હવામાન વિભાગની આગાહી, ઉત્તર ભારતમાં અતિભારે અને દક્ષિણ ભારતમાં સામાન્ય ચોમાસુ રહેવાની સંભાવના
નવી દિલ્હી: ભારતીય હવામાન વિભાગે વર્ષ 2022 માટે દક્ષિણ પશ્ચિમ ચોમાસાની આગાહી જાહેર કરી છે. વિભાગના જણાવ્યા અનુસાર, મોનસૂન મોસમી વરસાદનું એલપીએ 99% રહેવાની સંભાવના છે અને તેમાં 5% ઘટાડો અથવા વધારો થઈ શકે છે. એવો પણ અંદાજ છે કે સમગ્ર દેશમાં ચોમાસું એકસરખું રહી શકે છે.
ભારતના ઉત્તરીય ભાગો અને મધ્ય ભારતના આસપાસના ભાગો, હિમાલયની તળેટી અને ઉત્તર પશ્ચિમ ભારતના ભાગોમાં સામાન્યથી વધુ વરસાદની સંભાવના છે. પૂર્વોત્તર ભારતના ઘણા વિસ્તારોમાં, ઉત્તર પશ્ચિમ ભારતના કેટલાક વિસ્તારો અને દક્ષિણ ભાગોમાં સામાન્ય કરતાં ઓછા વરસાદની આગાહી કરવામાં આવી છે.
હવામાન વિભાગે 1971-2020ના સમયગાળામાં સરેરાશ 87 સેમીના આધારે આ અનુમાન લગાવ્યું છે. એટલે કે તેમાં વરસાદ (LPA) મુજબ 96% થી 104% રહેશે. આ માટે વિભાગે દેશભરના 4132 રેલવે સ્ટેશનો પરથી મળેલા ડેટાનો ઉપયોગ કર્યો છે.
હવામાન વિભાગના ડેટા અનુસાર, 1971-2020ના આધારે દક્ષિણ પશ્ચિમ ચોમાસા માટે અખિલ ભારતીય સ્તરે સામાન્ય વરસાદ 868.6 મીમી છે. અગાઉ તે 1961-2010ના આધારે 880.6 મીમી હતો. એટલે કે એક દાયકાની અંદર 12 સેમીનો તફાવત જોવા મળ્યો છે. જેના કારણે હવે ઓછો વરસાદ સામાન્ય ગણાય છે.
2021માં, દેશમાં જૂનથી સપ્ટેમ્બર સુધીના ચાર મહિનાના દક્ષિણપશ્ચિમ ચોમાસાની મોસમ દરમિયાન સામાન્ય વરસાદ થયો હતો. આ સતત ત્રીજું વર્ષ હતું જ્યારે દેશમાં સામાન્ય અથવા સામાન્ય કરતાં વધુ વરસાદ નોંધાયો હતો. અગાઉ 2019 અને 2020માં વરસાદ સામાન્ય કરતાં વધુ હતો. આ દૃષ્ટિએ આ ચોથું વર્ષ હશે જ્યારે વરસાદ સામાન્ય રહેવાની આગાહી કરવામાં આવી છે. જો કે, વિભાગે મે 2022ના છેલ્લા અઠવાડિયામાં ફરી એકવાર આગાહી જાહેર કરવાની જાહેરાત કરી છે.
