દમણ : રાજ્યના સીમાડે આવેલી કેન્દ્ર શાસિત દમણમાં પર્યટકોનો સારોએવો ઘસારો જોવા મળતો હોય છે. ગુજરાતીઓ વિકેન્ડમાં દમણમાં જ પહોંચી જતા હોય છે. દમણ એ ફેવરિટ ટુરિસ્ટ ડેસ્ટિનેશન છે. ત્યારે દમણના દરિયામાં નહાવા પર પ્રતિબંધ પ્રતિબંધ મૂકાયા બાદ હવે બીચ પર દરિયા કિનારે પાન મસાલા અને ગુટખા ખાવા પર પણ પ્રતિબંધ લગાવવામાં આવ્યો છે. હવેથી દમણના દરિયા કિનારે પાન મસાલા અને ગુટખા ખાતા પર્યટકો પકડાશે તો દંડ ફટકારવામાં આવશે. દમણના બીચ પર સ્વછતા જાળવવા અને વ્યસન મુકિત માટેના અભિયાનના ભાગરૂપે નિર્ણય લેવાયો છે. આ માટે બીચ પર પોલીસ જવાનો તૈનાત રહેશે.
દમણના દરિયા કિનારે નાહવા પર પ્રતિબંધ લાગ્યા બાદ વધુ એક કડક નિર્ણય લેવામાં આવ્યો છે. આ વખતે દમણ કલેક્ટર દ્વારા જાહેર કરેલા એક આદેશમાં દમણના દરિયા કિનારે નહાવા ઉપરાંત પાન મસાલા અને ગુટકા ખાવાની સાથે પ્લાસ્ટિકના વપરાશ પર પણ પ્રતિબંધ મૂકવામાં આવ્યો છે. મહત્વપૂર્ણ છે કે થોડા દિવસ અગાઉ પ્રશાસન દ્વારા દમણના દરિયા કિનારે પર્યટકોની સુરક્ષા માટે દરિયામાં નહાવા પર પ્રતિબંધ લગાવવામાં આવ્યો હતો અને પર્યટકોને દરિયામાં નહાતા રોકવા પોલીસ પહેરો પણ ગોઠવવામાં આવ્યો છે.
હવે દમણના દરિયા કિનારે સ્વચ્છતા જળવાઈ રહે અને પર્યાવરણનું જતન થાય તે માટે અભિયાન શરૂ કરાયુ છે. હવેથી દમણના બીચ પર પાન મસાલા અને ગુટકા ખાવા પર પ્રતિબંધ લગાવવામાં આવ્યો છે. સાથે જ દરિયા કિનારે પ્લાસ્ટિકનાં વપરાશ પર પણ રોક લગાવવામાં આવી છે. તેમજ કલેક્ટરના આ આદેશના ભંગ બદલ રૂપિયા 1000 નો દંડ પણ ફટકારવામાં આવશે.
મહત્વપૂર્ણ છે કે દમણના દરિયા કિનારે દર વર્ષે મોટી સંખ્યામાં દેશભરમાંથી પર્યટકો ઉમટે છે. આથી દરિયા કિનારે ભીડ જામે છે. સાથે જ ચોમાસા દરમિયાન દરિયો તોફાની રહેતો હોવાથી દરિયામાં નહાવું જોખમી સાબિત થઇ શકે છે. આથી પર્યટકોની સલામતી માટે પ્રશાસન દ્વારા દરિયામાં નહાવા પર રોક લગાવવામાં આવી છે. વધુમાં હવે દમણનો દરિયા કિનારો પણ સ્વચ્છ રહે તે માટે દરિયાકિનારે પાન મસાલા અને ગુટકા ખાવા પર પણ પ્રતિબંધ લગાવવામાં આવ્યો છે. આ આદેશોનું પાલન કરવા માટેની જવાબદારી પોલીસ વિભાગની સાથે અનેક વિભાગોને સોંપવામાં આવી છે. આદેશના પાલન માટે ગ્રામ પંચાયત, જિલ્લા પંચાયત, એક્સાઇઝ વિભાગને પણ સોંપવામાં આવી છે. દમણના દરિયા કિનારે તૈનાત પોલીસકર્મીઓ પ્રશાસનના આદેશોનું કડકાઇથી પાલન થાય તે માટે સતત નજર રાખી રહ્યા છે. આથી જો હવે દમણના દરિયા કિનારે પાન મસાલા કે ગુટકા ખાતા પકડાશે તેમને 1 હજાર રૂપિયાનો દંડ પણ ફટકારવામાં આવશે.
