મહારાષ્ટ્રઃ રાજ્યસભાની ચૂંટણીમાં સંજય રાઉતને હરાવવા શિંદેજૂથે નક્કી કર્યું હતું

મુંબઈઃ એકનાથ શિંદેના નેતૃત્વમાં શિવસેનાના ધારાસભ્યો રાજ્યસભાની ચૂંટણી પહેલા જ બળવાની તૈયારી કરી રહ્યા હતા. તેમણે રાજ્યસભાની ચૂંટણીમાં સંજય રાઉતને હરાવવા માટે ફોર્મ્યુલા તૈયાર કરી હતી. મીડિયા રિપોર્ટ અનુસાર, શિંદે કેમ્પના એક ધારાસભ્ય ચર્ચગેટ સ્ટેશનની સામે આવેલા એશિયન ડિપાર્ટમેન્ટલ સ્ટોરમાં ગયા હતા. તેણે દસ નાની ટૂથપેસ્ટ ખરીદી હતી.

સુત્રોના જણાવ્યા અનુસાર, આ દસ ટૂથપેસ્ટ દ્વારા દસ ધારાસભ્યોના મત અમાન્ય જાહેર કરવાનો પ્રયાસ કરવાનો પ્લાન ઘડવામાં આવ્યો હતો. આ માટે તેણે પોતાની આંગળી પર થોડી ટૂથપેસ્ટ લગાવી હતી. વ્યૂહરચના મતપેટીમાં થોડી પેસ્ટ કરવાની હતી જેથી મત અસ્પષ્ટ અથવા ભૂંસી નાખવામાં આવે અને અમાન્ય જાહેર કરવામાં આવે. જોકે બાદમાં વ્યૂહરચના બદલાઈ હતી.

બળવાખોર ધારાસભ્યોએ કહ્યું કે અમારો સંજય રાઉતને અપમાનિત કરવાનો ઈરાદો નથી. જો આપણે આમ કરીશું તો ઉદ્ધવ ઠાકરે સાવચેત થઈ જશે. શિંદે જૂથના ધારાસભ્યો સતત ઉદ્ધવ ઠાકરેના સન્માનની વાત કરે છે, પરંતુ તેઓ સંજય રાઉતથી ખૂબ નારાજ છે. તેઓએ રાઉતને NCP સુપ્રીમો શરદ પવારના એજન્ટ તરીકે પણ જાહેર કર્યા છે.

શિંદે જૂથનું કહેવું છે કે, સંજય રાઉત એનસીપી સાથે ગઠબંધન કરીને શિવસેનાને નબળી પાડવાનો પ્રયાસ કરી રહ્યા છે. ધારાસભ્યોએ શિવસેના પર હિન્દુત્વની વિચારધારાથી ભટકવાનો પણ આરોપ લગાવ્યો હતો.