કોલકાતા, 30 ડિસેમ્બર 2025 : પશ્ચિમ બંગાળમાં આગામી વિધાનસભા ચૂંટણીને લઈને રાજકીય ગરમાવો તેજ થયો છે. કેન્દ્રીય ગૃહ મંત્રી અમિત શાહ હાલ બંગાળના પ્રવાસે છે, જ્યાં તેમણે એક પત્રકાર પરિષદ સંબોધતા મમતા બેનર્જીની સરકાર પર આકરા પ્રહારો કર્યા હતા. શાહે સ્પષ્ટ શબ્દોમાં જણાવ્યું હતું કે, બંગાળમાં ભાજપની સરકાર બનતા જ ઘૂસણખોરી નાબૂદ કરવામાં આવશે અને ઘૂસણખોરોને વીણી-વીણીને બહાર કાઢવામાં આવશે.
- “માણસ તો શું, પક્ષી પણ પાંખ નહીં મારી શકે”
અમિત શાહે પશ્ચિમ બંગાળની જનતાને આશ્વાસન આપતા કહ્યું કે, “વડાપ્રધાન મોદીના નેતૃત્વમાં ભાજપ સરકાર બંગાળના ભવ્ય વારસાને પુનર્જીવિત કરશે. અમે એક એવી મજબૂત ‘નેશનલ ગ્રીડ’ બનાવીશું જેનાથી સરહદ પારથી થતી ઘૂસણખોરી સંપૂર્ણપણે બંધ થઈ જશે. અમે એવી સુરક્ષા વ્યવસ્થા કરીશું કે માણસ તો શું, એક પક્ષી પણ સરહદ ઓળંગીને અંદર નહીં આવી શકે.”
આ પણ વાંચોઃ બંગાળમાં ભાજપની સરકાર બનતા જ ઘૂસણખોરી પર લાગશે બ્રેક: અમિત શાહ
બાંગ્લાદેશ સરહદ પર ફેન્સિંગ (તારબંધી) અંગે મમતા સરકારને ઘેરતા ગૃહ મંત્રીએ સવાલ કર્યો હતો કે, “પશ્ચિમ બંગાળ સરકાર બાંગ્લાદેશ સરહદ પર તારબંધી માટે જમીન કેમ નથી આપી રહી? ત્રિપુરા, આસામ, રાજસ્થાન અને ગુજરાતની સરહદો પર ઘૂસણખોરી અટકી ગઈ છે, તો બંગાળમાં કેમ ચાલુ છે? આ એટલા માટે કારણ કે અહીં તમારી દેખરેખ હેઠળ ઘૂસણખોરી થાય છે જેથી વસ્તીનું સંતુલન બગાડીને વોટબેંક મજબૂત કરી શકાય.”
- ભ્રષ્ટાચાર અને વિકાસનો મુદ્દો
અમિત શાહે મમતા બેનર્જી પર ભ્રષ્ટાચારનો આરોપ લગાવતા કહ્યું કે: છેલ્લા 14 વર્ષથી ડર અને ભ્રષ્ટાચાર બંગાળની ઓળખ બની ગયા છે. કેન્દ્રની લોકકલ્યાણકારી યોજનાઓ અહીં ‘ટોલ સિન્ડિકેટ’નો ભોગ બની રહી છે. બંગાળની ભૂમિ ભાજપ માટે અત્યંત મહત્વની છે કારણ કે જનસંઘના સ્થાપક ડો. શ્યામા પ્રસાદ મુખર્જી આ ભૂમિના સંતાન હતા.
શાહે વિશ્વાસ વ્યક્ત કરતા કહ્યું કે, “15 એપ્રિલ 2026 પછી જ્યારે પશ્ચિમ બંગાળમાં ભાજપની સરકાર બનશે, ત્યારે અમે ‘બંગ ગૌરવ’ અને ‘બંગ સંસ્કૃતિ’ને ફરીથી જીવંત કરીશું. આગામી ચૂંટણી રાજ્યમાં ઘૂસણખોરી રોકવા અને રાષ્ટ્રીય સુરક્ષાના મુદ્દા પર લડવામાં આવશે.”
