાજ્યસભામાંથી સસ્પેન્ડ કરવામાં આવ્યો હતો. હું મારું સસ્પેન્શન રદ કરવા માટે સુપ્રીમ કોર્ટમાં ગયો હતો. સુપ્રીમ કોર્ટે આની નોંધ લીધી અને હવે 115 દિવસ બાદ મારું સસ્પેન્શન રદ કરવામાં આવ્યું છે. હું ખુશ છું કે મારું સસ્પેન્શન પાછું ખેંચી લેવામાં આવ્યું છે.
અધ્યક્ષ જગદીપ ધનખરે કહ્યું કે ભાજપના સાંસદ જીવીએલ નરસિમ્હા રાવ દ્વારા દાખલ કરાયેલા પ્રસ્તાવ પર AAP સાંસદ રાઘવ ચઢ્ઢાનું સસ્પેન્શન રદ કરવામાં આવ્યું છે. તેમણે કહ્યું કે વિશેષાધિકાર સમિતિને AAP સાંસદના સસ્પેન્શનની અવધિ પર્યાપ્ત જણાય છે.
ઉલ્લેખનીય છે કે 11 ઓગસ્ટે ગૃહના નેતા પીયૂષ ગોયલે રાજ્યસભામાં એક પ્રસ્તાવ રજૂ કર્યો હતો. પ્રસ્તાવિત પસંદગી સમિતિમાં કેટલાક સભ્યોના નામ તેમની સંમતિ વિના સામેલ કરવા બદલ AAP નેતા રાઘવ વિરુદ્ધ કાર્યવાહીની માંગ કરવામાં આવી હતી.
આ સાથે જ રાજ્યસભાએ ઠરાવ પસાર કર્યા પછી, વિશેષાધિકાર સમિતિના અહેવાલને પેન્ડિંગ રાખવા માટે ચડ્ઢાને “નિયમોના ઘોર ઉલ્લંઘન, ગેરવર્તણૂક, બેફામ વલણ અને તિરસ્કારપૂર્ણ વર્તન” માટે ચોમાસા સત્રના છેલ્લા દિવસે સસ્પેન્ડ કરવામાં આવ્યા હતા.
tags:
Raghava Chadha
