અમદાવાદઃ ગુજરાતમાં અમદાવાદ એરપોર્ટ સોનાની દાણચોરી કરનારા દાણચોરો માટે સ્વર્ગ સમાન હોય તેમ અવાર-નવાર વિદેશથી સોનુ લઈને આવતા દાણચોરો ઝડપાય છે. દરમિયાન દુબઈથી ફ્લાઈટમાં આવેલા શખ્સને રૂ. 4.21 કરોડની કિંમતના 8 કિલો સોના સાથે ઝડપી લેવામાં આવ્યો હતો. તેના સાગરિતને પણ ઝડપી લેવામાં આવ્યો હતો આ મુસાફરની તપાસમાં અન્ય આરોપીઓની સંડોવણી બહાર આવે તેવી શકયતા છે.
પ્રાપ્ત માહિતી અનુસાર દુબઈથી આવેલી અમિરાતની ફ્લાઈટમાં ઉતરેલો મુસાફર પોતાની સાથે 8 કિલો સોનુ લઈને આવ્યો હતો. પેસેન્જરે આ બેગ ડ્યૂટી ફ્રી શોપમાં કામ કરતા કર્મચારીને ગ્રીન ચેનલ પહેલા આપી દેવાની હતી. આ કર્મચારી સોનાનો જથ્થો એરપોર્ટ બહાર કાઢી આપવાનો હતો. જો કે, ચોક્કસ બાતમીના આધારે ડીઆરઆઈએ બંનેની ધરપકડ સાથે દાણચોરીમાં એરપોર્ટ પરની ડ્યૂટી ફ્રી શોપમાં કામ કરતા કર્મચારીની સંડોવણી પણ ખૂલી છે. છેલ્લા 1 મહિનામાં ડીઆરઈએ એરપોર્ટ સ્ટાફના 3 કર્મચારીની ધરપકડ કરી છે.
પ્રાથમિક પૂછપરછ દરમિયાન પેસેન્જરને કબૂલ્યું હતું કે, તેણે અગાઉ દાણચોરીનું સોનું ગ્રીન ચેનલ પહેલાં એરપોર્ટ પર એક વ્યક્તિને સોંપ્યું હતું. ગોલ્ડ મેળવનારની ઓળખ એરપોર્ટ ખાતેની ડ્યૂટી ફ્રી શોપમાં કર્મચારી તરીકે થઈ હતી. ડ્યૂટી ફ્રી શોપના કર્મચારીની ધપરકડ બાદ તેણે પ્રાથમિક પૂછપરછમાં સ્વીકાર્યું હતું કે, દાણચોરીના સોનાનું ક્ધસાઈનમેન્ટ તેને મળવાનું હતું. તેણે અગાઉ પણ સોનાની દાણચોરીમાં મદદ કરી હોવાની કબૂલાત કરી હતી. ડીઆરઆઇ આ કેસમાં વધુ તપાસ કરી રહી છે. તાજેતરમાં ડીઆરઆઈએ રૂ. 2.6 કરોડની કિંમતનું 4 કિલો સોનું જપ્ત કર્યું હતું.
