રાજકોટઃ ગુજરાતમાં ગત વર્ષે લસણનો પાક ઓછો થયો હોવાથી લસણના ભાવે રેકોર્ડ તોડ્યો છે. રાજકોટ યાર્ડમાં નવા લસણની આવક નથી ત્યારે જુના લસણનો ભાવ પ્રતિકિલો 400થી 500 રૂપિયા બોલાયો છે. સારી ક્વોલિટીવાળા એક કિલો લસણના 500 ઊપજી રહ્યા છે. ભાવમાં થયેલો આ વધારો યથાવત્ રહેવાની સંભાવના વ્યક્ત કરવામાં આવી રહી છે.
રાજકોટ માર્કેટ યાર્ડના વેપારીઓના જણાવ્યા મુજબ ચાલુ વર્ષે વાતાવરણમાં આવેલા ફેરફારો તેમજ કમોસમી વરસાદને કારણે હાલ માર્કેટિંગ યાર્ડમાં નવા લસણની આવક થતી નથી. જોકે લસણ જીવન જરૂરી વસ્તુ હોવાથી એની માગ યથાવત્ રહી છે, જેના કારણે ખેડૂતોને જૂના લસણના સારા ભાવ મળી રહ્યા છે. રાજકોટ સહિતના યાર્ડમાં એક કિલો લસણના ભાવ 400થી 500 રૂપિયા સુધીના જોવા મળ્યા છે. જ્યારે સારી ક્વોલિટીનું એક કિલો લસણ 500 કરતાં વધુ કિંમતે વેચાઈ રહ્યું છે. એવામાં છૂટક બજારમાં પણ લસણના ભાવ આસમાને પહોંચ્યા છે.
રાજકોટ યાર્ડના વેપારીઓના કહેવા મુજબ સામાન્ય રીતે ફેબ્રુઆરી મહિનામાં જૂનું લસણ ખૂટે નહીં એવો ઇતિહાસ છે. એને બદલે હાલ દેશભરના તમામ યાર્ડમાં હાલ જૂનું લસણ પૂર્ણતાના આરે છે. ગયા વર્ષે લસણનો પાક ખૂબ ઓછો હતો અને સારું લસણ બજારમાં ઓછું આવ્યું હતું, જેના કારણે આ લસણનો ખેડૂતોને સારોએવો ભાવ મળ્યો હતો. સારો ભાવ મળતાં મોટા ભાગના ખેડૂતોએ લસણ વેચી નાખ્યું હોવાથી ફેબ્રુઆરી મહિનામાં જ લસણનો સ્ટોક ઓછો છે તેમજ નવા લસણની આવક મોડી હોવાને કારણે હવે જે લસણ બચ્યું એના ભાવમાં વધારો જોવા મળ્યો છે. જૂના લસણમાં હાલ ઝીણા અને મધ્યમ કદનાં લસણ 20 કિલોએ 3થી લઈને 4 હજાર સુધીમાં વેચાય છે. આ સાથે જ સારી ક્વોલિટીનું લસણ 4 હજારથી શરૂ થઈને 7,000 સુધીમાં વેચાઈ રહ્યું છે. રાજકોટ યાર્ડમાં સૌરાષ્ટ્રના બધા જિલ્લાઓનું લસણ આવે છે. આ સિવાય મધ્યપ્રદેશ રાજ્યના અલગ અલગ જિલ્લાઓમાંથી મોટા પ્રમાણમાં લસણ વેચાવા માટે આવી રહ્યું છે, જેના પણ 2500થી લઈને 5,000 સુધીના ભાવ બોલાઈ રહ્યા છે.
