રાજસ્થાન રોયલ્સના કેપ્ટન સંજુ સેમસનને ગુજરાત ટાઇટન્સ સામેની ઇન્ડિયન પ્રીમિયર લીગ (IPL) મેચ દરમિયાન સ્લો ઓવર રેટ બદલ 24 લાખ રૂપિયાનો મોટો દંડ ફટકારવામાં આવ્યો છે. અમદાવાદના નરેન્દ્ર મોદી સ્ટેડિયમ ખાતે રમાયેલી આ મેચ ગુજરાત ટાઇટન્સે 58 રનથી જીતી લીધી હતી.
218 રનના લક્ષ્યાંકનો પીછો કરવા ઉતરેલી રાજસ્થાન રોયલ્સ 19.2 ઓવરમાં 159 રનમાં ઓલઆઉટ થઈ ગઈ હતી. “રાજસ્થાન રોયલ્સના કેપ્ટન સંજુ સેમસનને અમદાવાદના નરેન્દ્ર મોદી સ્ટેડિયમમાં ગુજરાત ટાઇટન્સ સામે ટાટા ઇન્ડિયન પ્રીમિયર લીગ (IPL) 2025 મેચ દરમિયાન ધીમો ઓવર રેટ જાળવવા બદલ દંડ ફટકારવામાં આવ્યો છે,” તેમ IPL એ એક નિવેદનમાં જણાવ્યું હતું.
નિવેદનમાં જણાવ્યા અનુસાર, “આઈપીએલ આચારસંહિતાની કલમ 2.22 હેઠળ સ્લો ઓવર-રેટ સંબંધિત આ સિઝનમાં તેની ટીમનો આ બીજો ગુનો હતો, તેથી સેમસન પર 24 લાખ રૂપિયાનો દંડ ફટકારવામાં આવ્યો છે.”
“ઇમ્પેક્ટ પ્લેયર સહિત પ્લેઇંગ ઇલેવનના અન્ય ખેલાડીઓને 6 લાખ રૂપિયા અથવા તેમની મેચ ફીના 25 ટકા, જે ઓછું હોય તે દંડ ફટકારવામાં આવ્યો છે,” નિવેદનમાં જણાવાયું છે. ગુજરાત ટાઇટન્સ હાલમાં પાંચ મેચમાં ચાર જીત અને એક હાર સાથે ટેબલમાં ટોચ પર છે, જ્યારે રાજસ્થાન રોયલ્સ પાંચ મેચમાં બે જીત અને ત્રણ હાર સાથે સાતમા સ્થાને છે.
