મિઝોરમ ચૂંટણી: 174માંથી 112 ઉમેદવારો કરોડપતિ, આમ આદમી પાર્ટીના ઉમેદવાર સૌથી વધારે ધનીક
નવી દિલ્હીઃ મણિપુર વિધાનસભાની ચૂંટણીમાં નસીબ અજમાવી રહેલા 174 ઉમેદવારોમાંથી 112 કરોડપતિ છે અને તેમાંથી, આમ આદમી પાર્ટી (AAP) રાજ્ય એકમના પ્રમુખ એન્ડ્રુ લાલરેમકીમા પાચુઆઉ લગભગ 69 કરોડ રૂપિયાની જાહેર સંપત્તિ સાથે સૌથી ધનિક છે. એક સમાચાર એજન્સી પાસે ઉપલબ્ધ ઉમેદવારોના સોગંદનામા મુજબ, 64.4 ટકા ઉમેદવારોએ 1 કરોડ રૂપિયા અથવા તેનાથી વધુની સંપત્તિ જાહેર કરી છે.
એન્ડ્ર્યુ આઈઝોલ નોર્થ-III મતવિસ્તારથી ચૂંટણી લડી રહ્યા છે. કોંગ્રેસના આર વનલલાતલુઆંગા (સેરછિપ સીટ) સૌથી વધુ જાહેર કરાયેલી સંપત્તિના સંદર્ભમાં બીજા સ્થાને છે. તેમણે રૂ. 55.6 કરોડની સંપત્તિ જાહેર કરી છે, જ્યારે જોરમ પીપલ્સ મૂવમેન્ટ (ZPM)ના એચ ગિંજલાલા (ચંપાઇ ઉત્તર) રૂ. 36.9 કરોડની જાહેર સંપત્તિ સાથે ત્રીજા સ્થાને છે. એફિડેવિટ મુજબ તેમની આવકનો સ્ત્રોત બિઝનેસ છે. સેરછિપ બેઠક પરથી અપક્ષ ઉમેદવાર રામહલુન-એડેના પાસે સૌથી ઓછી સંપત્તિ છે. તેમની પાસે 1,500 રૂપિયાની જંગમ સંપત્તિ છે.
ચૂંટણી પંચની વેબસાઈટ પર અપલોડ કરેલા તેમના સોગંદનામામાં, લૌંગતલાઈ પશ્ચિમથી ભાજપના ઉમેદવાર જેબી રુલચિંગાએ ખોટી રીતે તેમની સંપત્તિ 90.32 કરોડ રૂપિયાની જાહેર કરી છે. પાર્ટીએ ચૂંટણી વિભાગને તેમાં સુધારો કરવા વિનંતી કરી છે. અગાઉ, મિઝો નેશનલ ફ્રન્ટ (MNF) ના ઉમેદવાર લાલરીનાંગા સેલો (હાચેક) 2018ની વિધાનસભા ચૂંટણીમાં 100 કરોડ રૂપિયાની જાહેર સંપત્તિ સાથે સૌથી ધનિક ઉમેદવાર હતા.
આ પછી MNFના રોબર્ટ રોમાવિયા રોયટે (Aizawl East-II) રૂ. 44 કરોડની સંપત્તિ ધરાવે છે. આ વખતે સેલોની સંપત્તિ ઘટીને રૂ. 26.24 કરોડ અને રોયટેની સંપત્તિ રૂ. 32.24 કરોડ થઈ છે. ચૂંટણી લડનાર 16 મહિલા ઉમેદવારોમાં કોંગ્રેસના ઉમેદવાર મરિયમ એલ. હ્રાંગચલ (લુંગલી દક્ષિણ) 18.63 કરોડની સંપત્તિ સાથે સૌથી ધનિક છે. MNFના પ્રમુખ અને મુખ્યમંત્રી જોરામથાંગા પાંચ પ્રતિસ્પર્ધી રાજકીય પક્ષોના પ્રમુખોમાં 5 કરોડ રૂપિયાની સંપત્તિ સાથે સૌથી ધનિક છે.
ZPM ના ત્રણ ઉમેદવારો અને MNF અને ભારતીય જનતા પાર્ટી (BJP) ના એક-એક સામે ફોજદારી કેસ પેન્ડિંગ છે, જ્યારે 2018ની ચૂંટણીમાં ઝોરામથાંગા અને ભૂતપૂર્વ મુખ્ય પ્રધાન લાલ થનહાવલા સહિત નવ ઉમેદવારો સામે ફોજદારી કેસ પેન્ડિંગ હતા. તુઇચાંગ બેઠક પરથી બીજી વખત ચૂંટણી લડી રહેલા નાયબ મુખ્યમંત્રી તવાનલુઇયા સૌથી વયોવૃદ્ધ ઉમેદવાર છે. તેઓ 80 વર્ષના છે, જ્યારે મહિલા ઉમેદવાર લાલરુઆતફેલી હ્લાવાન્ડો અને ભાજપના ઉમેદવાર એફ વાનમિંગથાંગા સૌથી યુવા ઉમેદવાર છે. તેની ઉંમર 31 વર્ષ છે.
