નવી દિલ્હી: દેશની સૌથી મોટી ખાનગી એરલાઇન ઇન્ડિગો માટે મુશ્કેલીના સમાચાર છે. એવિએશન રેગ્યુલેટર DGCA (ડાયરેક્ટોરેટ જનરલ ઓફ સિવિલ એવિએશન) એ સ્પષ્ટ કર્યું છે કે તુર્કિયેથી લીઝ પર લેવામાં આવેલા પાંચ નેરો બોડી પ્લેનનો સમયગાળો હવે વધારવામાં આવશે નહીં. આ વિમાનોને ચલાવવા માટે માત્ર માર્ચ 2026 સુધીની જ અંતિમ પરવાનગી આપવામાં આવી છે.
રેગ્યુલેટરના જણાવ્યા અનુસાર, તુર્કિયેની કોરેન્ડન એરલાઇન્સ પાસેથી લેવામાં આવેલા પાંચ બોઈંગ 737 વિમાનોની લીઝ માર્ચ 2026 માં પૂર્ણ થશે. વોચડોગે સ્પષ્ટ શબ્દોમાં જણાવ્યું છે કે આ પરવાનગીમાં ‘સનસેટ ક્લોઝ’ લાગુ છે, જેનો અર્થ એ છે કે નિર્ધારિત સમય મર્યાદા બાદ કોઈપણ પ્રકારનું વધારાનું એક્સટેન્શન આપવામાં આવશે નહીં. હાલમાં ઇન્ડિગો 15 વિદેશી એરક્રાફ્ટ વેટ લીઝ પર ચલાવે છે, જેમાંથી સાત તુર્કિયેના છે.
મહત્વનું છે કે, અગાઉ મે મહિનામાં DGCA એ ઇન્ડિગોને ટર્કિશ એરલાઇન્સના વિમાનો માટે 31 ઓગસ્ટ સુધીનું ત્રણ મહિનાનું ‘ફાઈનલ એક્સટેન્શન’ આપ્યું હતું. આ નિર્ણય એવા સમયે આવ્યો હતો જ્યારે તુર્કિયેએ પાકિસ્તાનનું સમર્થન કર્યું હતું અને આતંકી કેમ્પો પર ભારતના હુમલાની નિંદા કરી હતી. આ રાજદ્વારી તણાવની અસર એવિએશન સેક્ટર પર પણ જોવા મળી રહી હોય તેમ જણાય છે.
ભારતીય એરલાઇન્સ હાલમાં એન્જિનની સમસ્યાઓ અને નવા વિમાનોની ડિલિવરીમાં થતા વિલંબને કારણે મુશ્કેલીનો સામનો કરી રહી છે. આ કામચલાઉ વ્યવસ્થાના ભાગરૂપે ઇન્ડિગો અને સ્પાઈસજેટ (જેની પાસે 17 વિદેશી પ્લેન છે) જેવી કંપનીઓ વિદેશી કંપનીઓ પાસેથી વેટ લીઝ પર એરક્રાફ્ટ લઈ રહી છે. જોકે, હવે રેગ્યુલેટરના કડક વલણ બાદ ઇન્ડિગોએ માર્ચ 2026 પહેલા વૈકલ્પિક વ્યવસ્થા કરવી પડશે.
