નવી દિલ્હી, 02 સપ્ટેમ્બર 2026: ભારત અને યુનાઇટેડ સ્ટેટ્સ મહત્વપૂર્ણ ખનિજોના ક્ષેત્રે વધુ ગાઢ સહયોગ સાધવા માટે સંમત થયા છે. નાણામંત્રી નિર્મલા સીતારમણ અને યુએસ ટ્રેઝરી સેક્રેટરી સ્કોટ બેસેન્ટ વચ્ચેની બેઠક બાદ આ સમજૂતી થઈ છે. આ સમજૂતીનો ઉદ્દેશ્ય બંને દેશો વચ્ચેની લાંબા સમયથી ચાલી આવતી આર્થિક ભાગીદારીને વધુ મજબૂત બનાવવાનો છે.
નાણાં મંત્રીઓ અને સેન્ટ્રલ બેંકના ગવર્નરોની G-20 બેઠક દરમિયાન ગઈકાલે નોર્થ કેરોલિનાના એશવિલેમાં બંને નેતાઓ મળ્યા હતા. આ બેઠક દરમિયાન ભારત-અમેરિકા વચ્ચેના આર્થિક સંવાદમાં મહત્વપૂર્ણ ખનિજો અને સુરક્ષિત પુરવઠા શૃંખલાઓ અંગેની ચર્ચાઓ મુખ્ય કેન્દ્રસ્થાને રહી હતી. તેમના લાંબા સમયથી ચાલતા સંબંધોને વધુ મજબૂત બનાવતા, બંને પક્ષોએ વિવિધ ક્ષેત્રોમાં સહયોગ વધારવાની પ્રતિબદ્ધતા વ્યક્ત કરી હતી.
આ પ્રસંગે, નાણામંત્રી સીતારમણે બેસન્ટને ભારત-અમેરિકા આર્થિક અને નાણાકીય ભાગીદારી બેઠક માટે આ વર્ષના ઉત્તરાર્ધમાં ભારતની મુલાકાત લેવાનું આમંત્રણ પણ આપ્યું હતું. આ પ્રસ્તાવિત મુલાકાત બંને દેશોની સરકારોને આર્થિક અને નાણાકીય સહયોગની સમીક્ષા કરવાની અને ભાગીદારીનો વ્યાપ વધારી શકાય તેવા ક્ષેત્રોની ઓળખ કરવાની વધુ એક તક પૂરી પાડશે.
વધુ વાંચો: કૃષિ મંત્રી શિવરાજ સિંહ ચૌહાણે પ્રધાનમંત્રી ધન-ધાન્ય કૃષિ યોજનાની સમીક્ષા કરી
