નવી દિલ્હી, 15 ઓક્ટોબર 2026: અભિનેતા ઈમરાન ખાન જે આમિર ખાનના ભત્રીજા છે અને ‘જાને તૂ… યા જાને ના’ તથા ‘મેરે બ્રધર કી દુલ્હન’ જેવી ફિલ્મોમાં પોતાની ભૂમિકાઓ માટે જાણીતા છે તેઓ મુશ્કેલીમાં મુકાયા છે. એક વિરોધ પ્રદર્શન બાદ, મુંબઈ પોલીસે અભિનેતાને નોટિસ પાઠવી છે, જેમાં તેમને 28 ઓક્ટોબર સુધીમાં ભારત છોડી દેવાનો આદેશ આપવામાં આવ્યો છે.
ઈમરાન ખાનને મુંબઈ પોલીસ તરફથી નોટિસ કેમ મળી?
સમાચાર એજન્સી ANI ના અહેવાલો અનુસાર, મુંબઈ પોલીસે અભિનેતા ઈમરાન ખાનને ‘લીવ ઈન્ડિયા નોટિસ’ (LIN) જારી કરી છે. આ નોટિસમાં તેમને 28 ઓક્ટોબર સુધીમાં ભારત છોડી દેવાનો નિર્દેશ આપવામાં આવ્યો છે. 10 ઓક્ટોબરના રોજ, ઈમરાન ખાને મુંબઈના ઓગસ્ટ ક્રાંતિ મેદાનમાં યોજાયેલા એક વિરોધ પ્રદર્શનમાં ભાગ લીધો હતો, જેમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરવામાં આવી હતી. આ વિરોધ પ્રદર્શન દરમિયાન, પોલીસે અભિનેતાને પણ કસ્ટડીમાં લીધા હતા. નોટિસ અનુસાર, ઈમરાન ખાન ભારતીય નાગરિક નથી; તેમ છતાં તેમણે વિરોધ પ્રદર્શનમાં ભાગ લીધો હતો, જેના કારણે મુંબઈ પોલીસે તેમને આ નોટિસ પાઠવી છે.
ઈમરાન પાસે કઈ નાગરિકતા છે?
મીડિયા રિપોર્ટ્સ અનુસાર, ભાજપના નેતા કિરીટ સોમૈયાએ ઇમરાન ખાન વિરુદ્ધ ફરિયાદ નોંધાવી છે, જેમાં આરોપ લગાવવામાં આવ્યો છે કે તેઓ ભારતીય નાગરિક નથી પરંતુ યુનાઇટેડ સ્ટેટ્સ (યુએસ) નાગરિકતા ધરાવે છે. જ્ઞાનેશ કુમારના રાજીનામા અંગેના વિરોધમાં ભાગ લઈને, તેમણે કથિત રીતે વિદેશી કાયદાનું ઉલ્લંઘન કર્યું છે. ઇમરાન વિરુદ્ધ ગામદેવી પોલીસ સ્ટેશનમાં વિદેશી કાયદાના ઉલ્લંઘનની ફરિયાદ નોંધવામાં આવી છે. પોલીસના જણાવ્યા અનુસાર, આ ફરિયાદ વિદેશી પ્રાદેશિક નોંધણી કાર્યાલય (FRRO) ને પણ મોકલવામાં આવી છે.
અહેવાલો અનુસાર, ઈમરાન પાસે ‘ઓવરસીઝ સિટિઝન ઓફ ઈન્ડિયા’ (OCI) કાર્ડ છે. આ દરજ્જો વિદેશમાં વસતા ભારતીય મૂળના વ્યક્તિઓને ભારતમાં રહેવા માટે આજીવન વિઝા આપે છે; જોકે, તેમને મત આપવાનો કે ચૂંટણી લડવાનો અધિકાર નથી. કલમ 19 હેઠળ, અભિવ્યક્તિની સ્વતંત્રતા અને શાંતિપૂર્ણ વિરોધ પ્રદર્શનના અધિકારો માત્ર દેશના નાગરિકો માટે જ આરક્ષિત છે.
ઈમરાન ખાને તેની ગર્લફ્રેન્ડ સાથે એક વિરોધ પ્રદર્શનમાં લીધો હતો ભાગ
ભારતના મુખ્ય ચૂંટણી કમિશનર જ્ઞાનેશ કુમાર વિરુદ્ધ મુંબઈના ઓગસ્ટ ક્રાંતિ મેદાનમાં યોજાયેલા વિરોધ પ્રદર્શનમાં ઈમરાન ખાન એકલા નહોતા; તેમની સાથે તેમની ગર્લફ્રેન્ડ લેખા વોશિંગ્ટન અને પિતરાઈ બહેન ઝૈન મેરી ખાન પણ હતાં આ બંનેને પોલીસે કસ્ટડીમાં લઈ લીધાં હતાં.
વધુ વાંચો: ઉત્તરાખંડના દેવપ્રયાગમાં ભયાનક અકસ્માત: કાર ખીણમાં ખાબકતાં બેના મોત, ત્રણ ઘાયલ
