હવે યુઝરને અલગ ચાર્જર રાખવાની જરૂર નહીં પડે, એક ચાર્જરથી અનેક ઉપકરણોને ચાર્જ કરી શકાશે
ટાઈપ-સીને સામાન્ય ચાર્જર બનાવવાની વાત ઘણા દિવસોથી ચાલી રહી હતી.હવે ભારત સરકારે તેને સ્ટાન્ડર્ડ કેબલ બનાવી છે.મોબાઇલ ફોન, લેપટોપ, નોટબુક અને અન્ય વસ્તુઓ માટે ટાઇપ-સી ચાર્જિંગ કેબલ્સ પ્રમાણભૂત બની ગયા છે.આ સાથે, યુઝરને અલગ ચાર્જર રાખવાની જરૂર નહીં પડે. આ સુવિધા લાગુ થતાંની સાથે જ એક ચાર્જરથી અનેક ઉપકરણોને ચાર્જ કરી શકાશે.
બ્યુરો ઑફ ઇન્ડિયન સ્ટાન્ડર્ડ્સ અથવા BIS એ કહ્યું છે કે,Type-C સ્ટાન્ડર્ડ ભારતમાં વેચાતા સ્માર્ટફોન અને ઇલેક્ટ્રોનિક ઉપકરણો માટે હશે.આનાથી ચાર્જરની સંખ્યામાં ઘટાડો થશે અને લોકો એક જ ચાર્જર વડે અનેક ઉપકરણોને ચાર્જ કરી શકશે.
એટલે કે, ગ્રાહકોને દરેક વખતે નવા ઉપકરણ સાથે અલગ ચાર્જર ખરીદવાની જરૂર રહેશે નહીં. BIS એ તેના નિવેદનમાં એમ પણ કહ્યું છે કે,આનાથી ભારત સરકારના ઈ-વેસ્ટને ઘટાડવાના મિશનને હાંસલ કરવામાં મદદ મળશે.
તે વધુમાં જણાવે છે કે,અગાઉ ગ્રાહકોને વિવિધ ઈલેક્ટ્રોનિક ઉપકરણો માટે અલગ-અલગ ચાર્જરની જરૂર પડતી હતી.જેના કારણે ગ્રાહકોનો ખર્ચ પણ વધી ગયો હતો.આ ઉપરાંત ઈ-વેસ્ટમાં પણ વધારો થતો હતો અને અન્ય સમસ્યાઓ પણ થતી હતી.
રિપોર્ટમાં વધુમાં જણાવવામાં આવ્યું છે કે,દુનિયાભરના દેશો આ સમસ્યાને દૂર કરવા માટે કામ કરી રહ્યા છે.ડિસેમ્બર 2022માં કન્ઝ્યુમર અફેર્સ સેક્રેટરી રોહિત કુમાર સિંહે દાવો કર્યો હતો કે સ્ટેકહોલ્ડર્સ USB Type-Cને સ્માર્ટફોન, ટેબલેટ અને લેપટોપ માટે ચાર્જિંગ પોર્ટ બનાવવા માટે સંમત થયા છે.
હાલમાં ફોન, ટેબલેટ અને લેપટોપ માટે અલગ-અલગ ચાર્જિંગ પોર્ટનો ઉપયોગ કરવામાં આવે છે. જ્યારે આઇફોન અને ઘણા એન્ડ્રોઇડ ફોનના પોર્ટ પણ એકદમ અલગ છે.પરંતુ, આ ધોરણ પછી, તમામ કંપનીઓએ તેમના ઉપકરણો સાથે ટાઇપ સી ચાર્જિંગ પોર્ટ પ્રદાન કરવું પડશે.
