નવી દિલ્હી: દેશની રાજધાની દિલ્હીમાં પ્રદૂષણની ગંભીર પરિસ્થિતિને ધ્યાનમાં રાખીને દિલ્હી સરકારે કેટલાક સખત નિર્ણયો લીધા છે. દિલ્હી સરકારે જાહેરાત કરી છે કે ગુરુવાર (18 ડિસેમ્બર) થી જે વાહનો પાસે માન્ય પ્રદૂષણ નિયંત્રણ પ્રમાણપત્ર (PUCC) નહીં હોય તો, તેમને પેટ્રોલ પંપ પર ઇંધણ આપવામાં આવશે નહીં. એટલે કે, હવે વાહનમાં ઓઈલ ભરાવવા માટે PUCC હોવું ફરજિયાત રહેશે.
દિલ્હી સરકારે સ્પષ્ટ કર્યું છે કે પ્રદૂષણ પર નિયંત્રણ મેળવવા માટે સખત પગલાં લેવામાં આવી રહ્યાં છે. ગુરુવારથી જે વાહનો પાસે પ્રદૂષણ સર્ટિફિકેટ નહીં હોય તેમને પેટ્રોલ નહીં મળે. દિલ્હીની બહારના રાજ્યોમાંથી આવતા BS-6 ધોરણથી ઓછા તમામ વાહનોને (ખાનગી વાહનો સહિત) ગુરુવારથી સીલ કરવામાં આવશે. દિલ્હીમાં કોઈ પણ ટ્રક બાંધકામનો સામાન લાવશે તો તે ટ્રકને સીલ કરી દેવામાં આવશે. વાહનોના પ્રદૂષણ સર્ટિફિકેટ ચેક કરવા માટે કેમેરાનો ઉપયોગ કરવામાં આવશે. પર્યાવરણ મંત્રી મનજિંદર સિંહ સિરસાએ જણાવ્યું કે દિલ્હીમાં પ્રદૂષણની સ્થિતિ ‘ફેર સ્ટેજ’ પર છે અને છેલ્લા 10 વર્ષથી આ જ સ્તર પર છે. તેમણે કહ્યું કે ગયા વર્ષે AQI 380 હતો, જે હાલમાં 363 છે. તેમણે દાવો કર્યો કે સરકારે સતત કામ કર્યું છે અને ગત વર્ષની સરખામણીમાં પ્રદૂષણ ઓછું છે.
મંત્રીએ જણાવ્યું કે દિલ્હી સરકારે કચરાના પહાડને 15 મીટર સુધી ઘટાડવામાં સફળતા મેળવી છે અને 202 એકર જમીનમાંથી 45 એકરને સાફ કરી દેવામાં આવી છે. દિલ્હીના ઔદ્યોગિક વિસ્તારોમાં ‘નોન-કમ્ફર્ટ’ એકમોને નિયમન હેઠળ લાવવામાં આવ્યા છે. DPCC એ 2 હજારથી વધુ નોટિસ જારી કરી છે. ડીઝલ જનરેટર પર કાર્યવાહી કરવામાં આવી છે અને અત્યાર સુધીમાં 3200 જનરેટર પર પગલાં લેવાયા છે. સરકારે બાયોગેસના ઉપયોગ માટે 10 હજાર હીટરનું વિતરણ કર્યું છે. સિરસાએ જણાવ્યું કે ગયા વર્ષની તુલનામાં નવેમ્બરમાં AQIમાં 20 પોઇન્ટનો ઘટાડો થયો છે. દિલ્હીમાં 5300 બસોમાંથી 3427 ઇલેક્ટ્રિક (EV) બસો લાવવામાં આવી છે. પ્રદૂષણને અંકુશમાં લેવા માટે વૈજ્ઞાનિકોની એક ટીમ બનાવવામાં આવી છે, જેની પ્રથમ બેઠક 12મી તારીખે થઈ ચૂકી છે.
