સુરતઃ ડીઝલના ભાવમાં વધારો થતા બાયોડીઝલનો ગેરકાયદે વપરાશ વધી જતાં રાજ્યના પોલીસ વડાએ ગેરકાયદે ડીઝલના વેચાણ સામે કડક કાર્યવાહી કરવા પોલીસને આદેશ કર્યો હતો. દરમિયાન પ્રિવેન્શન ઓફ ક્રાઈમ બ્રાંચની ટીમ (પીસીબી) દ્વારા શહેરના ગોડાદરા વિસ્તારમાં પાડવામાં આવેલા દરોડા દરમિયાન બાયોડીઝલના નામે કેમિકલનું કથિત રીતે વેચાણ કરતા છ આરોપીઓની ધરપકડ કરી હતી. આરોપીઓએ બસ તેમજ ટ્રકના માલિકોને ઈંધણ તરીકે 75 રૂપિયા પ્રતિ લિટર પ્રમાણે સામગ્રી વેચી હતી. પોલીસે આરોપીઓ પાસેથી કેમિકલ લિક્વિડ ડીઝલ વાહનોમાં ભરવા માટે વપરાતા બે ફ્યૂઅલ પંપ સહિત 14 લાખ રૂપિયાનો સામાન જપ્ત કર્યો હતો.
સુરત પોલીસે જનક રત્ન નાગેશ્રી (ઉં. વ. 24) અને રાજ કરશણ કટારિયા (ઉં.વ. 24)ની પર્વત મગોબ ઓવરહેડ ટેન્ક પાસે આવેલી આરટીડબલ્યૂ બિલ્ડિંગ નજીકના એક ખુલ્લા પ્લોટમાં બનેલા શેડમાંથી ધરપકડ કરી હતી. પ્લોટમાંથી મળી આવેલા ટેન્કમાં 8.10 લાખ રૂપિયાની કિંમતનું 10,800 લિટર કેમિકલનો સંગ્રહ કરવામાં આવ્યો હતો. ટેન્ક સિવાય સ્થળ પરથી 12 લાખ રૂપિયાના ડિલિવરી વ્હીકલ અને ફ્લૂઅલ ટેન્ક જપ્ત કરવામાં આવ્યા હતા.
અન્ય દરોડામાં, નકલી બાયોડીઝલ વેચવા બદલ પોલીસે સુધીર વાઘમશી (ઉં.વ. 32), દિલીપ બાલા ગુર્જર (ઉં.વ. 34), ધીરુ પંચા કટારિયા (ઉં.વ. 32) અને અશોક શામજી બલદાણિયાની (ઉં.વ 39) ધરપકડ કરી હતી. તેઓ ગોડાદરાના એક ગોડાઉનમાં ઈંધણ વેચતા પકડાયા હતા. પોલીસે 32,250 રૂપિયાની કિંમતનું 430 લિટર કેમિકલ જપ્ત કર્યું હતું. બાયોડીઝલનું પ્રવાહી કેવી રીતે બનાવવામાં આવ્યું હતું અને તેમાં કઈ સામગ્રી ભેળવવામાં આવી હતી તેની જાણ હજી થઈ નથી. આરોપીઓ કેમિકલ વેચવાની પરવાનગી આપતા દસ્તાવેજો રજૂ કરી શક્યા નહોતા. આ કોઈ મોટા કૌભાંડનો ભાગ હોવાનું લાગી રહ્યું છે’, તેમ પીસીબીના પોલીસ ઈન્સપેક્ટર સંજય ભાટિયાએ જણાવ્યું હતું. અગાઉ, પીસીબીએ સરથાણા વિસ્તારમાં રાસાયણિક મિશ્રણને બાયોડિઝલ તરીકે વેચવાના રેકેટનો પર્દાફાશ કર્યો હતો.
