વડોદરા મ્યુનિ.કોર્પોરેશન દ્વારા ફાયર બ્રિગેડ માટે 21.23 લાખના ખર્ચે વોકીટોકી ખરીદાશે
વડોદરાઃ રાજકોટના અગ્નિકાંડ બાદ વડોદરા મ્યુનિ, કોર્પોરેશન વધુ સજાગ બન્યુ છે. અને મ્યુનિ.ના ફાયર વિભાગને જરૂરી વધુ સંસાધનો પુરા પાડવાનો નિર્ણય કરાયો છે. મ્યુનિ. દ્વારા ફાયર બ્રિગેડ વિભાગ માટે 30 વોકીટોકી સેટની ખરીદી કરાશે. એક વર્ષના એર ટાઇમ ચાર્જ તથા 30 સેટના એર ટાઇમ ચાર્જ રીન્યુઅલ સહિત કુલ 21.23 લાખ ખર્ચ કરાશે. આ માટે વીએમસીની સ્ટેન્ડિંગ સમિતિના દરખાસ્ત રજૂ થઈ છે.
વડોદરામાં મ્યુનિ. દ્વારા તા.1 જુનથી ફ્લડ કંટ્રોલ શરૂ કરવામાં આવ્યો છે. આ કંટ્રોલરૂમમાં વડોદરા શહેર તથા આજુ બાજુના વિસ્તારમાં પડતા વરસાદના આંકડાની નોંધણી, મકાન પડે અથવા તો ઝાડ પડે ત્યારે તથા આગ અકસ્માત સમયે સંદેશા વ્યવહાર કરવા માટે લાંબા અંતરે વાતચીત કરવા માટે વોકી ટોકીની જરૂર પડે છે. ફાયર બ્રિગેડ પાસે હાલમાં 20 બેઝ સેટ 10 વોકીટોકી સેટ મળી કુલ 30 સેટ ઉપલબ્ધ છે. પરંતુ ચોમાસા દરમિયાન ફલડ કંટ્રોલ રૂમ ઉભો કરવા અન્ય વોકીટોકીની જરૂરિયાત પડે છે. પરંતુ ફાયર બ્રિગેડનો કંટ્રોલરૂમ તેના ઓફિસર, પાણી પુરવઠા શાખા, વ્હીકલ પુલ શાખા તથા ઉચ્ચ અધિકારીઓ માટે કુલ મળીને 60 વોકી ટોકી સેટ છ મહિના માટે ટેન્ડર પ્રક્રિયા કરી જરૂર મુજબ ભાડે લેવામાં આવતા હતા. ચાલુ વર્ષે કંટ્રોલ રૂમ માટે નવા 60 વોકીટોકી સેટ ખરીદવા માટે ચૂંટણીની આચારસંહિતા અમલમાં હોવાથી મુખ્ય નિર્વાચન અધિકારી, ગાંધીનગરની મંજૂરી મેળવીને ટેન્ડર પ્રક્રિયા હાથ ધરવામાં આવી હતી. આ માટે એક જ વેપારીનું ટેન્ડર આવ્યું હતું. ચોમાસાની ઋતુ એકદમ નજીક હોવાથી જરૂરિયાત મુજબના વોકીટોકી સેટની ખરીદી કરવી જરૂરી હતી. આ માટે વડોદરા મ્યુનિ.કમિશનરની તા.6 જૂનથી મંજૂરી મેળવવામાં આવી છે. મ્યુનિ. દ્વારા ફાયર બ્રિગેડ વિભાગ માટે 30 વોકીટોકી સેટની ખરીદી કરાશે. એક વર્ષના એર ટાઇમ ચાર્જ તથા 30 સેટના એર ટાઇમ ચાર્જ રીન્યુઅલ સહિત કુલ 21.23 લાખ ખર્ચ કરાશે. આ માટે વીએમસીની સ્ટેન્ડિંગ સમિતિએ દરખાસ્તમે મંજુરી આપી છે.
