ચોટિલાના ડુંગર પર મા ચામુંડાના દર્શન માટે જવા પગથિયા નહીં ચડવા પડે, રોપ-વેને મંજુરી
સુરેન્દ્રનગર: ગુજરાત સરકારે રાજ્યના સુરેન્દ્રનગર સ્થિત ચોટીલાના ડુંગર પર રોપ-વે બનાવવાની મંજૂરી આપી છે, ડુંગર પર દેવી ચામુંડાનું સુપ્રસિદ્ધ મંદિર આવેલું છે. દર્શનાર્થીઓને પગથિયા ચડીને માતાજીના દર્શન કરવા જવું પડે છે. જેમાં ઘણાબધા વૃદ્ધો પગથિયા ન ચડી શકવાને કારણે દર્શન માટે જઈ શક્તા નથી. આથી સરકારે રોપ-વેને મંજુરી આપી દીધી છે. ગુજરાતમાં પર્વતો પર સ્થિત તીર્થસ્થાનો સુધી પહોંચવા માટેનો આ ચોથો રોપ-વે પ્રોજેક્ટ બનશે.
સૂત્રોએ જણાવ્યું હતું કે, ચોટીલા ડુંગરે રોપ-વેનો પ્રોજેક્ટ આવકારદાયક છે. રોપ-વે બન્યા બાદ ચોટીલાનો પ્રવાસન સ્થળ તરીકે વિકાસ થશે. રોપ-વે બની જવાથી પગથિયા ચડવામાં મુશ્કેલી અનુભવતા વૃદ્ધ અને બાળકો પણ મા ચામુંડાના દર્શનનો લ્હાવો લઈ શકશે. સૂત્રોના કહેવા મુજબ આબુની કંપની આ રોપ-વેનું કામ કરવાની છે. સરકારે રોપ-વેના કામ બાબતે ગેજેટ પણ પ્રસિદ્ધ કર્યું છે. જે અનુસાર આગામી 31 ડિસેમ્બર 2023 સુધીમાં કરોડોના ખર્ચે રોપ-વે તૈયાર થઈ જશે. ઉલ્લેખનીય છે કે, અમદાવાદ અને રાજકોટ મેગા સિટી વચ્ચે આવેલા ઝાલાવાડના પાંચાળ પંથકમાં ચોટીલામાં માં ચામુંડાના જ્યાં બેસણાં છે ત્યાં રોપ-વે માટે પૂર્વ મુખ્યમંત્રી વિજય રૂપાણીએ 3 વર્ષ પહેલા મહોર મારી હતી. જો કે, બિન અનુભવી કંપનીને આ કામ મળતા પ્રોજેક્ટ ખોરંભે પડ્યો હતો.
સૂત્રોએ ઉમેર્યું હતું કે, રાજસ્થાનના આબુ રોડ ઉપર આવેલી માર્શ એન્ટરટેઈનમેન્ટ પ્રાઈવેટ લિમિટેડ કંપનીને ચોટીલામાં રોપ-વે બનાવવાનું કામ મળ્યું છે. પર્યાવરણને નુકસાન ન જાય તે રીતે રોપ-વેનું કામ કરવામાં આવશે. ચોટીલા રોપ-વેની કામગીરીને મંજૂરી મળતા નાના પાળિયાદ ગામના સરપંચ સહિતના ગ્રામજનોમાં તેમજ ભક્તોમાં આનંદના માહોલ જોવા મળી રહ્યો છે. ચોટીલામાં રોપ-વેની મુસાફીનો ભાવ પણ નક્કી કરી દેવામાં આવ્યો છે. જે અનુસાર એક તરફના 100 જ્યારે બંને તરફના 130 રૂપિયા ચાર્જ થશે. આ ભાવ 2 વર્ષ માટે અમલ રહેશે તેવું જાણવા મળ્યું છે. સાથે એવી પણ માહિતી મળી છે કે, ચોટીલામાં રોપ-વે કાર્યરત થયા બાદ તેમા 8થી વધુ મુસાફરોને લઈ જઈ શકાશે નહીં.(file photo)
