હિંમતનગરઃ જિલ્લામાં રોડ અકસ્માતોના બનાવો વધતા જાય છે. જેમાં ઈડર-હિંમતનગર હાઈવે પર ડમ્પર અને કાર વચ્ચે અકસ્માત સર્જાતા કારમાં સવાર એક બાળકી સહીત ચારના મોત નિપજ્યા હતા. જ્યારે ચારને ઈજાઓ થઈ હતી.
સાબરકાંઠા જિલ્લાના ઇડરથી હિંમતનગર સ્ટેટ હાઈવે પર ગત રાત્રિના સમયે કાર અને ડમ્પર વચ્ચે અકસ્માત સર્જાયો હતો. હિંમતનગરથી કારમાં નેત્રામલી જતા પરિવારને ડાઈવર્ઝન કટ પર ઇડરથી હિંમતનગર તરફ પૂરઝડપે જતા ડમ્પરે અડફેટે લીધા હતા. જેમાં એક બાળકી સહિત ચારના મોત નીપજ્યા હતા, જયારે બે બાળકી સહિત ચારને ઈજાઓ થતા સારવાર અર્થે હિંમતનગર ખસેડવામાં આવ્યા હતા. આ અકસ્માતને પગલે આજુબાજુના ગ્રામ્ય વિસ્તારના લોકો દોડી આવ્યા હતા, અને પોલીસ તેમજ 108 એમ્બ્યુલન્સને જાણ કરી હતી. જાદર પોલીસે અકસ્માતનો ગુનો નોંધીને વધુ તપાસ હાથ ધરી હતી.
આ અંગે જાદર પોલીસ સ્ટેશનના સૂત્રોના જણાવ્યા મુજબ ઇડરના નેત્રામલીનો જરીવાલા પરિવાર ગુરુવારે રાત્રિના સમયે હિંમતનગરમાં તેમના સંબધીને ત્યાં જન્મ દિવસનો પ્રસંગ પૂર્ણ કરીને ત્રણ બાળકો સહિત પરિવાર કારમાં નેત્રામલી જવા નીકળ્યો હતો. નેત્રામલીથી ચાર કિમી દૂર દરામલી પાસે સ્ટેટ હાઈવે પર સમારકામ ચાલી રહ્યું છે. જેથી દિવ્ય ચેતના કોલેજ આગળ આપેલા ડાઈવર્ઝન તરફ જતા સમયે ઇડર તરફથી માતેલા સાંઢની જેમ આવેલું ડમ્પર કાર સાથે અથડાતા ગમખ્વાર અકસ્માત સર્જાયો હતો. અકસ્માતને લઈને આવતા જતા વાહનચાલકો અને આજુબાજુના લોકો દોડી આવ્યા હતા. અકસ્માતમાં એક બાળકી સહિત ચારના ઘટના સ્થળે જ મોત નીપજ્યા હતા. તો બે બાળકી સહિત ચાર ઈજાગ્રસ્તોને તાત્કાલિક સારવાર અર્થે હિંમતનગર સિવિલ હોસ્પિટલમાં ખસેડવામાં આવ્યા હતા. અકસ્માતમાં કારમાં ફસાયેલા મૃત ચાલકને લોકોએ દરવાજો તોડી બહાર કાઢ્યો હતો.
આ અકસ્માતના બનાવ અંગે 108 અને જાદર પોલીસને જાણ થતા રાત્રિના સમયે તાત્કાલિક ઘટના સ્થળે પહોંચ્યા હતા અને ઈજાગ્રસ્તોને સારવાર અર્થે હિંમતનગર સિવિલ હોસ્પિટલમાં ખસેડવામાં આવ્યા હતા. ત્યાર બાદ પોલીસે રોડ પરથી વાહનો હટાવીને ટ્રાફિક પૂર્વવત કર્યો હતો.
